Read Khumi Chin Leu Thui Nai 8 Bible Online

Leu Thui Nai 8 - Khumi Chin bible

Leu Thui Nai 8

¹ARENG my nangchi i amsi pajochi teng y pei ai adeu nai pri peang iy peung naimy heng u thai ai nai, vaini nangchi teng y kang pei nai reita bawibawichi ai ka-ym awm naimy atyp u.

²Nangchi i ARENG Tameuh ly law veng nai saneng vui palyhrei sala, nangchi ai pahawi iy daichi ka-vym tako hai prei bo. Huni thym khala nangchi ly reita leu pei naichi patawm ai nai ngai mo, ngai y mo, nanai cham ai nai nangchi teng y ngari kamtang cheaungkhang tym hai nai ly pany u.

³Mymy ly nangchi ai kajeu kanglam ang khai. Naibaly nangchi hawi nangchi i amsi pajochi cho vai y nai Manna tako ang pacho. Huna nai molam y khumi ly teicha cha naira y heng nai ny y leang, ARENG i leu y naini heng ai khyh, nanai nangchi ai kang thui pi nai ne.

⁴Huni saneng vui palyhrei sala y nangchi i baichu ateaungchi mawn vai y, nangchi i kheuchi py bau vai y.

⁵Ampo ly mymy i cho chanauchi ai parip nai kamta, nangchi i ARENG Tameuh my nangchi ai parip nai ly pany u jo ba.

⁶Hunai deaungkho y nangchi ai ARENG my leu pei nai kamta tangai u; mymy i reita leu pei naichi tangai iy mymy ai tahm khai u.

⁷Nangchi i ARENG Tameuh ly nangchi ai paitiu khuta hawi nai pri mang y pahawi nai ne. Huni pri i leaunghawi hawi, mawi aheungchira y tavochi, micheaungchi, khaileaung theung i tuino achawn hai bo.

⁸Huni pri i chohpui, chamaw, kreip athai, thaidu athai, thengsi athai, olive athai hawi khawihangchi theu nai ne.

⁹Huni pri y teicha teinei avaw by ai ny y. Ati sai py ngai nai awm ai ny y. Lengseaung mang tamo py, mawi aheungchi mang kheupaja kamsen py, tai baly nga ai.

¹⁰Nangchi ly teicha teinei kajeu kawi pa-rei cha ai nai nga nai deaungkho y, paitiu khuta hawi nai pri ang pei nai nangchi i ARENG Tameuh ai palo u ai.

¹¹“Nangchi i ARENG Tameuh ai tami y ai nai dawn patyp u; vaini nangchi teng y kang pei nai mymy i reitachi patawm ai nai tami u moh.

¹²Nangchi kajeu kawi pa-rei cha iy yhm hlau kahawichi sa naimy awm ai nai nga u nai khala,

¹³nangchi i sichi hawi beramchi, muku, tangka hawi yhmtheaung katuichi nang chawn nai khala py,

¹⁴nangchi ly amlyh am-e iy Aikupta pri miseaungra i nai atleu pi nai keung, nangchi i ARENG Tameuh ai tami y ai nai dawn u.

¹⁵Mymy ly nangchi ai pavui kangso hawi kani taaichi peung iy, kau parai nai hawi ka-jei awm nai daichi ka-vym jeungrei pahawi prei nai ne. Khaileaung jengha iy tui by y nai meingtym y, mymy ly lengseaung pui mang tui theu hai bo.

¹⁶Daichi ka-vym theung y nangchi i amsi pajochi cho vai y nai Manna tako ang pacho bo. Mymy ly kangkhym y nangchi amtheaungra nga u ai nai molam y, nangchi ai ngari kamtang avum hai bo. Huna nai ngari kamtang avum hai nai ly nangchi ai cham nai ne.

¹⁷Hunai deaungkho y nangchi i sa thai naira hawi yhmtheaung katuichi nang nai ne, nanai athang khai u moh.

¹⁸Nangchi i ARENG Tameuh my pei nai sa thai naira y naini yhmtheaung katuichi nang nai tei, nanai pany u. Huna nai sa thai naira ang pei nai ly mymy ly nangchi i amsi pajochi hawi asa nai leu Maikawm ai vaini khrairei, khaw hai nai deaungkho y ne.

¹⁹Nangchi i ARENG Tameuh ai tami vui iy, tameuh takhrachi ai chiu u moh. Huna nai sa lawh baly nangchi ly phra takengkei ai, nanai nangchi teng y vaini kang pany hai nai bo.

²⁰Nangchi ly ARENG i leu tangai u y lawh baly, nangchi tako nai khala nangchi ai paka nai khumichi ai ARENG my tama hai nai kamta ly nangchi ai py tama hai ai.