Read Khumi Chin JOHAN 11 Bible Online

JOHAN 11 - Khumi Chin bible

JOHAN 11

¹Naibaly khumi leaungrei Lazara napi nai ly no bo; mymy ly Mari hawi ni i amjo Martha i awm nai avang Bethani khumi ne.

²Huni ly Areng ai rimui thi iy mymy i sam hawi Isu i kheu tamui pi nai Mari ne. No nai khumi Lazara ly mymy i ampro ne.

³Naibaly mymy i thuicho nini my Isu teng y, “Areng khen cham, nang i tamen nai ly no bo,” nanai leu taviu.

⁴Isu my huna nai thai i, “Tameuh i Chapo ly hini deuangkho y palo naira nga thai ai nai, hini no nai ly dei hai ai nai ny y leang, Tameuh ai palo ai nai no nai teu,” napi.

⁵Naibaly Isu my Martha ai hawi ni i amnau ai hawi, Lazara ai py tamen.

⁶Hunaibaly ni ly no nanai pany baly mymy i awm naira y kani nyhrei awm a sai.

⁷Naibaly huni bo y mymy ly abangnaichi teng y, “Judai pri y chei bi sina,” napi.

⁸Abangnaichi ly mymy teng y, “Rabbi, jangvai my Judachi ly nang ai lengseaung y aphi ai nai tau be; huna i py hu y ly chei bi ai rai a?” napi.

⁹Naibaly Isu my, “Kanirei y nari holai nyhrei by y a? Ami py kanithun y pavai baly, hini khaileaung pri i kangvang ang niu nai deaungkho y atlym vai y.

¹⁰Na i py ami py vum y pavai baly kangvang ly mymy teng y by y nai deaungkho y atlym reng,” nanai pathang.

¹¹Mymy ly huna nai kamta leu thui. Hunai bo y mymy ly nichi teng y, “Achi i ahawi Lazara ly i bo, palaw ai nai kai chei ai,” napi.

¹²Hunaibaly abangnaichi ly mymy teng y, “Areng, i baly hawi teang na chy,” napi.

¹³Isu ly ni i dei nai satang thui pi nai ne: na i py nichi ly anawn khala y i nai thui pi nai mi, nanai palawm.

¹⁴Hunaibaly Isu my hawihai chai pyn naimy nichi teng y, “Lazara ly dei bo.

¹⁵Naibaly nangchi ym thai ai nai kai ly hu y by y nai deaungkho y kang kawn hai; ne mang ly mymy teng y chei u sina,” napi.

¹⁶Naibaly Thoma, Diduma napi nai my ly abangnai ahawichi teng y, “Mymy hawi dei ai nai chei teang sina,” napi.

¹⁷Hunaibaly Isu tym Khala y ni ly angawm y kani palyhrei awm bo, nanai pany bo.

¹⁸Bethani avang ly Jerusalem avang ahawi y ne, hlau holai pangrei mo palo.

¹⁹Hunaibaly mymy i ampro dei nai deaungkho y nini ai awm hai nem ai nai, Judachi neangneang ly Mari nini Martha teng y tym bo.

²⁰Naibaly Martha my ly Isu ang jeu ai bo, nanai pany baly ni ai lamchung; na i py Mari ly yhm y ateh jo.

²¹Naibaly Martha my ly Isu teng y, “Areng, nang hi y awm i khyly kai i ampro dei ai ny y.

²²Vai py nang Tameuh teng y atiti hnei nai ngierei ly Tameuh my ang pei ai, nanai kai pany,” napi.

²³Isu my ni teng y, “Ngampro ly angthau teang ai,” napi.

²⁴Martha my ly ni teng y, “Kani kangkhym y angthau teang nai neng khala y ly angthau teang ai, nanai kai pany,” napi.

²⁵Isu my ni teng y, “Kai ly angthau teang naira hawi hengra py ne; ami py kai ai ym nai ly dei i py heng ai;

²⁶heng nai ngierei kai ai ym nai ly deungtasarei dei ai ny y; huni ly nang ym a?” napi.

²⁷Ni my ly mymy teng y, “Ym chy Areng: Krista, Tameuh i chapo, khaileaung pri y jeu ai nai ly nang ne, nanai kai ym,” napi.

²⁸Naibaly huni leu thui nai bo y mymy ly chei praw i, ni i amnau Mari ai ly kangviu y heang i, “Areng ly tym bo, ang palau na a,” napi.

²⁹Naibaly mymy ly huni satang thai baly angthau praw iy mymy teng y chei.

³⁰Isu ly avang y kun y rai, Martha my lamchung nai meingtym y awm jo rai.

³¹Naibaly yhm angtheung i mymy ai awm hai nem nai Judachi my ly Mari angthau praw iy theu nai niu baly, angawm y vo ai nai chei nai palawn i abang praw ryp.

³²Naibaly Mari my Isu i awm nai meingtym y tym iy niu baly, mymy i kheu keung y ambeu i mymy teng y, “Areng, nang hi y awm i khyly kai i ampro dei ai ny y,” napi.

³³Naibaly Isu my Mari i vo nai hawi ni teng y abang nai Judachi i vo nai ly niu khala y paleung theung y tangam iy paleung si i,

³⁴“mymy ai ly ma y khai mo?” napi. Mychi my ly ni teng y, “Areng, jeu ly, khen cham,” napi.

³⁵Isu ly vo bo. Naibaly Judachi my ly,

³⁶“Khen cham, Lazara ai ly mana tanrei ang tamen mo?” napi.

³⁷Na i py phyreichi ly, “Hini khumi mei kamju i mei angvang hai nai keung my ly hini khumi ai py dei hai y ai nai pajeu y a?” napi.

³⁸Naibaly Isu ly paleung theung y tangam bi i angawm y tym. Huni angawm ly tapiu ne, kho nai lengseaung harei awm.

³⁹Isu my, “Hini lengseaung ly kasyh u,” napi. Kadei i tuicho Martha my ly, “Areng, vai ly mui ai bo, dei nai kani palyhrei awm bo,” napi.

⁴⁰Isu my ni teng y, “Nang ym baly Tameuh i nang parai nai sai niu ai, nanai kang tapi y a?” napi.

⁴¹Hunaibaly lengseaung ly kasyh u, Naibaly Isu ly deangtheang i, “Ngaai, kai i leu nang tangai pi nai deaungkho y kai kawn parai ba.

⁴²Kai i leu nang tangai pi jojo, nanai kai pany; na i py nang my kai ai pato, nanai nichi pany thai ai nai ahawi y angdo nai khumi mipuichi deeaungkho y kathui nai teu,” napi.

⁴³Naibaly huni ka-tawn katheu nai bo y ni ly athorei my, “Lazara, theu jau,” napi nai aeu.

⁴⁴Naibaly kadei ly kiu kheuchi angawm kanih y bam naimy theu i, meimai py atamui nai kanih y bam nai ne. Isu my nichi teng y, “Su ly, patleaung u,” napi.

⁴⁵Hunaibaly Mari teng y chei nai Judachi theung i neng neangchi ly Isu i sa nai niu nai deaungkho y mymy ai ym u bo.

⁴⁶Na i py phyreichi ly Pharisaichi teng y chei u i, nichi teng y Isu i atiti sa nai ly thui pi.

⁴⁷Hunaibaly pathyp pi nai keung kalenchi hawi Pharisaichi ly tara chih nai keungchi ai palau achu i, “Achi mana sa ai mo?

⁴⁸Hini khumi ly atiti rengrang neangneang sa. Hinai kamta achi my khai jo baly khumi bawibawichi ly mymy ai ym ai, naibaly Romchi ang jeu ai i achi i meingtym hawi achi i cheng ang la pi pawn ai,” napi.

⁴⁹Naibaly nichi theung y khumi leaungrei Kaiapha ly huni saneng ly pathyp pi nai keung kalen kehra y awm i nichi teng y, “Nangchi ly ati sai py pany y.

⁵⁰Cheng jyn phra y ai nai khumi leaungrei khumichi i vui dei pi ai nai tla, nanai py nangchi dawn y,” napi.

⁵¹Huni leu ly mymy paseang ryry nai thui nai ny y leang; huni saneng ly ni ly pathyp pi nai keung kalen kehra y awm i, nichi i cheng jyn y Isu dei ai nai thui rym nai teu; hunichi i cheng jyn harei khyh py ny y leang.

⁵²Tameuh i chanau khaileaung pri y ahei nai bawibawichi ai ly kamkawm harei y pahawi achu ai nai py ne.

⁵³Hunaibaly huni kani dengdairei ni ai padei ai nai arum u bo.

⁵⁴Hunai deaungkho y Isu ly Judachi theung y ka-niura y pavai ali y i, hu i dengdairei daichi ka-vym ahawi i meingtym avang harei, Ephraim na naira y chei veng iy, abangnaichi hawi hu y awm neaung.

⁵⁵Naibaly Judachi i Katlen Vui nai pawi ly kasa bo; khumi neangneangchi ly apachai ai nai Katlen Vui nai pawi ny y rai kha y daichi dengdairei Jerusalem avang y chei kalau yb bo.

⁵⁶Nichi ly Isu ai hau iy achura yhm kalen pui y angdo nai tarawi y arum u i, “Mana dawn mo? Pawira y jeu y ai a?” na u.

⁵⁷Naibaly pathyp pi nai keung kalenchi hawi Pharisaichi ly mymy ai patiu thai ai nai, ami py ni i awm naira pany baly thui pi ai nai tla, nanai leu pei bo.