Read Khumi Chin Leu Thui Nai 9 Bible Online

Leu Thui Nai 9 - Khumi Chin bible

Leu Thui Nai 9

¹“Israela chengchi awi, tangai u! Vaini nangchi ly Jordan tavo vai angpeang iy, nangchi tleaung y nawi nai, sa thai naira atho awm nai khumi chengchi i pri peang u ai bo. Nichi i marychi ly len iy kani mang y angteu na pa-rei asang nai mary apaichi tapang nai ne.

²Huni khumichi ly jeng asang iy atho py awm; nichi tleungtlang len nai deaungkho y, ami py nichi i mo y kham pajau y nai ly nangchi thai u bo.

³Na i py nangchi i ARENG Tameuh ly nangchi i mo mang len parai nai mai kangveaung kamta tako nai ly nangmychi my vai niu u ai. Nangchi tako nai thym khala mymy ly nichi ai sum hai nai deaungkho y adeu yb nai kamta, nangchi ly huni khumichi ai patheu vui iy taphra u praw ryp pajau ai.

⁴“Nangchi i ARENG Tameuh ly nangchi mo y nichi ai patheu chum nai khala, huni pri ly nangchi hawi ataing nai deaungkho y nangchi ai pahawi iy, amtym ai nai pei nai ne, nanai athang khai u moh. Nichi i kamngo nai deaungkho y ARENG ly nichi ai patheu nai ne.

⁵Nangchi i hawi nai saichi deaungkho y ARENG my huni pri nangchi teng y ang pei nai ny y leang. Huni khumichi i kamngo nai molam py, nangchi i amsi pajo Abraham, Isaka, Jakobchi teng y adeu nai leu khaw hai ai nai aly ngai nai molam py, ARENG ly nichi ai patheu pawn ai.

⁶Nangchi hawi ataing nai deaungkho y paitiu khuta hawi nai pri nangchi ai ARENG my ang pei nai ny y, nanai pany u. Nangchi ly paleung tang nai cheng ne.

⁷“Nangchi ly daichi ka-vym theung y awm nai thym khala, nangmychi i ARENG Tameuh ai kado theu nai ly tami u moh. Nangchi ly Aikupta pri i nai theu nai kani dengdai, hini meingtym y tym nai kani khrairei mymy ai tiu u bo.

⁸Sinai mawi y my nangchi ly ARENG ai kado theu hai u nai ly nangchi ai tama hai vui ai nai pa-rei mymy ai kado theu hai u bo.

⁹ARENG hawi nangchi asa nai Leu Maikawm leu saichi tajiu nai lengseaung phei nyhrei la ai nai, kai ly mawi salo y lyn kalau nai ne. Mawi salo y kani vui palyhrei, ati sai py cho nei y naimy kaawm bo.

¹⁰Naibaly ARENG ly lengseaung phei nyhrei kai teng y ang pei. Huni lengseaung phei ly nangchi mawi kheutangra akachu u nai kani y, ARENG ly mai kangveaung theung mang dengdairei pei nai reitachi ai mymy i kiu hawi cha-mawi tajiu pi nai lengseaung phei ne.

¹¹Kani vui palyhrei bo y ARENG ly Leu Maikawm tajiu yb nai lengseaung phei nyhrei kai teng y ang pei bo.

¹²“Naibaly ARENG my kai teng y, “Aikupta pri i dengdairei nangmy pahawi nai nang i khumichi ly amso ngai naichi sa u nai deaungkho y mawi i nai vaimy ang vum kathiu jau. Nichi ly kai i leu pei nai ngiereichi khai su iy, mychi chiu ai nai myn sa u bo,’ napi.

¹³ARENG my kai ai ang thui pi bi nai ly “Hini khumichi ly paleung tang nai cheng ne.

¹⁴Amimi py nichi ai pany jo y ai nai kaimy nichi ai tamyh pawn ai i, kai ai kam moh. Naibaly kai ly nang ai nichi tleaung nawi iy sa thai naira awm nai khumi cheng i ampo lawm hai ai,’ napi.

¹⁵Hunai deaungkho y kai ly Leu Maikawm lengseaung phei nyhrei syn naimy, mawi i nai satla kathiu bo. Mawi i dengdairei mai kangveaung amsau na bo.

¹⁶Nangchi ly nangmychi i ARENG Tameuh my pei nai reitachi tangai y naimy, nangchi chiu ai nai si cho myn sa u nai deaungkho y, ARENG ai hi u vui bo, nanai kai ly niu nai ne.

¹⁷Hunai deaungkho y kai ly nangchi i mo y lengseaung phei nyhrei ai ly aphi su i, kawi phro veng bo.

¹⁸Nangchi ly ARENG ai hi vui iy kado theu hai nai deaungkho y, kai ly kani vui palyhrei ati sai py cho nei y naimy khaileaung y ambeu iy kachiu bi nai ne.

¹⁹ARENG my nangchi ai tama hai vui ai nai pa-rei kado theu nai y, kai ly jei parai nai ne; na i py ARENG my kai i hnei takeng nai tangai pi bi bo.

²⁰ARENG ly Aron ai padei vui ai nai pa-rei kado theu hai bo. Hunai deaungkho y kai ly Aron i vui py hnei takeng pi.

²¹Kai ly nangchi ai kamngo tym hai nai si cho myn ai mai theung y aphi vui bo. Naibaly si cho myn ai deih lawn pa-rei dengpiu iy, huni deih ai ly mawi mang leaung kathiu nai tavo micheaung tui y adi vui nai ne.

²²“Nangchi py Tabera meingtym, Massah meingtym, Kibroth Hatava meingtym y awm nai thym khala py, ARENG Tameuh ai kado theu hai u bo.

²³ARENG my pei nai pri y tiu iy peang vui ai nai, nangchi ai Kadesa Banea i nai ang pato nai khala y py, nangchi ly mymy ai tiu u lawh; mymy ai ym y i, mymy i leu py tangai u y.

²⁴Nangchi ly kaimy pany angchei khyp khala i dengdairei, ARENG ai tiu naichi ne.

²⁵“ARENG ly nangchi ai tamyh pawn ai nai deaungkho y, kai ly kani vui palyhrei mymy i mo y ambeu naimy chiu kasa bo.

²⁶Naibaly kai i chiu sa nai ly ‘Sa thai naira awm nai ARENG, nang i sa thai naira atho hawimy Aikupta pri i dengdairei pahawi nai, nangmy i khumichi ai tamyh moh kyh.

²⁷Nang i Abraham, Isaka hawi Jakobchi ai pany pi iy, hini khumichi i paleung tang nai, khumi aso y nai, kamngo naichi ai pahen pi kyh ba.

²⁸Hu ti y lawh baly Aikupta chengchi my, nang ly nichi ai adeu pi nai pri y pahawi pajau nai ny y, nanai thui u ai. Nang ly nangmy i khumichi ai niu ngai y nai deaungkho y, padei pawn ai nai daichi ka-vym theung y pahawi nai ne, nanai py thui u ai.

²⁹Meitang khyp, nichi ly nang i vawi nai khumichi ne iy, Aikupta pri i dengdairei, nangmy i sa thai naira len parai nai hawimy pahawi nai khumichi ne,’ nanai hnei takeng pi bo,” napi.