Read Khumi Chin Leu Thui Nai 33 Bible Online

Leu Thui Nai 33 - Khumi Chin bible

Leu Thui Nai 33

¹Tameuh my vawi takhra nai Mosi ly mymy dei y rai khala, Israela khumichi teng y hina nai kamta, amtheaungra pei nai ne.

²ARENG ly Sinai mawi salo mang dengdairei ang jeu; mymy ly kanito kamta Edom pri salo y amteng iy, Paran mawi salo mang dengdairei mymy i khumichi teng y kangvang ko bo. Mymy i lamtang mang y mai kangveaung hawi sang neangneang chang y nai kani pri amtaw thau naichi abang u bo.

³ARENG ly mymy i khumichi ai tamen, mymy i khumichi ai kry ryhpatyh na. Hunai deaungkho y achi ly mymy i kheu keung y ambeu iy, mymy i reita leu pei naichi tangai u bo.

⁴Achi ly Mosi my pei nai reitachi patawm u bo; huni reita leu ly achi khumi chengchi i vui vang teng keh nai yhmtheaung katui ne.

⁵Israela cheng theaungchi hawi luchi akachu u nai khala, ARENG ly mymy i khumichi i samrang lawm bo.

⁶Naibaly Mosi my Ruben theaung ai patyp iy thui nai ly: “Ruben theaung ly khumi dideichy teu i py cheng theaung myh moh sy.

⁷Juda theaung ai patyp iy thui nai ly: “Aw ARENG, Juda theaung my hnei takeng nai raawi tangai pi kyh ba; takhra cheng theaungchi hawi amkawm ali teang sy ba. Aw ARENG, nichi ai amo hai kyh ba; nichi i vui paleung ka-echi ai tiu ba”

⁸ Levi theaung ai patyp iy thui nai ly: “Aw ARENG, nang i kangai ly nang ai ka-ym awm nai Levi theaung dengdairei, Urim hawi Thummim saho y nangmy i kangai amteng hai bo; nang ly Massah meingtym y nichi ai ka-ym awm mo, by y mo cham iy, Meriba micheaung y nichi ka-ym awm, nanai pany bo.

⁹Naibaly nichi ly mymychi i amhm ampo, amjo amnau, cho chanauchi ai tamen nai tleaung y nang ai tamen keh. Nichi ly nang i leu pei naichi tangai u iy nang i Leu Maikawm ai py kry u bo.

¹⁰Nichi ly nang i khumichi ai nang i reita patawm ai nai patiu pi ai; Nichi ly nang i maicham tleaung y apathyp u ai.

¹¹Aw ARENG, nichi cheng theaung ai lo-pa hai kyh ba; Nichi i sa nai tleirei y kawn pi kyh. Nichi i paleung ka-e bawibawichi ai ang thau pajau y na pa-rei chiu piupa kyh ba.”

¹²Benjamin theaung ai patyp iy thui nai ly: “Benjamin Theaung ai ARENG my tamen iy kry bo. Mymy ly nichi ai kani khengrei kry jojo, nichi ly mymy i ama hai nai anui y chymme naimy awm u bo.”

¹³Josepha theaung ai patyp iy thui nai ly: “ARENG ly nichi i khu ka-peang theung y kanikhu hawi hai ai nai py, khaileaung theung mang tui theu hai ai nai py sabawm pi na sy.

¹⁴Nichi i khu ka-peang ly kanibi y myn nai thengthai, neng tym baly vang teng nai thengthaichi hawimy nang chawn na sy.

¹⁵Jangni i mawichi ly vang teng nai thengthaichi athai pasu bawibawi sy.

¹⁶Mai angveaung nai lymlo kangpho theung mang dengdairei, leu pei nai keung ARENG i hawi naira my amtheaung hai nai deaungkho y, nichi i khaileaung y vang teng parai nai amti amjangchi thau sy. Josepha ly my i amjo amnauchi theung y lu sa nai keung ne i, ni i theaung ly huni amtheaung nairachi ngo u sy.

¹⁷Josepha ly si katai kamta py, salen katai taki kamta py atho awm parai. Ni i takichi ly Manase theaung hawi Ephraim theaung sang neangneangchi ne. Ni ly huni takichi hawi khumi cheng cheaungkhangchi ai khuteng taki khrairei deng pawn ai.

¹⁸Zebulun hawi Isakar theaung ai patyp iy thui nai ly: “Zebulun theaung ly pangli khuleaung lam hawi ka-sum ka-pai sa iy, nang chawn u na sy. Naibaly Isakar theaung ly mymychi i khu ka-peang theung y yhmtheaung katui nang sy.

¹⁹Nichi ly cheng takhrachi ai mymychi i mawi saleung y palau iy, hu y apathyp avo naichi apathyp u bo. Nichi ly pangli hawi pangli peang jeungrei speung theung i yhmtheaung katuichi nga u nai ne.”

²⁰Kad theaung ai patyp iy thui nai ly: “Kad theaung khu ka-peang kau hai nai keung Tameuh ai palo u. Kad theaung ly khrangsi kamta kiuban, ti y baly lu kei piu ai nai amo yb nai ne.

²¹Nichi ly mychi i vui hawi keh nai khu ka-peang vawi u; Lu sa nai keungchi i vui khu ka-peang ly nichi ai vui pi bo. Israela chengchi ai lu sa nai keungchi jeu u achu nai khala, nichi ly ARENG i leu pei nai hawi reitachi patawm u bo.”

²²Dan theaung ai patyp iy thui nai ly: “Dan theaung ly khrangsi beaungjeaung ne; Ni ly Basan pri dengdairei ampyh naimy theu bo.”

²³Naphtali theaung ai patyp iy thui nai ly: “Naphtali theaung ly ARENG i pahen nai saho y amtheaungra neangneang nga bo. Nichi i khu ka-peang ly Kalili ang i ka-so tokalawi mang y khrairei kau.”

²⁴Aser theaung ai patyp iy thui nai ly: “Aser theaung ly takhra theaungchi tleaung y amtheaungra nga keh. Ni ly amjo amnauchi theung y meimai ngo keh sy. Ni i khu ka-peang theung y olive keungchi neangneang prau na sy.

²⁵Ni i marychi ly tamo katheuchi hawi atleang typ sy; ni ly chymme naimy awm jojo sy,”

²⁶Israela khumichi awi, nangchi i Tameuh ly ni hawi pata ai nai tameuh takhra by y; mymy ly phum-ang nang parai nai hawimy tamai atang iy, kani khusang tako prei naimy, nangchi ai sabawm ai nai ang jeu bo.

²⁷Tameuh ly nangchi ai ama hai jojo nai ne; mymy i deungtasa kiuban my nangchi ai ang dawmkhawn bo. Mymy ly nangchi tako nai lam i, paleung ka-echi ai paryh pi pawn bo; huni paleung ka-echi ai tamyh pawn ai nai nangchi ai leu kang pei bo.

²⁸Hunai deaungkho y Jakob i kangpreangchi ly kani mang dengdairei kadam tla hai nai pri, choh hawi kreip hang nang nai pri y tlamsa naimy awmnem u bo.

²⁹Israela chengchi awi, nangchi ly khri pa-rei taham hawi! ARENG my nangchi ai atleu nai deaungkho y, nangchi ly asa takhra nai cheng ne. Nangchi ai ama hai ai nai hawi paleung ka-echi ai eaung ai nai ARENG mymy kypkyp ly nangchi i khupui hawi haisau ne. Nangchi i paleung ka-echi ly pahenra nga ai nai ang jeu u ai, naibaly nangchi ly nichi ai chiu u piupa vui ai.