Read Khumi Chin JOHAN 15 Bible Online

JOHAN 15 - Khumi Chin bible

JOHAN 15

¹“Kai ly kreip angjyn pakeung tatang ne, Ngaai ly akho kry nai keung ne.

²Kai hawi amtawm iy athai y nai changpi ngierei ly mymy ly aphi ai; athai nai ngierei ly athai nawi tleaung nawira ai nai ang chai hai.

³Kai i nangchi teng y leu thui nai deaungkho y nangchi chai ryp bo.

⁴Kai teng y awm u jo, kai py nangmychi teng awm jo ai. Changpi ly kreip angjyn y amtawm jo y baly mymy tlairei athai thai y nai kamta ly, nangchi py kaimy teng y awm jo y baly athai thai y leang.

⁵Kai ly kreip angjyn pakeung ne, nangchi ly changpi ne; ami py kaimy teng y awm jo iy, kai py mymy teng y awm jo nai ly huni kypkyp ly neangneang athai; nangchi ly kai hawi ny y baly ati sai py so thai y leang.

⁶Ami py kaimy teng y awm jo y baly changpi aphi nai kamta aphi iy jei ai; naibaly phawm iy mai y aphi ai i kang ai.

⁷Ngngchi ly kaimy teng y awm jo iy kai i leu nangchi teng y awm jo teang baly, nangchi i ngai nai ngierei ly hnei u, nangchi i vui ang sa pi ai.

⁸Nangchi neangneang athai baly Ngaai ai ly palo u nai ne; hunaibaly nangchi ly kai teng y abangnaichi lawn u khyp ai.

⁹Ampo my kai ai tamen nai kamta kai py nangchi ai tamen teang; kai i tamen naira y awm u jo.

¹⁰Kai ly Ngaai i leu pei nai tangai iy, ni i tamen naira y awm jo nai kamta, nangchi py kai i leu pei nai tangai baly kai i tamen naira y awm u jo ai.

¹¹Kai i kawn naira nangchi teng y awm jo ai nai hawi, nangchi kawn angym ai nai py hini leu kang thui pi bo.

¹²“Hini ly kai i leu kang pei nai ne, kaimy kang tamen nai kamta ly nangchi py atmen u leungtang.

¹³Khumi ly ahawichi i vui y amy i hengra pei nai bo y tamen naira len keh nai ly ami py by y leang.

¹⁴Nangchi ly kaimy i leu kang pei nai ngierei sa baly, kai i ahawichi lawn u ai.

¹⁵Nangchi ai miseaung kang tapi ali y leang bo; yhmkeung i atiti sa nai ly miseaung ly pany y; na i py nai awi, kang napi bo; Ampo teng i kai i atiti thai nai bawibawi ly kang thui pi veng bo.

¹⁶Nangchi my kai ai vawi nai ny y leang, kaimy nangchi ai vawi nai teu; nangchi ly kai i amyn y Ampo teng y ati cheaungkhang hnei nai ngierei ly ang pei ai nai, nangchi ly chei iy athai ai nai hawi, nangchi i athai awm jo ai nai py kaimy kang khai takhra bo.

¹⁷Nangchi ly atamen u leungtang ai nai hini leu kang pei.

¹⁸“Khaileaung prichi my nangchi ai niu ngai y baly, nangchi ai niu ngai y rai khala y my kai ai niu ngai y nai bo, nanai nangchi pany.

¹⁹Nangchi ly khaileaung pri i khumichi ne i khyly, khaileaung prichi my mymy i khumichi ai tamen ai bo; nangchi ly khaileaung pri i khumichi ny y i, khaileaung prichi theung i nai kaimy kang vawi nai deaungkho y khaileaung prichi my nangchi ai niu ngai y bo.

²⁰Miseaung ly yhmkeung tleaung y len y leang, nanai leu kang thui pi nai ly dawn u. Nichi my kai ai ana baly nangchi ai py ana teang ai; nichi ly kai i leu tangai baly nangchi i leu py tangai teang ai.

²¹Na i py nichi ly kai ai pato nai keung ai pany y nai deaungkho y hinichi bawibawi ly kaimy i amyn deaungkho y nangchi i tlang tleaung y sa ai.

²²Kai jeu iy nichi teng y leu thui y nai khyly, nichi ly kamngo by y ai bo.

²³Vai ly nichi ly kamngo akhi ai naira ngo y leang bo. Ami py kai ai niu ngai y nai ly Ngaai ai py niu ngai y nai bo.

²⁴Khumi takhra ami py so vai y naichi ly kaimy nichi theung y so y nai khyly, nichi ly kamngo by y ai bo; vai ly nichi ly Ngaai kaini ai niu i py niu ngai y bo.

²⁵Ati py ne sy mychi i Reita y, ‘Nichi ly ati sai py ny y pui naimy kai ai niu ngai y,’ nanai leu tajiu nai tym ai nai na a hi ly.

²⁶Naibaly Ngaai teng i nai Awm Hai Nem nai Keung nangchi teng y kang pato ai nai, Ngaai teng i Leu Meitang Phailo ly ang tym khala y ni my kai i satang ang pany hai ai;

²⁷nangchi py angchei kha i dengdairei kai teng y awm nai deaungkho y pany hai u teang ai.