Read Khumi Chin Leu Thui Nai 7 Bible Online

Leu Thui Nai 7 - Khumi Chin bible

Leu Thui Nai 7

¹Nangchi i ARENG Tameuh ly nangchi peang ai nai pri y nangchi ai pahawi nai khala, huni pri y awm yb nai khumi vuikanai nawi iy, haiho len nai Hiti cheng, Kirakashi cheng, Amori cheng, Kanan cheng, Perizi cheng, Hevit cheng hawi Jebusi cheng napi nai cheng saryhreichi ai paryh pi pawn ai.

²Nangchi i ARENG Tameuh ly hini khumichi ai nangchi i kiu y au iy, nichi ai nangchi my eaung nai khala, nichi bawibawi ai tamyh pawn ai nai tla. Nichi hawi amkawm moh ly nichi ai pahen py pahen moh.

³Nichi hawi vuinai alo moh; nangchi i chaniuchi ai py, nichi hawi apom hai moh;

⁴ati mana nai mo na baly nangchi i chaniuchi ly ARENG ai hi vui iy, tameuh takhrachi chiu ai nai, nichi my pahawi vui lawh na. Huna nai khala ARENG ly kado theu iy, tlenrei khyhmy nangchi ai tamyh pawn ryp ai.

⁵Hunai deaungkho y nichi i maichamchi taphra ai nai tla. Nichi i tameuh lengseaungchi ai panawi ai nai tla. Kani anglo Aser tameuh i mynchi py panawi ai nai tla. Nichi i mynchi py veang pawn ai nai tla.

⁶Nangchi i ARENG Tameuh ly nangchi ai peang nai deaungkho y, huna nai sa ai nai tla. Khaileaung pri y awm nai khumi cheaungkhangchi theung i nangchi ai, mymy i khumi y palawn ai nai ARENG my vawi patyp nai ne.”

⁷“Nangchi ly takhra khumi chengchi tleaung y vuikanai nawi nai deaungkho y, ARENG ly nangchi ai tamen iy ang vawi takhra nai ny y leang; nangchi ly khaileaung pri verei y khumi vuikanai di keh nai cheng ne.

⁸Na i py ARENG ly nangchi ai tamen iy, nangchi i amsi pajochi teng y leu ka-deu khaw hai ai ngai nai deaungkho y, Aikupta samrang teng y miseaung acheira i nai, sa thai naira len parai nai saho y nangchi ai atleu nai ne.

⁹Nangchi i ARENG Tameuh naini Tameuh tatang ne; mymy ly ka-ym awm nai keung ne, nanai pany u. ARENG ly mymy ai tamen iy leu pei naichi tangai nai khumichi ai, deung kangthau sang neangneang khrairei, mymy i Leu Maikawm khaw hai iy, nichi teng y tamen naira patei pi jojo ai.

¹⁰Na i py mymy ai niu ngai y nai khumichi teng y, mymy i pajeng naira ly patyh vai y leang.

¹¹Hunaibaly vai ly nangchi ai kang patiu pi nai reitachi patawm u; vaini kaimy kang pei nai reita leu bawibawichi tangai iy patawm u.

¹²“Nangchi ly hini leu pei naichi ai ka-ym awm parai naimy tangai u baly, nangchi i ARENG Tameuh my nangchi i amsi pajochi teng y adeu nai kamta, Leu Maikawm ai khaw hai jojo ai i, mymy i khaw parai nai tamen nai sai py patei ai.

¹³Mymy ly nangchi ai tamen iy amtheaungra pei nai deaungkho y, nangchi ly peung ai i, cho chanau neangneang sa u ai; mymy ly nangchi i li hlauchi ai amtheaung hai nai deaungkho y, amti amjang, kreip hang hawi olive asitui neangneang nga u ai Mymy ly nangchi ai amtheaung hai nai y, si, beram tawnbawichi py peung ai. Nangchi i amsi pajochi teng adeu nai pri y nangchi tym nai khala, huni amtheaung nairachi ang pei ai.

¹⁴Nangchi ly khaileaung pri i khumi cheng cheaungkhangchi tleaung y amtheaung naira nga ra ai. Nangchi theung y teng nai khumi, cho so y nai tawnbawichi awm ai ny y.

¹⁵ARENG ly nangchi ai noso cheaungkhang i nai alaw hai ai; Aikupta pri y nangchi niu nai no kanghawi avum ai ny y. Na i py nangchi i paleung ka-e ngiereichi ly no kanghawi man u ai.

¹⁶Nangchi i ARENG Tameuh my nangchi i kiu y au nai khumi ngiereichi ai nangchi ly tamyh pawn ai nai tla. Huni khumichi ai den py pahen moh, huni khumichi i tameuhchi ai chiu u moh, chiu u lawh baly nangchi ly dei u ai.

¹⁷“Huni khumichi ly achi tleaung y khumi vuikanai nawi nai deaungkho y, patheu pajau ai ny y, nanai thui u moh.

¹⁸Nichi ai jeu u moh; nangchi i ARENG Tameuh ly Aikupta samrang hawi ni i khumi bawibawichi ai ati mana pajeng moh, nanai pany u.

¹⁹Nangmychi kypkyp my niu nai no kanghawichi, rengrang ka-ma-rachi, nangchi ai law tleaung hai nai nangchi i ARENG Tameuh i sa thai naira len parai nai haiho pany u. Mymy ly Aikupta chengchi ai tama hai nai kamta, vai nangchi jei nai hini khumi cheng bawibawichi ai py tama hai ai.

²⁰Nangchi kiu i tleaung iy preang nai khumichi ai malawn py, no kanghawi[7]tym hai iy padei pawn ai.

²¹Hunai deaungkho y hini khumichi ai jei u moh. Nangchi i ARENG Tameuh ly nangchi hawi vanrei awm; mymy ly sa thai naira len iy ka-jei hawi nai Tameuh ne.

²²Mymy ly nangchi tako u nai thym y, huni khumi chengchi ai patheu pi dudu ai. Nangchi ly huni khumi bawibawichi ai vaimy patheu u praw ryp moh. Vaimy patheu baly daichi mawi ka-sichi peung ai i, nangchi ai ka-jeira avum hai ai.

²³ARENG ly nangchi i paleung ka-echi ai nangchi i kiu y au ai i, nichi ly ahei seaungkhrang iy kanghawi y myh u ai.

²⁴Mymy ly nichi i samrangchi ai nangchi i kiu y au ai. Nangchi ly huni samrangchi ai tamyh pawn nai deaungkho y, nichi i satang ly khumichi my tami u pawn ai. Mani paleung ka-echi my py, nangchi ai amtang pajau ai ny y. Nangchi ly paleung ka-e bawibawichi ai tamyh u ai.

²⁵Nichi i chiu nai mynchi ai mai y veang u pawn. Huni mynchira y ka-pu sa nai muku, tangkachi ai paleung no iy, nangmychi i vui lo u moh. ARENG ly myn y chiu naichi ai niu ngai y nai deaungkho y, mynchira i muku tangkachi la lawh baly nangchi i vui dei naira avum ai.

²⁶Huni mynchi ai nangmychi i yhm y syn u moh, syn lawh baly mynchi kamta nangchi py amsawi lawi u ai. Mynchi ly ARENG i amsawi lawi nai deaungkho y, mynchi ai jei paso ai nai tla.