Read Khumi Chin Leu Thui Nai 5 Bible Online

Leu Thui Nai 5 - Khumi Chin bible

Leu Thui Nai 5

¹Mosi ly Israela cheng bawibawichi ai palau achu iy nichi teng y, “Israela khumichi awi, vaini nangchi teng y kaimy kang pei nai reita bawibawichi tangai u. Huni reitachi tangai ai nai dawn u patyp.

²Achi i ARENG Tameuh ly Sinai mawi salo y achi hawi Leu Maikawm asa nai ne.

³ARENG ly achi i amsi pajochi hawi naini Leu Maikawm asa nai khyh ny y. Vaini heng nai achi bawibawi hawi py Leu Maikawm asa nai ne.

⁴ARENG ly mawi saleung y mai kangveaung dengdairei, nangchi hawi mo atha iy leu pei bo.

⁵Nangchi ly mai jei nai deaungkho y, mawi saleung y lyn vam y i, kai ly ARENG hawi nangchi sala y angdo iy, mymy i leu pei naichi nangchi teng y kang thui pi bo. “ARENG my ang thui pi nai ly

⁶‘Kai ly nangchi ai Aikupta pri miseaung i nai atleu pi nai, nangchi i ARENG Tameuh ne.’

⁷“ ‘Kai ny y baly tameuh takhra ai chiu moh.’

⁸“ ‘Kani mang py, khaileaung salo y py, khaileaung anui tui theung y py, awm naichi ka-tawm mynchi ai chiu ai nai myn so moh.

⁹Huni mynchi ai lu meung u moh, chiu py chiu u moh; ati mana nai mo na baly kai ly nangchi i ARENG Tameuh ne iy, takhra tameuhchi ai niu ngai y nai Tameuh ne. Kai ai niu ngai y naichi i tlang tleaung y py, nichi i kangpreangchi teng y py deungthom deng palyh khrairei pajeng naira katym hai ai.

¹⁰Na i py kai ai tamen iy kai i reitachi tangai nai khumichi teng y ly deung kangthau sang meaungkateaung khrairei, kai i tamen nai sai kapatei pi jojo ai.

¹¹“ ‘Nang i ARENG Tameuh ly mymy i amyn teaung rumrang nai khumi ai ly pajeng ai nai deaungkho y, mymy i amyn ai angen atyhtyh moh.

¹²“ ‘Nangchi i Tameuh, Kai ARENG my leu pei nai kamta, Anawn kani y ja iy huni kani ai kai i vui kachai khai takhra u.

¹³Kani tariurei sala y kalop sa ai nai tla.

¹⁴Na i py saryh kani ly kai i vui au patyp nai Anawn kani ne. Huni kani y ly nang hawi nang i cho chanauchi py, nang i miseaungchi py, nang i tawnbawichi py, nangchi pri theung y awm nai cheng takhra khumichi py kalop sa ai nai tlo y. Nangchi i miseaungchi ly nangchi kamta anawn ai nai tla.

¹⁵Nangchi ly Aikupta pri y miseaung y awm vai nai py, nangchi i ARENG Tameuh ly nangchi ai mymy i sa thai naira hawi atleu nai py pany u jo ba. Huni molam y kai ly nangchi ai Anawn kani ja ai nai leu pei nai ne.

¹⁶“ ‘Nangchi teng ARENG my pei nai pri y nangchi nang chawn iy, heng sau thai ai nai, nangchi i ARENG Tameuh my leu pei nai kamta, ngamhm ngampo ai tahm khai u.

¹⁷“ ‘Khumi ai padei moh.

¹⁸“ ‘Pajang so moh.

¹⁹“ ‘Paviu moh.

²⁰“ ‘Ami ai py ka-chawi naimy seu moh.

²¹“ ‘Ami i aju, yhm, khaileaung, miseaung, si, keaungngo kano kasau hawi, ni i atiti py paleung no moh’ napi.

²²“ARENG ly mawi sahawi y akachu u nai nangchi bawibawi teng y leu ang pei nai ne. Mymy ly mai kangveaung hawi vengpam nai tamai theaung mang dengdairei tao pajeng parai naimy, hini reitachi ang pei bo, leu ang pei bi nai ny y. Naibaly ARENG ly reitachi ai lengseaung phei nyhrei tleaung y tajiu iy, kai teng y ang pei nai ne.

²³“Mawi verei mai angveaung iy kaveng theung mang dengdairei leu pei nai raawi nangchi thai u nai khala, nangchi i luchi hawi cheng theaung miteaung kehchi ly kai teng ang jeu u iy,

²⁴‘Achi i ARENG Tameuh i raawi mai kangveaung theung mang dengdairei achi thai nai deaungkho y, mymy ly mymy i phum-ang hawi nang parai nai sai patei pi bo. Tameuh my khumichi teng y leu thui pi i py, khumichi ly dei y naimy heng pajau nai sai vaini achimy niu u bo.

²⁵Na i py achi ly ati mana nai dei bi ai mo? Huni ka-jei awm nai mai ly achi ai taphra ai. Achi i ARENG Tameuh i raawi thai bi baly, achi ly dei takengkei ai.

²⁶Tameuh kang heng i raawi mai kangveaung theung mang dengdairei thai nai bo y, achi kamta heng nai khumi awm vai a?

²⁷Mosi awi, nangmy naini chei iy achi i ARENG Tameuh my leu ang pei nai ngierei tangai ly, kaichi teng y amti pi. Hunaibaly kaichi ly leu pei nai tangai ai,’ napi u bo.

²⁸“ARENG ly nangchi my huna nai kamta takeng nai thai baly mymy ly kai teng y, ‘Kai ly hini khumichi i takeng nai raawi kathai bo, nichi i thui naichi ly teng khyp.

²⁹Nichi ly hina nai kamta kai ai Jei kaji naimy tahm khai u iy, kai i leu pei nai bawibawichi tangai u ai na baly, nichi hawi nichi i kangpreangchi ly ati cheaungkhangra y hawi naira nga u ai.

³⁰Vai nichi ly mychi i tai naira mang y vawi u teang ai nai thui pi.

³¹Na i py Mosi awi, nang ly kai hawi vanrei hi y awm jo rai; kaimy pei ai nai pri y nichi teaung patawm ai nai reitachi hawi leu pei nai ngiereichi nang teng y kang thui pi ai. Huni reitachi hawi leu pei naichi ly nichi teng y patiu pi,’ napi.

³²“Israela chengchi awi, nangchi i ARENG Tameuh my nangchi teng y leu pei nai ngiereichi so patawm u; mani reitachi py taphra u moh.

³³Nangchi peang ai nai pri y tlamsa naimy awm u jojo pajau ai nai, hini leu pei nai bawibawichi tanga iy so patawm u.