Read Khumi Chin Leu Thui Nai 29 Bible Online

Leu Thui Nai 29 - Khumi Chin bible

Leu Thui Nai 29

¹Sinai mawi saleung y ARENG ly Israela chengchi hawi leu maikawm asa pajau nai bo y, vai Moba pri y Mosi dengdairei Israela chengchi hawi Leu Maikawm asa panawi bi nai ne.

²Mosi ly Israela khumi bawibawichi ai palau achu iy nichi teng y, “ARENG ly Aikupta pri y samrang Pharao, ni i bangtangchi hawi pri vereichi ai mana pajeng moh, nanai nangchi niu u bo.

³Nangchi ly ka-jei awm nai no kanghawichi, ARENG my patei nai lyh ai hawi parai nai rengrang ka-ma-rachi py niu u bo.

⁴Na i py nangchi niu nai ngiereichi ai pany thai ai nai cheng naira ly vaini khrairei mymy ly nangchi ai pei y.

⁵ARENG my nangchi ai saneng vui palyh sala daichi ka-vym jeungrei ang pahawi nai thym khala, nangchi i baichu ateaungchi pyn y, nangchi i phainaichi tlum y.

⁶Nangchi teng y cha ai nai teicha teinei, nangchi nei ai nai kreip hang hawi pavui nai amjychi py by y, na i py ARENG ly nangchi i Tameuh ne, nanai pany hai ai nai nangchi ngai nai ryrei ang pei.

⁷Hini meingtym y achi tym u nai khala, Hesabon samrang Sihon hawi Basan samrang Oka nini ly theu iy, achi ai tiu hawi nai ne. Na i py achi my nichi ai eaung vui nai deaungkho y,

⁸nichi i pri peang ai nai Ruben theaung, Kad theaung hawi Manase theaung ka-hyhreichi ai phy paji pi bo.

⁹Nangchi sa nai tleirei y eaung ai nai, vai asa nai Leu Maikawm theung i leu bawibawichi ai patawm ai nai dawn u patyp.

¹⁰“Vaini ly nangchi theung i lu sa nai keungchi, miteaung kehchi, neampacho,

¹¹neampachychi hawi deaungdichi, nangchi i vui thengei, tui deu pi nai, nangchi hawi vanrei awm nai cheng takhrachi hawi, nangchi bawibawi ly ARENG Tameuh i mo y angdo u bo.

¹²Nangchi bawibawi ly nangmychi i ARENG Tameuh hawi vaini vaineng abeu iy, Leu Maikawm asa ai nai tla.

¹³Huna khala naini ARENG ly nangchi hawi nangmychi i amsi pajo Abraham, Isaka, Jakobchi teng y adeu nai kamta, nangchi ai mymy i khumichi ne, nanai leu khaw hai ai. ARENG ly nangchi i Tameuh ne.

¹⁴ARENG ly nangchi hawi naini hini Leu Maikawm, hini vainengchi asa nai khyh ny y,

¹⁵mymy i mo y vaini awm nai achi bawibawi py, vaini achi hawi vanrei tapen y rai nai mo mang i deung kangthauchi hawi py asa nai ne.

¹⁶“Aikupta pri y py, cheng takhrachi i khu ka-peang tako prei naira y py, kaichi i heng nai sai nangchi pany u bo.

¹⁷Nichi i amso ngai nai dengkeaung hawi sa nai myn, lengseaung hawi sa nai myn, tangka hawi sa nai myn, muku hawi sa nai mynchi py nangchi niu u bo.

¹⁸Vaini hini meingtym y angdo u nai nangchi theung i neampacho, ti y baly neampachy py, yhm dengtheung, ti y baly cheng theaungchi py, achi i ARENG Tameuh ai khai su iy, cheng theaung takhra khumichi i tameuhchi ai chiu y ai nai dawn patyp u. Huna nai sa lawh baly khota iy dei thailai awm nai keung cheang hai nai tangjyn lawm ai.

¹⁹Vaini hini leu pei naichi thai u nai bo y, amy i kangai sa veangveang nai ly ati cheaungkhangra y hawi nga ai, nanai ym nai khumi awm moh sy; na i py nangchi theung y khumi kahawi py, khumi hawi y nai py, bawibawichi ly tama rau ai.

²⁰ARENG ly huna nai sa nai khumi ai kamngo pahen ai ny y. ARENG ly huni khumi ai khri pa-rei kado theu hai nai deaungkho y, ni ly hini cha-iu theung y tajiu nai ka-jeira bawibawi avum hai iy phra hai ai.

²¹Hini reita theung y tajiu nai Leu Maikawm taham si naichi hawi vanrei, ni ly ka-jeira avum nai deaungkho y, Israela cheng theaung bawibawichi i vui amtiura lawm ai.

²²“Vai mo mang y nangchi i deung kangthauchi hawi pri kamlora i cheng takhrachi ly ARENG my nangchi i pri y tym hai nai ka-jeira hawi ngari kamtangchi niu u ai.

²³Nangchi i khaileaungchira y kan hawi palawichi sau hai nai deaungkho y, daichi ka-vym lawm ai; ati sai py pati ai nai ngo y ai, achachi malawn py prau ai ny y. Nangchi i pri ly ARENG my khri pa-rei kado iy taphra nai Sodom hawi Komora mary, Adamah hawi Zeboim marychi ai sa nai kamta phra ai.

²⁴Huna nai khala pri tleirei i khumi cheng bawibawichi my, ‘ARENG ly nichi i pri ai ati mana nai taphra lawh mo? Ati mana nai hina tanrei ka-jei awm nai kado theu hai lawh mo?,’ nanai deng u ai.

²⁵Pathang pi nai ly ‘ARENG ly nichi i amsi pajochi ai Aikupta pri i dengdairei pahawi nai khala, nichi i amsi pajochi hawi asa nai Leu Maikawm ai taphra nai deaungkho y ne.

²⁶Nichi ly ARENG my chiu moh, napi nai tameuhchi, vaichi khala chiu vai y nai tameuhchi ai chiu u bo.

²⁷Hunai deaungkho y ARENG ly mymy i khumichi tlang tleaung y kado theu hai theu i, hini cha-iu theung y tajiu nai ka-jeira bawibawichi ai nichi i pri y tym hai bo.

²⁸ARENG ly khri pa-rei kado theu nai deaungkho y, nichi ai mymychi i pri dengdairei patheu vui iy, pri takhra mang y ahei hai pawn bo; vaini khrairei nichi ly huni pri y awm u jo nai ne,’ napi.

²⁹“Achi i ARENG Tameuh my thui pi y nai satangchi awm rai. Na i py achi teng y thui pi nai satangchi ly reita leu pei naichi ne; achi hawi achi i kangpreangchi ly huni reita leu pei naichi ai avawrei patawm jojo ai nai tla.