Read Khumi Chin JOHAN 12 Bible Online

JOHAN 12 - Khumi Chin bible

JOHAN 12

¹Naibaly Katlen vui nai pawi sa ai nai kani tariurei ngai rai i, Isu my kadeichi theung i nai pathau nai lazara i awm naira Bethani avang y tym.

²Naibaly hu y nichi ly dym mang y mymy i vui pawi sa; Martha ly biu an amsi, Lazara ly biu o hai nai keung leaungrei ne.

³Hunaibaly Mari ly spiknard rimui vang tang parai nai sie ka-hyhrei syn iy, Isu i kheu y paju i mymy i sam hawi ni i kheu y tamui pi; hunaibaly huni rimui kamui ly yhm kawi na.

⁴Na i py Iskariota Juda, abang nai leaungrei mymy ai patiu hai ai nai keung my ly.

⁵“Hini rimui ly ati mana nai pia vui pangrei nai tangka cho chungvai thomrei y jo iy, khumi kamawnchi teng y pei y lawh a?” napi.

⁶(Huni leu ly khumi kamawnchi ai dawn hai nai deaungkho y thui nai ny y leang; mymy ly paviu nai keung ne i, tangka sakheu kry iy theung y tangka khai nai ly la reng nai deaungkho y thui nai teu.)

⁷Naibaly Isu my, “Kai ai up ai nai kani i vui khai sy.

⁸Khumi kamawnchi ly nangchi teng y awm jo chy bo, kai naini nangchi teng y kang awm jojo ai nai ny y leang,” napi.

⁹Naibaly Isu ly hu y awm, nanai Juda khumi humchi my pany i, Isu ai niu ai nai aly ngai nai khyh py ny y, kadeichi theung i nai pathau nai Lazara ai khen ai nai tym u bo.

¹⁰Na i py pathyp pi nai keung kalenchi ly Lazara ai py padei ai nai arum u;

¹¹ati mana nai mo nabaly mymy deaungkho y Judachi neangneang theu pawn i, Isu ai ym u bo.

¹²Khawn mang y ly pawira y jeu nai khumi mipuichi neangneang ly Isu Jerusalem avang y chei ai, na nai pany i, lymlo syn nai ni ai lamchung ai nai theu u iy,

¹³“Tameuh my ni ai amtheaung hai sy, Areng i amyn y jeu nai Israelachi i Samrang ly taham hawi,” nanai aeu.

¹⁴Naibaly Isu ly keaungngo kano kasau cho ai niu i atang bo: “Zion chaniu awi, jei moh;

¹⁵Khen cham, nang i Samrang ly keaungngo kano kasau cho tleaung y atang naimy ang jeu ai,” nanai tajiu nai kamta.

¹⁶Angchei khala y abangnaichi ly huni satang pany thai y; na i py Isu ai palo nai bo y ly ni i satang huni atitichi tajiu nai ne, nanai hawi, ni i tlang tleaung y huni atitichi sa u bo, nanai py adawn u vau bo.

¹⁷Naibaly Lazara ai angawm i dengdairei palau iy, kadeichi theung i nai pathau nai thym khala y ni teng y khumi mipui awm naichi my py ni i satang thui pi jojo.

¹⁸Khumi mipuichi ly mymy i rengrang sa nai satang pany nai deaungkho y ni ai lamchung nai teu.

¹⁹Hunaibaly Pharisaichi my ly, “Khen cham, nangchi ly ati sai py so thai y; khen cham, khaileaung pri vereichi ly mymy teng y abang lawh bo he,” na u leungtang.

²⁰Naibaly pawira y Tameuh ai chiu ai nai chei naichi theung y Krikchi amichi mo awm;

²¹naibaly nichi ly Kalili pri y Bethsaida avang i khumi Philipa teng y chei i ni teng y, “Nai awi, kaichi ly Isu ai niu ai nai ngai,” nanai takeng.

²²Philipa my ly Andria ai thui pi i, Andria nini Philipa my ly Isu teng y thui pi bo.

²³Naibaly Isu my pathang i nini teng y, “Khumi i Chapo ai palo ai nai neng tym bo.

²⁴Meitang khyp kang thui pi, choh amairei khaileaung y tla iy dei y baly huni my tlairei awm jojo ai khyh; dei baly neangneang peung ai.

²⁵Ami py amy i hengra ai atmen nai khumi ly tama ai; naibaly ami py hini khaileaung pri y amy i hengra ai atmen y nai khumi ly deungtasa khairei hengra reu jojo ai.

²⁶Ami py kai i kalop sa baly kai teng y abang sy; kai i awm naira y kai i miseaung py awm teang ai; ami py kai i kalop sa baly ampo my ni ai tahm pasang ai.

²⁷“Vai kai paleung mawn parai; ati kathui ai mo hi ly? ‘Ngaai, hini neng y ly kai ai lawi hai kyh,’ napi ai mo? Na i py hina ai nai kai ly hini neng i vui katym nai tang.

²⁸Ngaai, nangmy i amyn palo ba,” napi. Hunaibaly kani mang i dengdairei raawi theu i, “Kapalo bo, kapalo bi ai,” napi.

²⁹Naibaly ahawi y angdo nai khumi mipuichi ly huna nai thai i, “Kani pajyh na a,” napi: takhrachi my ly, “Kani pri i amtaw thau nai my ni ai arum hai nai na a,” napi.

³⁰Isu my, “Hini raawi ly kai i vui theu nai ny y leang, nangmychi i vui teu.

³¹Vai hini khaileaung pri ai chih thym rai; vai hini khaileaung pri i areng ai ly patheu vui ai.

³²naibaly kai ai khaileaung i nai dang iy, khumi bawibawi ai kaimy teng y kapahawi ryp ai,” napi.

³³Huni leu ly mymy i dei ai nai sai pany hai nai thui nai ne.

³⁴Naibaly khumi mipuichi ly ni teng y, “Krista ly deungtasa khairei awm jo ai, nanai Reita theung i nai kaichi thai bo; Khumi i Chapo ai dang ai nai tla, nanai ly ati mana nai sai mo? Hini Khumi i Chapo ly ami mo?” nanai pathang.

³⁵Naibaly Isu my nichi teng y, “Kangvang ly tanarei chy sala y nangchi theung y awm rai; kaveng my nangchi ai kai y ai nai kangvang awm nai sala y pavai u; ami py kaveng y pavai nai ly mymy i tako ai naira pany y.

³⁶Nangchi ly kangvang i chanau lawn thai ai nai, kangvang ly nangchi teng y awm nai sala y kangvang ai ym u,” napi.

³⁷Isu my huni leu thui iy tako veng i, nichi ai aheu pi veng. Mymy ly nichi i mei ka-niu y atiti rengrang neangneang sa i py nichi ly mymy ai ym y;

³⁸“Areng, kaichi i leu thui nai ami ym mo? Areng i kiu ban py ami teng y amteng mo?” nanai amo Isaia i leu thui nai tym ai nai.

³⁹Hunai deaungkho y na a nichi ym thai y nai ly; ati mana nai mo nabaly Isaia my teang,

⁴⁰“Mymy ly nichi i mei paju hai, nichi i paleung py tang hai; Ti y baly nichi i mei niu lawh na, paleung my py pany thai lawh na: Ti y baly nichi ali teang lawh ai i, kaimy hawi so pi lawh na,” napi.

⁴¹Isaia my ni i nang parai nai sai niu nai deaungkho y hunai kamta thui, mymy ly ni i satang py pany hai.

⁴²Ne mang ly miteaung keh neangneangchi ly Isu ai ym u bo; na i py Pharisaichi deaungkho y pany hai y, ti y baly achura yhm i nai patheu lawh na;

⁴³ati mana nai mo nabaly nichi ly Tameuh my palo nai tleaung y khumi i palo nai ngai keh.

⁴⁴Naibaly Isu my aeu i, “Ami py kai ai ym nai ly kai ai ym nai ny y leang, kai ai pato nai keung ai ym nai teu.

⁴⁵Ami py kai ai niu nai ly kai ai pato nai keung ai niu nai bo.

⁴⁶Ami py kai ai ym nai ngierei ly kaveng y awm jo y ai nai, kai ly kangvang, khaileaung pri y kang jeu nai he.

⁴⁷Ami py kai i leu thai iy tangai y i py, kai ly ni ai pasum y leang; khaileaung pri ai pasum ai nai kang jeu nai ny y leang, khaileaung pri ai lawi hai ai nai kang jeu nai teu.

⁴⁸Ami py kai ai ngai y iy kai i leu thui naichi py tangai y baly, ni ai pasum nai keung leaungrei awm; kai i leu thui nai ly huni leu kypkyp my kani kangkhym y ly mymy ai pasum ryp ai.

⁴⁹Kaimy paseang amang nai thui nai ny y leang: kai i thui ai nai hawi thai hai ai nai ly kai ai pato nai keung Ampo i leu ang pei nai ne.

⁵⁰Mymy i leu pei nai ly deungtasarei hengra ne, nanai kai pany; hunai deaungkho y kai i leu thui nai ly Ampo my ang thui pi nai kamta kang thui pi nai ne,” napi.