Read Khumi Chin Leu Thui Nai 31 Bible Online

Leu Thui Nai 31 - Khumi Chin bible

Leu Thui Nai 31

¹Mosi my Israela chengchi teng y thui pi bi nai ly

²“Vai kai ly saneng chungvai atlo apomrei awm bo i, nangchi ai kakra lu kang sa pi pajau ai ny y leang bo. Huni khyh ny y, ARENG my kai ai Jordan tavo angpeang ai nai py pei y bo.

³Nangchi i ARENG Tameuh ly nangchi ai pahawi iy, huni pri y awm nai khumi chengchi ai patheu vui ai i, nangchi ly nichi i pri y awm ai nai nga u ai; naibaly ARENG my leu pei nai kamta, Josua my nangchi ai lu sa pi ai.

⁴ARENG ly Amori samrang Sihon hawi Oka nini ai pasum vui iy nichi i pri taphra pi vui nai kamta ly huni pri y awm nai khumi chengchi ai tamyh ai.

⁵ARENG my nangchi ai nichi i pri ai tiu nai pajau hai ai i, kaimy thui pi yb nai kamta nangchi ly nichi ai pajau u ai nai tla.

⁶Atho ala iy sorai paleung thau u. Huni khumi chengchi ai jei u moh. Nangchi i ARENG Tameuh ly nangchi ai awm hai ai. Mymy ly nangchi ai ang sabawm takengkei ai i, nangchi ai ang khai su ai ny y,” napi.

⁷Naibaly Mosi ly Josua ai palau iy, Israela cheng bawibawichi i mo y ni teng y thui pi nai ly “Nang ly atho ala iy sorai paleung thau; ARENG my nangchi i amsi pajochi teng y adeu nai pri y kun iy peang ai nai, nang ly hini khumichi ai lu sa ai nai tla.

⁸ARENG mymy kypkyp my nang ai pahawi ai i, nang hawi vanrei awm ai. Mymy ly nang ai sabawm takengkei ai, nang ai khai su y leang. Hunai deaungkho y athosi moh, jei py jei moh,” napi.

⁹Naibaly Mosi ly Tameuh i reita leu pei naichi tajiu iy, ARENG i Leu Maikawm Pawm kry nai Levi theaung pathyp pi nai keungchi hawi Israela cheng lu sa nai keungchi teng y au pi bo.

¹⁰Naibaly Mosi my nichi teng y, “Saneng saryhrei y tlenrei, kalaichi palawi pi nai saneng Taichy pawi sa nai kani y, hini reita leu pei naichi ai khumi mipuichi thai pa-rei phain pi ai nai tla.

¹¹Israela chengchi ly ARENG Tameuh ai chiu nai meingtym harei khyh naira y tym u nai khala, hini reita leu pei naichi phain pi ai nai tla.

¹²Neampacho, neampachy, deaungdi hawi nangchi i marychi theng y awm nai cheng takhra khumichi raurei, khumi bawibawichi palau achu iy nichi ly huni reita leu pei naichi thai ai i, nangchi i ARENG Tameuh ai tahm khai jei kaji naimy leu pei naichi ai paleung hawi verei patawm u ai.

¹³Hina nai sa iy nangchi i ARENG Tameuh my reita leu pei naichi thai vai y nai nangchi i kangpreangchi thai u ai. Huna khala naini nichi ly Jordan tavo angpeang iy, peang ai nai pri y awm nai ryrei ly mymy i leu pei naichi tangai ai nai nichi amtiu u ai,” nanai thui pi bo.

¹⁴Naibaly ARENG my Mosi teng y, “Nang ly dei ai nai kasa bo. Kai ly Josua ai leu pei ai nai ngai i, ni ai Tabynako mang y jeu hai ba,” napi. Naibaly Mosi hawi Josua nini ly Tabynako mang y chei hawi i,

¹⁵ARENG ly Tabynako katheu pa-khora y tamai angjawi kamta amteng pi bo.

¹⁶ARENG my theung mang dengdairei Mosi teng y, “Nang ly kra y nai sala y dei ai, nang dei nai bo y Israela chengchi ly vaineng takan iy, nichi hawi kai asa nai Leu Maikawm taphra u ai. Nichi my kai ai khai su iy nichi awm ai nai pri i tameuh takhrachi ai chiu u ai.

¹⁷Huna nai khala kai ly kado theu iy nichi ai khai su ai, naibaly nichi ly tama u ai. Nichi ly ka-jei awm nai patangrachi avum u ai. Huna nai khala nichi i Tameuh kai ly nichi hawi vanrei awm pi y nai deaungkho y, hina nai ka-jeirachi avum nai ne, nanai nichi pany u ai.

¹⁸Nichi ly Tameuh takhrachi ai chiu iy hawi y naichi sa u nai deaungkho y, kai ly nichi ai atleu ai ny y.

¹⁹“Vai nang ly hini khulym tajiu ba, hini khulym ly Israela chengchi i vui kai i pany hai nai ka-ma-ra lawm ai nai, hini khulym ly nichi ai patiu pi.

²⁰Kai ly nichi i amsi pajochi teng y adeu pi nai kamta, nichi ai paitiu khuta hawi nai pri y kapahawi ai. Nichi ly huni pri y teicha teinei kajeu kawi pa-rei cha ai nai nga u ai i, awmnem naimy awm u ai. Na i py nichi ly kai ai ym y ai i, tameuh takhrachi ai chiu u ai. Nichi ly kai ai khai su iy Kai i Leu Maikawm ai taphra nai deaungkho y,

²¹ka-jei awm nai patangrachi khri pa-rei avum u ai. Na i py nichi i pany nai ka-ma-ra lawm ai nai hini khulym ly thui u ai nai tla. Kaimy pei ai adeu nai pri y kapahawi y rai khala my, nichi i paleung theung y dawn naichi kapany,” napi.

²²Huni kani y Mosi ly huni khulym tajiu iy, Israela khumichi teng y patiu pi bo.

²³Naibaly ARENG my Nun i chapo Josua teng y, “Atho alo ly sorai paleung thau. Nang ly Israela chengchi ai lu sa iy kaimy adeu nai pri y kun ai nai nga ai, kai ly nang hawi vanrei awm hai ai,” nanai thui pi.

²⁴Mosi ly Tameuh i reita leu pei nai bawibawichi ha py takhawi y pa-rei cha-iu theung y tajiu typ bo.

²⁵Naibaly ARENG i Leu Maikawm Pawm kry nai Levi theaung pathyp pi nai keungchi teng y,

²⁶“Tameuh i reita leu pei nai cha-iu lo u ly nangchi i ARENG Tameuh i Leu Maikawm Pawm sahawi y khai u; huni cha-iu ly mymy i khumichi i vui y pany ai hawi nai ka-ma-ra ne i, huni meingtym y awm jo ai nai tla.

²⁷Nichi ly paleung tang iy tiusi, nanai kai pany. Nichi ly kai dei y rai khala my ARENG ai tiu u i, kai dei nai bo khala ipsaly, huni tleaung y tiu u ra ai.

²⁸Kai ly hini satangchi thui pi thai ai nai, nangchi cheng theaungchi i lu sa nai keungchi hawi miteaung keh bawibawichi ai angym hai, kaimy kani hawi khaileaung ai tauh iy nichi teng thui pi ai.

²⁹Kai dei nai bo y hini khumichi ly khumi hawi y naichi lawm u ai i, kaimy patiu pi nai ngiereichi khai su ai, nanai kai kapany. Vai mo mang y nichi ly ARENG my paka nai hawi y naichi sa u nai deaungkho y, kado theu hai ai i, nichi ly ka-jeira avum u ai,” napi.

³⁰Naibaly Mosi ly Israela khumi bawibawichi teng y, hina nai khulym sairei thui pi bo.