Read Khumi Chin JOHAN 13 Bible Online

JOHAN 13 - Khumi Chin bible

JOHAN 13

¹Naibaly Isu ly Katlen Vui nai pawi ny y rai kha y hini khaileaung pri i nai theu vui iy, Ampo teng y chei ai nai neng bo, nanai pany i, mymy i khaileaung pri y awm nai khumichi ai ang tamen iy tem khala kharirei ang tamen jo.

²Naibaly dym biu cha nai kha y (huni ny y rai khala py Setan ly Simon i chapo Iskariota Juda i paleung y mymy ai patiu hai ai nai pachei iy).

³Isu ly Ampo my ni i kiu y ati cheaungkhang au nai hawi, mymy ly Tameuh teng i theu nai hawi Tameuh teng y chei bi ai nai py pany naimy,

⁴dym biu o nai kha y angthau; naibaly mymy i kanih atli i, atamui nai kanih la iy apam.

⁵Naibaly rahum y tui sa iy abangnaichi i kheu paju pi amteaung i, apam nai atamui nai kanih hawi tamui pi ryp.

⁶Hunaibaly mymy ly Simon Petera teng y tym i ni my ly, “Areng, nang puipui nai kai i kheu paju lawh rai a?” napi.

⁷Isu my ni teng y, “Kai i atiti sa nai ly vai nang pany y leang rai; na i py vaini bo y pany thai ai,” nanai pathang.

⁸Petera my ni teng y, “Nang ly kai i kheu paju ai nai den py ngo y ai,” napi. Isu my ni teng y, Kaimy kang paju y baly nang kai teng y ati sai py amkawm ai nai ny y leang,” napi.

⁹Simon Petera ly ni teng y, “Areng, naibaly kai i kheu khyh ny y, kai i kiu hawi lu py,” napi.

¹⁰Isu my ni teng y, “Tui ahiu nai bo y ly kheu harei ny y baly paju ai nai ngai y leang bo, chai pyn jau chy bo; nangchi ly chai mang, na i py bawibawi ny y leang,” napi.

¹¹Ni ly mymy ai patiu hai ai nai keung ai pany nai deaungkho y, “Nangchi bawibawi ly chai nai ny y leang,” napi nai ne.

¹²Hunaibaly nichi i kheu paju i mymy i kanih la iy ateh bi; naibaly nichi teng y, “Nangchi i tlang tleaung y kai i atiti sa nai ly ati mana nai sai mo, nanai pany u a?

¹³Nangchi ly kai ai Sara, Areng napi; nangchi i napi nai teng mang, kai ly ne khyp.

¹⁴Hunaibaly kai, Sara hawi Areng malawn py nangchi i kheu kang paju pi baly, nangchi py nangmychi tengtawi kheu apaju leungtang ai nai tla.

¹⁵Nangchi i tlang tleaung y kaimy kang sa pi nai kamta ly nangchi py sa teang ai nai kang patei bo.

¹⁶Meitang khypkhyp kang thui pi, miseaung ly yhmkeung tleaung y len y leang; pato nai khumi ly pato nai keung tleaung y len y leang.

¹⁷Nangchi ly huni atitichi pany iy sa baly taham hawi ai.

¹⁸Kai ly nangchi bawibawi i satang thui nai ny y leang; kai i vawi naichi ai ly kaimy pany, na i py ‘Kai hawi biu cha nai khumi my ni i kheu patui y tapi vui bo,’ nanai Tameuh i cha-iu leu tym hai ai nai.

¹⁹Neng tym khala y kai ly mymy ne khyp, nanai nangchi ym thai ai nai, vai ly neng tym y rai kha y kang thui pi.

²⁰Meitang khypkhyp kang thui pi, ami py kai i pato nai ai kawn nai ngierei ly kai ai kawn nai bo:amipy kai ai kawn nai ly kai ai pato nai keung ai py kawn nai bo,” napi.

²¹Isu ly huna nai thui pajau baly paleung mawn i, “Meitang khypkhyp kang thui pi, nangchi theung i leaungrei my kai ai patiu hai ryp ai,” nanai pany hai bo.

²²Naibaly abangnaichi ly ami ai napi nai mo, nanai pany y i, akhen u lengleang.

²³Naibaly abangnaichi theung i leaungrei Isu my tamen nai ly sabawi ahawi y Isu i paleung y anghawi.

²⁴Naibaly Simon Petera my kiu y kalawi i ni teng y, “Ami ai napi nai mo thui pi kyh ba,” napi.

²⁵Naibaly ni ly huna nai Isu i paleung y anghawi naimy hi i ni teng y, “Areng, ami mo?” napi.

²⁶Naibaly Isu my, “Kaimy tako sei padeung pi iy pei nai keung ne ai,” nanai pathang. Hunaibaly tako sei iy padeung nai bo y la i, Iskariota Simon i chapo Juda teng y pei.

²⁷Naibaly tako sei pei nai bo y Setan ly ni teng y kun praw ryp. Hunaibaly Isu my ni teng y, “Nang i sa ai nai ly so kaliki jau,” napi.

²⁸Naibaly sabawi ahawi i chi ly ami py ni i napi nai ly mana nai sai mo, nanai pany y.

²⁹Phyreichi ly Juda tangka sakheu kry nai deaungkho y Isu my, “Pawi i vui atiti aly ngai nai ngierei van ba,” nanai mo, “Khumi kamawnchi teng y atiti pei ai nai avo,” nanai mo, nanai dawn u.

³⁰Naibaly ni ly tako sei la iy theu praw ryp; hunai thym khala ly veng bo.

³¹Hunaibaly ni i theu nai bo y Isu my,’ Vai ly Khumi i Chapo ai palo bo, mymy deaungkho y Tameuh ai palo teang bo.

³²Tameuh my mymy y ly ni ai palo ai, palo py palo praw ai.

³³Bechi awi, kai ly nangchi teng y tanarei chy awm ai rai. Nangchi ly kai ai hau ai:naibaly Judachi teng y, ‘Kai i chei ai naira y nangchi jeu thai y leang,’ nanai kai i thui nai kamta vai py hunai kamta nangchi teng y py kang thui pi teang.

³⁴Atamen u leungtang, nanai leu kangtha kang pei; kaimy nangchi ai kang tamen nai kamta ly nangchi py atamen u leungtang.

³⁵Nangchi atamen u leungtang baly khumi bawibawi ly nangchi kai teng y abang nai khumichi ne, nanai hunira y pany ai,” napi.

³⁶Simon Petera my ni teng y, “Areng, nang ly ma mang y chei ai mo?” napi. Isu my, “Vai ly kai i chei ai naira y nang abang thai y leang rai; vaini bo y nang ly abang ai,” nanai pathang.

³⁷Petera my ni teng y, ‘Areng, ati mana nai vai py abang thai y mo? Nangmy i vui y kai i hengra kapei ai,” napi.

³⁸Isu my, “Kaimy i vui y nang i hengra pei ai lo-oh? Meitang khypkhyp kang thui pi, nangmy kai ai tlen thomrei apha y ryrei ly a kheaung ai ny y.