Read Khumi Chin JOHAN 10 Bible Online

JOHAN 10 - Khumi Chin bible

JOHAN 10

¹“Meitang khypkhyp kang thui pi, ami py beram hai y katheu pa-kho mang kun y naimy, takhra mang lyn iy kun nai ly mymy kypkyp ly kangviu khumi hawi damra teu.

²Na i py katheu pa-kho mang kun nai khumi ly beram typ nai keung ne.

³Katheu pa-kho typ nai keung ly ni ai paeaung pi i, beramchi ly ni i raawi thai, naibaly ni ly mymy i beramchi ai amyn palau iy angam mang y pahawi.

⁴Mymy i bawibawi ang patheu pajau baly mo mang y pahawi i, beramchi ly ni i raawi pany nai deaungkho y ni teng y abang u.

⁵Nichi ly khumi takhrachi i raawi pany y nai deaungkho y khumi takhra teng y ly abang y ai i, angpreng pawn veng ai,” napi.

⁶Isu my ly huni pata nai leu ly nichi teng y thui pi, na i py mymy i nichi teng y thui pi nai ly ati mo, nanai pany u thai y.

⁷Hunaibaly Isu my nichi teng y thui bi i, “Meitang khypkhyp kang thui pi, kai ly beram katheu pa-kho ne.

⁸Kai i mo y jeu naichi bawibawi ly kangviuchi hawi damrachi sasa; na i py beramchi my ly nichi i leu tangai y.

⁹Kai ly katheu pa-kho ne: ami py kai i saho y kun baly lawi hai ai, naibaly ni ly kun py kun, theu py theu ai i teicha tlai ai naira nga ai.

¹⁰Paviu nai khumi ly paviu ai nai hawi, padei ai nai hawi, taphra ai nai ny y baly jeu y leang; kai naini nichi hengra nga thai ai nai, nga tleaung nga ra thai ai nai kang jeu bo.

¹¹Kai ly beram typ nai keung kahawi ne; beram typ nai keung kahawi ly beramchi i vui mymy i hengra patlaw pi.

¹²Tham nai khumi, beram typ nai keung tatang ny y nai ly beramchi mymy i ny y nai deaungkho y, kasui jeu nai khala beramchi ai khai su iy angpreng veng; naibaly kasui ly beramchi ai kei iy ahei hai.

¹³Mymy ly tham nai khumi ne nai deaungkho y beramchi ai dawn hai y i angpreng veng.

¹⁴Kai ly beram typ nai keung kahawi ne.

¹⁵Ampo my kai ai pany nai kamta hawi, kai ly Ampo ai pany nai kamta py, kaimy i ly kaimy pany, kaimy i py kai ai pany teang; naibaly beramchi i vui ly kaimy i hengra kapatlaw pi.

¹⁶Naibaly hini hai theung i ny y naimy, kai i beram takhrachi py awm rai; nichi ai py kaimy pahawi ai nai tla, kai i raawi py nichi thai u ai; hunaibaly kamkawm harei hawi typ nai keung leaungrei py awm ai.

¹⁷Kaimy i hengra la bi thai ai nai kapatlaw pi nai deaungkho y Ngaai my kai ai tamen.

¹⁸Ami py kai teng i nai lo pi y leang, kaimy ngaingai patlaw pi nai teu, Kai ly patlaw py patlaw pi thai, la py la bi thai. Hini leu pei nai ly Ngaai teng i nai kanga bo,” napi.

¹⁹Huni leu deaungkho y Judachi ly amprei u iy amkawm u takhra bo.

²⁰Nawi kyh naichi my ly, “Vawinam my nam nai pathu na a hi ly; ati mana nai ni i leu tangai mo?” napi.

²¹Kalangchi ly, “Hini ly vawinam my nam nai i leu thui nai ny y leang. Vawinam ly mei kamju ai angvang hai thai ai a?” napi.

²²Naibaly Jerusalem avang y Khai Takhra nai pawi awm: huni ly kaseih kha y.

²³Naibaly Isu ly achura yhm kalen pui Solomon i charai y aleaung i, Judachi ly ni i ahawi y jeu u iy ni teng y,

²⁴“Nang ly kaichi ai paleung bi hai ai nai mana tanrei kra ai rai mo? Nang ly Krista ne nabaly hawihai chai pyn naimy thui pi jau bei,” napi.

²⁵Naibaly Isu my nichi teng y, “Kang thui pi bo ly, nangchi ym y be; Ngaai i amyn y hini kai i atiti sa naichi ly kai i satang pany hai nai na a.

²⁶Na i py nangchi ly kai i beram theung i ny y nai deaungkho y ym u y ly.

²⁷Kai i beramchi ly kai i raawi thai, kai py nichi ai kapany, nichi py kai teng y abang u i,

²⁸kai ly nichi teng y deungtasarei hengra kapei; nichi ly deungtasa ryrei tamo y ai; ami py kai i kiu i nai ang lawm pi y leang.

²⁹Nichi ai kai teng y au nai keung Ngaai ly bawibawichi tleaung y len keh nai ne: ami py Ngaai i kiu i nai ang lawm pi thai y leang.

³⁰Kai hawi Ngaai hawi ly bomrei ne,” nanai pathang.

³¹Naibaly Judachi ly ni ai aphi ai nai lengseaung akhui u bi.

³²Naibaly Isu my nichi teng y, “Ampo teng i nai atiti kahawi sa naichi neangneang ly kang patei bo; huni atiti sa naichi theung y mani nai y mo kai ai lengseaung y aphi ai tau u nai ly?” nanai pathang.

³³Judachi my ni teng y, “Atiti sa nai kahawi deaungkho y nang ai lengseaung y aphi y leang; Tameuh ai thui tamawn naira y hawi, nang ly khumi na iy Tameuh amlawn nai deaungkho y teu,” nanai pathang.

³⁴Isu my nichi teng y, “Nangchi i Reita y, ‘Nangchi ly tameuhchi na a kang napi,’ nanai tajiu nai ny y a?

³⁵Tameuh i leu nga naichi ai malawn py tameuhchi napi baly (naibaly Tameuh i cha-iu leu sai ai taphra thai y leang)

³⁶‘Kai ly Tameuh i Chapo ne,’ kang napi nai deaungkho y, Ampo i khaileaung pri y pato nai hawi khai takhra nai keung teng y, ‘Nang ly Tameuh ai thui tamawn,’ na u lawh a?

³⁷Kai ly Ngaai i kalop sa nai ny y baly kai ai ym u moh.

³⁸Na i py kai ly sa nai ne baly, Ngaai ly kai teng y awm nanai hawi, kai ly Ngaai teng y awm, nanai py nangchi tangai iy pany thai ai nai, kai ai ym u y i py kai i atiti sa nai ly ym u,” nanai pathang.

³⁹Hunaibaly nichi ly mymy ai patiu ai nai hau bi, na i py mymy ly nichi i kiu i nai tleaung veng.

⁴⁰Naibaly mymy ly Johan i angchei khala i baptis sa naira Jordan vai mang y chei veng i, hu y awm jo.

⁴¹Naibaly khumi neangneangchi ly ni teng y chei i, “Johan ly atiti rengrang mang ly sai py so y leang; na i py hini khumi i satang Johan i thui nai ngierei ly teng parai he,” napi.

⁴²Naibaly hu y ly khumi neangneangchi ly mymy ai ym u bo.