Read Khumi Chin Leu Thui Nai 6 Bible Online

Leu Thui Nai 6 - Khumi Chin bible

Leu Thui Nai 6

¹“Hini ly nangchi ai patiu pi ai nai nangchi i ARENG Tameuh my kai tang y ang pei nai reita leu pei nai bawibawichi ne. Nangchi peang ai nai pri y hini reitachi tangai iy patawm u.

²Nangchi hawi nangchi i kangpreangchi ly heng nai sala ryrei, nangchi i ARENG Tameuh ai tahm khai ai nai tla. Nangchi ly huni pri y awm jojo pajau ai nai kaimy kang pei nai reita leu bawibawichi tangai iy patawm u.

³Aw Israela khumichi awi, huni reitachi tangai u ly patawm u! Huna nai sa baly amsi pajochi i ARENG Tameuh my adeu nai kamta, nangchi ly nang chawn iy haiho len nai khumi cheng lawm ai; paitiu khuta hawi nai pri y awm ai nai nga u ai.

⁴“Aw Israela chengchi awi! ARENG naini achi i ARENG Tameuh ne, nanai tami u moh.[6]

⁵Nangchi i ARENG Tameuh ai ly nangchi i paleung verei hawi, nangchi i phailo verei hawi, nangchi i atho bawibawi hawi tamen ai nai tla.

⁶Vaini nangchi teng y kang pei nai reitachi ly mana khala py tami u moh.

⁷Huni reitachi ly nangmychi i cho chanauchi teng y patiu pi ai nai tla. Nangchi yhm y awn nai khala py, khuleaung keung py, anawn khala py, kalop sa nai khala py, huni reitachi avaw avawrei dawn ryhpatyh jo ai nai tla.

⁸Nangchi ly huni leu reitachi pany jo ai nai, nangmychi i kiubanra py, lu katira py akawm u ai nai tla.

⁹Nangmychi i yhm katheu laibeaungchira py, apai pa-kho lukauchira py tajiu ai nai tla.

¹⁰“Nangchi i ARENG Tameuh ly nangchi i amsi pajo Abraham, Isaka hawi Jakob teng y adeu nai kamta, nangmychi my palum pacheang y nai sareaung hawi nai mary puichi, nangchi teng y ang pei ai.

¹¹Nangchi pateung achu y naimy yhmtheaung kahawichi angym nai yhmchi py, nangmychi tai y nai tuikanchi py, nangmychi ui y nai kreip akhochi hawi olive akhochi py, nangchi amtym u ai. ARENG my nangchi ai pahawi nai huni pri y tym iy, nangchi kajeu kawi pa-rei cha ai nai nga u nai khala,

¹²Aikupta pri miseaung i nai nangchi ai atleu nai keung ARENG ai tami y ai nai dawn u jo.

¹³Nangchi i ARENG Tameuh ai tahm khai u ly mymy ai phai chiu u; mymy i amyn y naini tau iy vaineng adeu u.

¹⁴Tameuh takhrachi ai chiu u moh. Nangchi tengpang sahawi y awm nai khumichi i tameuhchi ai py chiu u moh.

¹⁵Nangchi hawi vanrei awm nai nangchi i ARENG Tameuh ly tameuh takhrachi ai niu ngai y nai Tameuh ne. Hunai deaungkho y nangchi ly tameuh takhrachi ai chiu lawh baly, kado theu naira ly mai kamta angveaung iy, nangchi bawibawi ai tama hai be ai.

¹⁶Nangchi ly Massah meingtym y sa nai kamta ly nangchi i ARENG Tameuh ai ly cham u moh.

¹⁷Mymy i nangchi teng y reita leu pei nai bawibawichi ai nangchi ly tangai iy hawihai patawm u.

¹⁸Nangchi ly ARENG i mo y kateng hawi kahawichi sa baly, atitira py eaung ai. Nangchi i amsi pajochi teng y ARENG my adeu nai pa-tiu khuta hawi nai pri ai peang u pajau ai.

¹⁹Mymy i adeu nai kamta, nangchi i paleung ka-echi ai py ang patheu pi pawn vui ai.

²⁰“Vai mo mang y nangchi i cho chanauchi ly nangchi teng y, ‘Achi i ARENG Tameuh my hini reitachi tangai ai nai, ati mana nai deaungkho y pei mo?,’ nanai ang deng u baly,

²¹nichi teng y, ‘Achi ly Aikupta samrang teng y miseaung achei nai thym khala, ARENG my sa thai naira len parai nai hawimy achi ai atleu pi bo.

²²Mymy ly Aikupta chengchi teng py, nichi i samrang hawi bangtang bawibawichi teng py, rengrang ka-ma-rachi patei iy ka-jei awm nai patangrachi tym hai nai sai amychi i mei y niu u bo.

²³Achi i amsi pajochi teng y adeu nai kamta, achi ai Aikupta chengchi teng i nai law tleaung hai iy, hini pri y awm ai nai ang pahawi nai ne.

²⁴Naibaly achi i ARENG Tameuh ly reita bawibawichi patawm ai nai hawi mymy ai tahm khai ai nai py leu pei nai ne.

²⁵Achi ly hunai kamta patawm baly mymy ly achi i pri ai kry iy, paitiu khuta hawi hai ai. Achi ly Tameuh i leu pei nai ngiereichi ai hawihai palai patawm baly, ARENG ly achi ai ang kawn ai,’ napi.