Read Khumi Chin Leu Thui Nai 34 Bible Online

Leu Thui Nai 34 - Khumi Chin bible

Leu Thui Nai 34

¹Naibaly Mosi ly Moba angdym i dengdairei, Jeriko mary nisi mang i Nebo mawi, Piska mawi saleung y lyn kalau bo. Huni meingtym y ARENG ly tosyh mang i Dan mary khrairei kau nai Kilead khu ka-peang,

²Naphtali khu ka-peang verei, Ephraim hawi Manase khu ka-peangchi, nidym mang Mrethe pangli khrairei kau nai Juda khu ka-peang,

³Juda khu ka-peang tokalawi ngan, Zoar mary dengdairei chamleaung mary napi nai Jeriko mary khrairei kau nai adym dengdairei pri verei ai Mosi teng y patei pi bo.

⁴Naibaly ARENG my Mosi teng y, “Hini pri ly Abraham, Isaka, Jakobchi i kangpreangchi teng y pei ai, nanai kaimy adeu nai pri ne. Vai nang ly hini pri khen cham; na i py nang ly huni pri y kun ai nai ngo y leang,” napi.

⁵Hunai deaungkho y ARENG my leu pei nai kamta, mymy i miseaung Mosi ly Moba pri y dei bo.

⁶ARENG my Mosi i veu ai ly Moba pri Bethpeora mary kangka Moba leaunghawira y up bo. Na i py vaini khrairei Mosi i tapreaung meingtym ly ami py pany khyp pajau y.

⁷Mosi ly saneng chungvai atlo apomrei khala dei nai ne. Mosi ly dei nai neng khala mei py angvang i, kho py bai y rai.

⁸Israela khumichi ly Moba adym y Mosi ai paleung si hai nai deaungkho y, kani phairei vo hai u bo.

⁹Nun i chapo Josua ly cheng parai nai deaungkho y, mymy i meingtym atheng ai nai au pi bo. Israela khumichi ly Josua i leu tangai nai hawi, ARENG my Mosi teng y leu pei naichi py patawm u bo.

¹⁰Israela cheng theung y ARENG hawi mo atha leungtang iy leu arum nai Mosi ka-tawm amo ly amthawn y leang bo.

¹¹Mosi ly ARENG my pato nai y Aikupta samrang, ni i bangtang miteaung kehchi hawi, khumi mipuichi mo y, takhra amochi my py patei vai y nai, lyh ai hawi naichi hawi, rengrang ka-ma-rachi patei pi bo.

¹²Mosi ly Israela cheng bawibawichi i mei ka-niu y py, takhra mani amochi so thai y nai, khri pa-rei ka-jei hawi parai naichi sa pi nai ne.