Read Khumi Chin Leu Thui Nai 4 Bible Online

Leu Thui Nai 4 - Khumi Chin bible

Leu Thui Nai 4

¹Naibaly Mosi my Israela chengchi teng y, “Nangchi teng y kaimy kang pei nai reita leu pei nai bawibawichi tangai baly heng hawi ai; naibaly nangchi amsi pajochi i ARENG Tameuh my pei nai pri y peang ai iy, hu y awm ai nai nga u ai.

²Nangchi ly kai i leu kang pei naichi ai panawi py panawi u bi moh, pajawp py pajawp u moh. Nangchi teng y kang pei nai nangchi i ARENG Tameuh i leu phai tangai u.

³Peor mawi y ARENG my atiti ang sa pi nai ly nangmychi kypkyp my niu u bo. Mymy ly hu y Bala tameuh ai chiu nai ngiereichi ai tamyh hai pawn ai.

⁴Na i py ARENG Tameuh ai chiu nai nangchi ai ly vaini khrairei heng hawi hai nai ne.

⁵“Achi i ARENG Tameuh my reita leu pei nai kamta kai ly huni leu pei nai bawibawichi ai nangchi teng y kang thui pi bo. Nangchi atiu iy peang ai nai pri y, huni leu pei naichi patawm u.

⁶Nangchi ly huni leu pei naichi ai takhawi y pa-rei tangai u baly, cheng takhrachi i mo y nangchi i cheng nai sai amteng ai. Nichi ly huni reita leu pei nai bawibawichi thai nai khala y, ‘Hini khumichi ly cheng naira kawi angym nai khumi cheng kalen ne lawh ly! nanai palo u ai.

⁷“Achi i ARENG Tameuh ly achi kasabawmra ngai nai khala, achi i sahawi y awm. Hina nai Tameuh ai chiu nai khumi cheng kalen ly niu vai y.

⁸Vaini nangchi ai kaimy patiu nai reitachi kamta, leu meitang reitachi nga nai khumi cheng kalen awm rai na a?

⁹Nangchi ly atyp u! Nangmychi kypkyp my niu nai ngiereichi ai, nangchi heng nai ryrei tami y ai nai atyp u. Nangchi i chanauchi hawi katuchi teng y py thui pi u.

¹⁰Sinai mawi[4]y nangchi i ARENG Tameuh i mo y nangchi tym u nai thym khala, mymy ly kai teng y, ‘Mipuichi ai kachu u. Kai i leu pei nai ngiereichi tangai hai. Huna khala naini nichi heng nai sala ryrei ly kai ai jei naimy tahm khai u ai,’ nanai kai ai leu pei naichi ai, nangchi i katu chanauchi teng y patiu pi.”

¹¹“Nangchi ly tamai kaveng my khiu iy, kani mang khrairei mai kadeu sau nai mawi kheutangra ahihawi naimy angdo u nai ai py,

¹²nangchi ly ARENG i mo-cha niu y i py, mai theung i dengdairei mymy i leu pei nai raawi thai u nai ai py, cho chanauchi teng y thui pi.

¹³ARENG my nangchi hawi asa nai Leu Maikawm, napi nai Leu sai Horei pei nai tangai ai nai tla, nanai leu pei bo. Huni leu pei naichi ai lengseaung phei nyhreira y tajiu pi nai ne.

¹⁴Nangchi atiu iy peang ai nai pri y nangchi teaung patawm ai nai reita bawibawichi ly nangchi ai patiu pi ai nai ARENG my kai teng y ang thui pi bo.

¹⁵“ARENG ly Sinai mawi saleung y mai kangveaung dengdairei nangchi teng y leu ang pei nai khala, nangchi ly mymy i mo-cha niu u y leang.

¹⁶Hunai deaungkho y neampacho, ti y baly neampachy mo-cha,

¹⁷tawnbawi, ti y baly tavo myn, ava nai tawnbawi, ti y baly ngo myn hawi atawm nai

¹⁸myn sa iy kamngo so y ai nai hawihai palai adawn patyp u.

¹⁹Kani mang y nangchi i niu nai kanito, lo hawi ka-si taukichi ka-tawm myn sa iy, chiu y ai nai atyp u. Achi i ARENG Tameuh ly cheng takhra khumichi ai huni mynchi chiu ai nai pei nai ne.

²⁰Na i py nangchi ly tamang mai kangveaung kamta lawm nai Aikupta pri i dengdairei ARENG my pahawi nai khumichi ne. Mymy i khumichi lawm ai nai nangchi ai pahawi bo. Hunai deaungkho y nangchi ly mymy i khumichi lawm iy, vaini khrairei khaw jo nai ne.

²¹Achi i ARENG Tameuh ly nangchi molam y kai ai kado theu hai i, kai ai Jordan tavo angpeang hai iy nangchi ai pei nai paitiu khuta hawi nai pri y kun ai nai pei y, nanai leu ang pei patyp bo.

²²Kai ly hini meingtym y kadei ai. Jordan tavo angpeang ai nai ngo y leang bo; na i py nangchi ly tavo angpeang iy paitiu khuta hawi nai pri peang u ai mang.

²³Nangchi i ARENG Tameuh my nangchi hawi asa nai Leu Maikawm ai ly pany jo ba. Mymy i leu phai tangai u, nangchi i vui y takhra mynchi so u moh.

²⁴Ati mana nai mo na baly nangchi i ARENG Tameuh ly mai kangveaung hawi atawm nai Tameuh, tameuh takhrachi ai niu ngai y nai ne.

²⁵“Nangchi ly huni pri y kra parai pa-rei awm ai i, katu chanauchi nga nai pa-rei ARENG i tlang tleaung y kamngo so u y ai nai myn sa iy, chiu u moh. Myn chiu nai ly ARENG i mei ka-niu y kamngo tla i, mymy ai kado theu hai ai nai sa nai ne.

²⁶Huna nai tamang u baly nangchi cheng ly huni pri i nai kra y naimy tama vui ai, nanai kai ly kani hawi khaileaung ai tau iy vaineng abeu bo. Nangchi Jordan tavo angpeang iy peang vui ai nai pri y kra parai pa-rei awm ai nai ngo y naimy, cheng verei tama vui ai.

²⁷ARENG ly nangchi ai pri tleirei y ahei hai ai; huni pri y nangchi i khumi maidenreichy naini heng u ai.

²⁸Huna nai khala nangchi ly khumi i kiu hawi sa iy, mei niu y nai, kano thai y nai, cho thai y nai, mui py thai y nai dengkeaung tameuh, lengseaung tameuhchi ai chiu u ai.

²⁹Hu y nangchi ly nangmychi i ARENG Tameuh ai kadeaung u ai. Nangchi i paleung phailo verei hawi hau u baly, mymy ai avum u ai.

³⁰Nangchi ly ngari kamtang avum iy, huna naichi tym nai khala, ARENG teng y ahihawi ai i, mymy i leu pei naichi tangai u ai.

³¹ARENG ly pahen parai nai Tameuh ne. Mymy ly nangchi ai khai su y ai i, tama py tama hai vui ai ny y. Mymy ly nangchi i amsi pajochi hawi asa nai Leu Maikawm ai py tami pi ai ny y.

³²“Tameuh ly khaileaung salo y khumi ai sa nai neng khala i ka-so, nangchi ai tapen y rai nai neng sala, hini khaileaung pri verei y hinatan pa-rei lyh ai awm naichi tym vai a? Khaileaung pri verei y hau cham rai. Hina nai kamta atiti satangchi ami thai vai mo?

³³Mai theung mang dengdairei Tameuh i raawi nangchi thai nai kamta nichi thai iy, hengra nga vai nai takhra khumi cheng awm a?

³⁴Nangchi i ARENG Tameuh ly Aikupta chengchi kiu i atleu iy, mymy i khumi palawn naimy pahawi bo. Tameuh takhra ly khumi cheng harei i vui, huna nai kamta sa pi vai sai a? ARENG ly mymy i len parai nai sa thai naira patei nai, ka-jeira hawi tavai takai tym hai nai, rengrang ka-ma-rachi hawi lyh ai hawi nairachi sa pi nai, hunichi ai nangmychi kypkyp my niu u bo.

³⁵ARENG naini Tameuh ne, nanai, tameuh takhra by y, nanai, hunichi hawimy nangchi ai pany hai bo.

³⁶Mymy ly nangchi teng y leu pei naichi thui pi ai nai, kani mang dengdairei mymy i raawi thai hai bo; khaileaung tleaung y nangchi ly mymy i khai takhra nai mai kangveaung niu hai iy, huni mai theung mang my nangchi ai leu ang pei nai ne.

³⁷Ati mana nai mo na baly mymy ly nangchi i amsi pajochi ai tamen nai deaungkho y nangchi ai vawi takhra nai ne; naibaly mymy i sa thai naira hawimy nangchi ai Aikupta pri i dengdairei ang pahawi bo.

³⁸Vai nangchi amtym ai nai pri y peang pajau ai nai, nangchi i tako nai lam y awm nai, nangchi tleaung y atho awm nai khumi chengchi ai patheu pi pawn bo.

³⁹Hunai deaungkho y ARENG ly kani hawi khaileaung salo i Tameuh ne. Tameuh takhra by y leang, nanai py pany u jo ba.

⁴⁰Vaini nangchi teng y kaimy kang pei nai reita bawibawichi tangai u baly, nangchi hawi nangchi i kangpreangchi ly nang chawn u ai. Nangchi py ARENG Tameuh my nangchi amtym jojo ai nai pei nai pri y deungtasarei awm ai nai nga u ai,” napi.

⁴¹Naibaly khumi leaungrei ly mymy i paleung ka-e ny y nai khumi ai, athang khai y naimy padei vui nai khala abyh pajau nai mary thomrei Mosi my Jordan tavo nisi mang y khai pi nai ne.

⁴²Huni khumi ly huni marychi theung i mary harei mang y preang iy abyh baly, dei y naimy tleaung ai.

⁴³Ruben theaung i vui mawi aheung khutaha meingtym Bezera mary ai py, Kad theaung i vui Kilead pri i Ramoth mary ai py; naibaly Manase theaung i vui Bashan pri i Kolan mary ai py, abyhra marychi palawn pi nai ne.

⁴⁴Mosi ly Tameuh i reita leuchi Israela khumichi teng y pei pi bo.

⁴⁵Ni ly Aikupta pri i dengdairei theu nai bo y, Jordan tavo nisi ngan Bethpeora mary kangka i leaunghawi y tym u nai thym khala, Mosi my reitachi pei pi nai ne. Huni meingtym ly Hesabon mary y peang nai keung Amori samrang Sihon i khu ka-peang lawm bo. Mosi hawi Israela chengchi ly Aikupta pri i dengdairei theu chum nai bo y samrang ai tiu i pajau vui nai ne.

⁴⁶

⁴⁷Ni i pri ai py, Jordan tavo nisi mang y peang nai takhra Amori samrang ai py, Bashan samrang Oka i pri ai py, peang vui nai ne.

⁴⁸Israela chengchi my peang nai khu ka-peang ly Arnon tavo peang i Aroer mary dengdairei, Heramon mawi napi nai Sirion[5]mawi khrairei kau nai ne.

⁴⁹Huni khu ka-peang theung y Jordan tavo nisi mang i meingtym bawibawi kup; huni meingtym ly tokalawi mang pangli kadei khrairei, nisi mang Piska mawi kheutang khrairei kau nai ne.