Read Khumi Chin JOHAN 1 Bible Online

JOHAN 1 - Khumi Chin bible

JOHAN 1

¹Angchei y ly Leu awm i, Leu ly Tameuh teng y awm, naibaly Leu ly Tameuh ne.

³Ati cheaungkhang bawibawi ai ly mymy i saho y sa nai ne: naibaly atiti sa nai bawibawi ai ly mymy ny y naimy sa nai ha py by y.

⁴Mymy y ly heng naira awm i, huni heng naira ly khumichi i kangvang ne.

⁵Naibaly kangvang ly kaveng theung y angvang iy, kaveng my ly huni ai pany y.

⁶Tameuh i pato nai khumi leaungrei awm, amyn ly Johan ne.

⁷Huni kangvang pany hai iy mymy deaungkho y khumi bawibawichi my ym thai ai nai, mymy ly pany hai ai nai ang jeu.

⁸Ni ly huni kangvang ny y leang, huni kangvang pany hai ai nai ang jeu nai teu.

⁹Khumi bawibawi angvang hai nai kangvang tatang ly khaileaung pri y ang jeu bo.

¹⁰Ni ly khaileaung pri y awm i, khaileaung pri ly mymy i sa nai ne, na i py khaileaung pri ly mymy ai pany y.

¹¹Mymy i khumichi teng y ang jeu i, mymy i khumichi ly ni ai kawn y.

¹²Na i py mymy ai kawn iy, mymy i amyn y ym nai ngiereichi ai ly Tameuh i chanau lawn thai ai nai ang pei;

¹³nichi ly thi i tapen nai py ny y, tlang i kangai y tapen nai py ny y, khumi i kangai y tapen nai py ny y, Tameuh i tapen nai teu.

¹⁴Naibaly Leu ly ngan lawn i, pahen naira hawi leu meitang hawi kawi iy, achi teng y awm bo: Ampo i Chapo leaungrei awm khyh nai nang parai nai sai kamta, achi ly mymy i nang parai nai sai niu bo.

¹⁵Johan ly ni i satang pany hai i, “Kai bo y tym nai ly kai ai katlen veng bo, ni ly kai i mo y awm angchi nai deaungkho y na a,’ nanai ni i satang kai thui nai ly mymy ne he,” nanai aeu.

¹⁶Mymy i angym naira ly achi ly nga bawibawi i, pahen nai tleaung y pahenra nga pateang bi bo.

¹⁷Ati mana nai mo nabaly Mosi i saho y Reita ang pei bo; na i py pahenra hawi leu meitang py Isu Krista i saho y tym.

¹⁸Ami py mana khala y py Tameuh ai niu vai y; Chapo leaungrei awm khyh nai, Ampo teng y awm khyp nai my ly ni i satang thai hai bo.

¹⁹Naibaly Judachi ly, “Nang ly ami mo?” nanai deng ai nai Jerusalem avang i dengdairei ni teng y pathyp pi nai keungchi hawi Levi chengchi ai pato khala y Johan i pany hai nai leu ly hini ne he.

²⁰Mymy ly apha y i, “Kai ly Krista ny y leang,” nanai thai hai.

²¹Naibaly nichi ly mymy teng y, “Ami naibaly? Elija a?” nanai deng bi. Naibaly ni my ly, “Ny y leang,” nanai pathang bi. Nichi my teang, “Huni amo a?” nanai deng taleang bi. Ni my ly, “Ny y leang,” nanai pathang taleang bi.

²²Hunaibaly nichi ly mymy teng y “Nang ly ami mo? Kaichi ai pato nai keungchi teng y pathang thai ai nai thui pi bei. Nang ly nangmy ai ami napi mo?” napi.

²³Naibaly ni my ly, “Amo Isaia i thui pi nai kamta, ‘Areng i lam pataw u,’ nanai daichi ka-vym y aeu nai keung i raawi ne kai ly,” napi.

²⁴Khumi pato naichi ly Pharisaichi teng i nai ne.

²⁵Naibaly nichi my ly ni teng y, “Nang ly Krista khy ny y, Elija kyh ny y, Amo kyh ny y bi baly, ati mana nai baptis sa lawh be?” nanai deng bi.

²⁶Naibaly Johan my nichi teng y, “Kai ly tui y baptis sa nai teu; nangchi i pany y nai khumi leaungrei ly nangchi theung y angdo nai ne;

²⁷ni ly kai bo y tym nai keung ne, kai ly ni i phainai vui su ai nai py ataing y leang,” nanai pathang.

²⁸Huni atitichi ly Johan i baptis sa naira y Jordan vai Bethani avang y amcheang nai ne.

²⁹Naibaly mymy ly khawn mang y Isu ai ni teng y jeu ai tau nai niu i, “Khen cham, Tameuh i Beram Cho, khaileaung pri i kamngo la pi veng nai keung ho!

³⁰Khumi leaungrei kai bo y tym nai ly, kai i mo y awm angchi nai deaungkho y kai ai katlen veng bo,’ nanai kai i thui nai ly huni ne ho.

³¹Kai ly mymy ai pany y lawh, na i py mymy ai ly Israelachi teng y amteng hai thai ai nai tui y baptis sa naimy kang jeu,” napi.

³²Naibaly Johan my leu pany hai i, “Phailo ly buhu ka-tawm kani pri mang i dengdairei kathiu iy, ni i tlang tleaung y chym nai kaniu.

³³Kai ly mymy ai pany y, na i py tui y baptis sa ai nai kai ai pato nai keung ly kai teng y, ‘Phailo ly ami i tlang tleaung y kathiu iy chym nai nang niu nai ngierei ly, mymy kypkyp ly Phailo Kachai y baptis sa ai nai keung ne ai,’ ang napi.

³⁴Kai ly niu bo, naibaly hini ly Tameuh i Chapo ne, nanai kapany hai bo,” napi.

³⁵Naibaly pa-nyh kani ly Johan hawi ni teng y abang nai leaung nyhrei ly angdo nai ne.

³⁶Naibaly mymy ly Isu aleaung nai thym khala y khen i, “Khen cham, Tameuh i Beram Cho ho! napi.

³⁷Naibaly abang nai leaung nyhrei ly ni i leu thui nai thai i, Isu teng y abang hawi.

³⁸Isu ly hi iy nini abang hawi nai niu i nini teng y, “Ati hau hawi?” napi. Naibaly nini my ly, “Rabbi (huni ly Sara nanai sai ne,) nang ly manira y awm mo?” napi.

³⁹Mymy ly nini teng y, “Jeu hawi, niu namang,” napi. Hunaibaly nini ly chei hawi i ni i awm naira niu hawi iy, dym biu theaung neng awm i huni kani ly ni teng y awm.

⁴⁰Johan i leu thui nai thai iy Isu teng y abang nai leaung nyhrei theung i leaungrei ly Andria, Simon Petera i amnau ne.

⁴¹Ni my ly ni i amjo Simon ai hau manme i ni teng y “Kaini ly Messia ai niu bo,” napi; (huni ly Krista nanai sai ne.)

⁴²Mymy ly ni ai Isu teng y hawi i, Isu my ni ai khen iy, “Nang ly Johan i chapo Simon ne; Kipha ang pathi ai,” napi; (huni ly Petera nanai sai ne.)

⁴³Naibaly khawn mang y Isu ly Kalili pri y chei ai nai tau iy, Philipa ai niu i ni teng y, “Kai teng y abang,” napi.

⁴⁴Philipa ly Bethsaida avang i khumi ne, huni ly Andria nini Petera i awm nai avang teang.

⁴⁵Philipa ly Nathanaela ai hau i ni teng y, “Ni i satang Mosi my Reita cha-iu y hawi, amochi my tajiu nai py kaichi niu bo, Nazaret Isu, Josepha i chapo ai ly,” napi.

⁴⁶Naibaly Nathanaela my ni teng y, “Nazaret avang i dengdairei atiti kahawi theu thai a?” napi. Philipa my ni teng y, “Jeu ly, khen cham,” napi.

⁴⁷Isu ly Nathanaela ni teng y jeu ai tau nai niu i, “Khen cham, Israela khumi meitang, tapawp nai paleung den py by y nai ho,” nanai ni i satang thui pi.

⁴⁸Nathanela my ly ni teng y, “Nang ly kai ai mana pany mo?” napi. Isu my ni teng y, “Philipa ly nang ai palau y rai kha y nang thaidu keung anui y awm khala kang niu bo,” nanai pathang.

⁴⁹Nathanaela my ni teng y, “Rabbi, nang ly Tameuh i Chapo ne, nang ly Israelachi i Samrang ne,” nanai pathang.

⁵⁰Isu my ni teng y, Thaidu keung anui y kang niu bo, kang napi nai deaungkho y ym nai teu lo-oh? Hini tleaung y atiti aly len keh nai nang niu ai mang,” nanai pathang.

⁵¹Naibaly Isu my ni teng y, “Meitang khypkhyp kang thui pi, kani am-eaung iy Tameuh i kani pri i amtaw thau naichi Khumi i Chapo i tlang tleaung y kathui kalau nai py niu u ai,” napi.