Read Khumi Chin Leu Thui Nai 28 Bible Online

Leu Thui Nai 28 - Khumi Chin bible

Leu Thui Nai 28

¹Nangchi ly nangmychi i ARENG Tameuh i leu pei nai tangai iy, vaini kaimy kang thui pi nai reita leu pei nai bawibawichi ai paleung hawi verei patawm u baly, mymy ly nangchi ai khaileaung pri y awm nai khumi cheng bawibawichi tleaung y tahm pasang ai.

²Nangchi i ARENG Tameuh i leu tangai u baly, mymy ly hina nai amtheaung naira cheaungkhangchi nangchi teng y tym hai ai:

³“ARENG ly nangchi i marychi hawi li hlauchi ai amtheaung hai ai.

⁴“ARENG ly nangchi ai cho chanau neangneang thawn-kai ai nai py, amti amjang thau ai nai py, si, beram neangneang peung ai nai py amtheaung hai ai.

⁵“ARENG ly nangchi i amti amjangchi hawi, hunichira i nga nai teicha teineichi amtheaung hai ai.

⁶“ARENG ly nangchi i sa nai tleirei y amtheaung hai ai.

⁷“ARENG ly nangchi ai tiu nai paleung ka-echi ai sum hai ai. Nichi ly lam harei mang tiu ai nai ang jeu i py, lam takhrakhra mang preang u akyhkyh ai.

⁸“Nangchi i ARENG Tameuh ly nangchi i kalop sa naira y amtheaung hai ai i, nangchi i chohpaichi theung y choh kawi hai meng ai. Mymy i pei ai nai pri theung y nangchi ai amtheaung hai ai.

⁹“Nangchi ly nangmychi i ARENG Tameuh my leu pei naichi tangai iy reita ngiereichi sa patawm u baly, mymy i leu adeu hai nai kamta, nangchi ai mymy i khumi kypkyp lawm hai ai.

¹⁰Naibaly nangchi ly ARENG my vawi takhra nai khumi ne, nanai khaileaung pri i khumi cheng bawibawichi my pany nai deaungkho y, nangchi ai ang tarym u ai.

¹¹ARENG ly nangchi ai pei ai, nanai amsi pajochi teng y adeu nai pri y, nangchi ai cho chanau, si, beram tawnbawichi neangneang peung hai ai; amti amjang py neangneang thawn hai ai.

¹²Mymy ly kani katheu paeaung iy kanikhu hawi hai ai i, nangchi i sa nai tleirei eaung hai nai deaungkho y, nangchi ly pri neangneangchi teng y piu paseng ai; na i py nangchi ly mani pri i py piu la ai ny y.

¹³Nangchi i ARENG Tameuh my pei nai reitachi ai paleung hawi verei patawm u baly, nangchi ly cheng theaung khumichi ai lu sa ai i, abang naichi lawm ai ny y; nangchi ly paitiu akhum y ai i, nang chawn u jojo ai.

¹⁴Hunai deaungkho y nangchi ly hini reita leu pei naichi ai paleung hawi verei patawm u ai nai tla; tameuh takhra ai py chiu u moh.

¹⁵“Vaini nangchi teng y kang thui pi nai ARENG Tameuh i reita leu pei nai ngiereichi ai paleung hawi verei patawm u y baly, nangchi i tlangtleaung y hina nai taham si nairachi tym hai ai:

¹⁶“ARENG ly nangchi i marychi hawi li hlauchira y amsawi lawi hai ai.

¹⁷ARENG ly nangchi i amti amjangchi hawi hunira i nga nai teicha teineichi ai amsawi lawi hai ai.

¹⁸“ARENG ly nangchi teng y cho chanau sa nai di hai nai py, nangchi i amti amjang theu nai di hai vui ai nai py, si, beram peung hai y ai nai py nangchi ai amsawi lawi hai ai.

¹⁹“ARENG ly nangchi i sa nai tleirei y amsawi lawi hai ai.

²⁰“Nangchi ly hawi y naichi sa iy ARENG ai khai u su baly, nangchi i sa naira tleirei y sum naira, paleung bi naira hawi ngari kamtangchi tym hai ai. Hunai deaungkho y nangchi ly myh u kasa ai.

²¹Nangchi teng y no kanghawi harei bo y harei tym nai deaungkho y, nangchi peang ai nai pri y leaungrei py heng nai awm ai ny y.

²²ARENG ly nangchi teng y bau iy keaungno nai chym thai nai no-nachi tym hai ai. Kani khang nai, ali kabi aho nai pajengrachi deaungkho y, nangchi i amti amjangchi py phra ai. Nangchi myh kang ai nai pa-rei hini kamtangchi avum hai ai.

²³Kani khang nai deaungkho y khaileaung ly tamo tanrei tang na ai.

²⁴ARENG my kani nai hai ai nai jeng y, speung kamchai, spryh kamchai aho hai nai deaungkho y nangchi ly dei u be ai.

²⁵“ARENG my nangchi i paleung ka-echi ai eaung hai ai. Nangchi ly paleung ka-echi ai lam harei mang tiu i py tavai sum nai deaungkho y, lam takhrakhra mang preang u akyhkyh ai. Khaileaung pri verei i khumi bawibawichi ly nangchi i tlang tleaung y huna naichi tym nai niu khala, nangchi ai jei u ai.

²⁶Nangchi dei nai khala y tavochi hawi mawi kasichi ly nangchi i ngan cha u ai, huni tavo hawi mawi kasichi ai paryh vui ai nai khumi awm ai ny y.

²⁷ARENG my Aikupta chengchi i tlang tleaung y tym hai nai kamta, nangchi i tlang tleaung y uisaluchi man hai ai. Mymy ly nangchi i tlang verei tapra hawi kamthachi man hai bi ai, na i py hunichi ly asi sa i py hawi ali ai ny y.

²⁸ARENG my nangchi theung y pathu nai, mei paju nai, mynkym nai, huna naichi tym ai.

²⁹Kani thuntang y my patham mengmang nai mei kamju kamta, nangchi ly lam niu ai ny y; sa nai tleirei eaung ai ny y. Nangchi i tlang tleaung y ana nai, lawm naichi avawrei avum ai i, nangchi ai ami my py sabawm ai ny y.

³⁰“Nang hawi apom ai nai angam yb nai neampachy ai takhra khumi leaungrei my pom vui ai. Nang ly yhm sa i py, huni yhm y awm ai nai ngo y ai. Nang ly kreip akho sa i py, athai cha ai ny y.

³¹Nang i si ai nangmy i mei keung y tleh i py, nang ly cha ai nai nga ai ny y. Nang i keaungngo kano kasauchi ai paviu vui nai niu i py ngo ali teang y ai. Nang i beramchi ly paleung ka-echi kiu y tym vui ai; na i py nang ai sabawm nai keung leaungrei py awm ai ny y.

³²Nang i mei keung y my nang i cho chanauchi ai cheng takhrachi my miseaung palawn ai nai hawi vui ai. Nang ly kani tleirei cho chanauchi vawi ali teang na mo, nanai angdeang teu i py mei naini khohai atyhtyh ai.

³³Nangchi kalop sa akawm parai naimy pati nai amti amjang bawibawichi ai pri takhra i khumichi my la pi vui ai. Nangchi ly ana panang nai bo baly ati sai py ngo u y ai.

³⁴Nangchi ly ngari kamtang molam y pathu u ai.

³⁵ARENG my nangchi i kheuchi y hawi vai y nai angvawichi man hai ai; nangchi i tlang verei uisaluchi kawi biu ai.

³⁶“ARENG ly nangchi hawi nangchi i samrang ai, nangchi hawi nangchi i amsi pajochi tym vai y nai pri takhra mang y ang hawi pawn ai; nangchi ly huni pri y dengkeaung, lengseaung hawi sa nai tameuhchi ai chiu u ai.

³⁷ARENG my nangchi ai pri tleirei y ahei hai nai khala, huni pri i khumichi ly nangchi i patang nai sai nui iy kaso theu u ai; nichi my nangchi ai panui pachem hai ai.

³⁸“Nangchi ly amti amjang ti neangneang hei i py maidenreichy naini pakym u ai, ati mana nai mo na baly amti amjangchi ai akhutamachi my cha vui nai deaungkho y ne.

³⁹Nangchi ly kreip akhochi palum pachai teu i py, athaichi cha u ai ny y, kreip hang py nei u ai ny y; ati mana nai mo na baly mipochi my kreip angjynchi ai cha nai deaungkho y ne.

⁴⁰Nangchi i awm nai pri y olive keungchi neangneang prau nai ne, na i py nangchi ly olive asitui nga ai ny y; ati mana nai mo na baly olive athaichi vui pawn nai deaungkho y ne.

⁴¹Nangchi ly cho chanauchi sa ai jemjem teu i py, paleung ka-echi my langheng y hawi pawn ai nai deaungkho y, nangchi ly cho chanau by y ai.

⁴²Nangchi i dengkeaung keungchi hawi amti amjang ngiereichi ly mipochi tla ai i phra be ai.

⁴³“Nangchi i pri y awm nai cheng takhrachi ly tahm asang tleaung asang ra iy, nangchi ly jum ryh jum ryh ai.

⁴⁴Nichi my nangchi teng y tangka paseng ai, na i py nangchi ly nichi teng y paseng pajau ai ny y. Nichi ly nangchi ai lu sa naichi lawm iy, nangchi ly nichi i nithun abang naichi lawm u ai.

⁴⁵“Nangchi teng y hini ka-jeirachi tym ai; nangchi ly nangmychi i ARENG Tameuh i leu tangai u y, mymy i reitachi py patawm u y baly, nangchi myh kang nai pa-rei, hina nai ka-jeirachi avum u ai.

⁴⁶Huni ka-jeirachi ang tym baly, hunichi ly Tameuh i Tara chih naira ne, nanai nangchi hawi nangchi i kangpreangchi ly pany u jojo ai.

⁴⁷ARENG my nangchi ai ati cheaungkhangra y amtheaung hai bo, na i py nangchi ly mymy i kalop ai paleung amo theu parai naimy so u y.

⁴⁸Hunai deaungkho y ARENG my nangchi ai tiu ai nai pato nai paleung ka-echi i kalopchi nangchi sa u lawh ai. Nangchi ly kajeu kanglam, tui kanghai hawi tlang ka-keu naimy awm u ai i, cheaungkhangra y avaw u ai. Nangchi tama ai nai pa-rei ARENG my nangchi ai ana kalikachi hai ai.

⁴⁹ARENG ly nangchi ai tiu hai ai nai nangchi hawi leu atlyh y nai khaileaung pri katemra i khumi cheng harei ang tym hai ai. Huni khumichi ly ahmtlau my ni nai kamta, nangchi ai ang tiu ai.

⁵⁰Nangchi ai katheang kalen vawi y naimy, ami ai py pahyp ai ny y.

⁵¹Nichi ly nangmychi i tawnbawichi hawi amti amjangchi ang cha pi pawn nai deaungkho y, nangchi ly kajeu kanglam y dei u ai. Nangchi i choh, kreip hang, olive asitui hawi si, beramchi ai cha pi pawn nai deaungkho y nangchi ly dei u ai.

⁵²Nichi ly nangchi i ARENG Tameuh my pei nai pri y awm nai mary ngiereichi ai tiu nai deaungkho y, nangchi my chymme bo, nanai ym iy khaw parai nai mary apai ka-sangchi ly anawi pawn ai.

⁵³“Paleung ka-echi ly nangchi i marychi ai katanmeuh iy, lampawm atheng nai khala, nangchi ly khri pa-rei kajeu alam nai deaungkho y, nangchi i ARENG Tameuh my pei nai cho chanauchi ngan malawn py cha u ai.

⁵⁴Huna nai mary ai paleung ka-echi my katanmeuh nai thym y kajeu alam nai khumichi ly khumi kahawichi ne i malawn py amy i cho chanau ngan cha u ai. Nichi ly mymychi i amjo amnau, khrei keh nai aju hawi, awm rai nai cho chanauchi ai malawn py, huni ngan mawi phy pi ai ny y.

⁵⁵

⁵⁶Khumi kahawi ne iy nang chawn nai deaungkho y khaileaung y kheu chiu vai y nai neampachy malawn py, mary ai paleung ka-echi my katanmeuh iy cha nei takang nai khala, amy i tapen tlei nai deaungdi hawi tapen chum nai deaungdi hawi thui ai kangviu y cha ai. Huni deaungdi i ngan hawi thui ai ly my i tamen nai juvo hawi cho chanauchi ai py cha amji hai ai ny y.

⁵⁷

⁵⁸“Nangchi ly hini cha-iu theung y tajiu nai Tameuh i leu pei nai bawibawichi ai paleung hawi verei patawm y i py, nangchi i ARENG Tameuh i lyh ai hawi iy ka-jei hawi nai amyn ai tahm khai y i py,

⁵⁹mymy ly nangchi hawi nangchi i kangpreangchi teng y asi atang i py hawi lei y nai no-na hawi ka-jei hawi nai kanghawichi tym hai ai.

⁶⁰Mymy ly Aikupta pri y nangchi avum reng nai ka-jei awm nai no-nachi ai nangchi teng y ang tym hai bi ai nai deaungkho y, nangchi ly amcheng u pajau ai ny y.

⁶¹Tameuh i reita leu pei naichi hawi parip naichi abawi nai hini cha-iu theung y abawi y nai takhra no-na hawi no kanghawi cheaungkhangchi ai py, nangchi i tlang tleaung y tym hai ai nai deaungkho y nangchi ly dei u be ai.

⁶²Nangchi ly kani mang i ka-sichi tanrei vuikanai nawi u teu i py, ARENG Tameuh i leu tangai u y nai deaungkho y, khumi maidenreichy naini heng u ai khyh.

⁶³ARENG ly nangchi ai nang chawn hai ai nai py, khumi neangneang peung hai ai nai py, nangchi ai paleung anyp nai kamta, nangchi ai tamyh naira py, nangchi ai phra hai naira py, paleung anyp ai. Nangchi peang ai nai pri i dengdairei nangchi ai patheu vui ai.

⁶⁴“ARENG my nangchi ai khaileaung pri khuteng taki y tym pa-rei, khumi cheng cheaungkhangchi theung y ahei hai ai. Huna nai khala nangchi hawi nangmychi i amsi pajochi chiu vai y nai dengkeaung, lengseaungchi hawi sa nai tameuhchi chiu u ai.

⁶⁵Nangchi ly nangmychi tym nai meingtym tleirei y awmnem naira ngo u y ai, saleaung khuteng by y. ARENG ly nangchi ai paleung bi hai ai. Athang khai naira by y ai i, paleung phra hai ai.

⁶⁶Nangchi ly deira hawi avum jojo ai. Dym khawn tleirei jei hyn iy deira hawi avum jojo ai.

⁶⁷Nangchi i niu nai ngiereichi molam y kaso theu naimy awm u ai. Nangchi ly khawn tleirei kani dym ai nai py, dym tleirei khutawi ai nai py kadeaung u ai.

⁶⁸ARENG ly nangchi ai Aikupta pri y pato teang ai ny y, nanai thui i py, samphochi hawi nangchi ai huni pri mang y tha ali teang ai. Huni pri y nangchi ly nangmychi ai paleung ka-echi teng y miseaung y ajo i py, nangchi ai van ai nai ngai nai ami py awm ai ny y,” napi.