Read Khumi Chin JOHAN 16 Bible Online

JOHAN 16 - Khumi Chin bible

JOHAN 16

¹“Nangchi ly atlym y ai nai hini leu kang thui pi bo.

²Nangchi ai achura yhm i nai ang patheu ai; ne, ami py nangchi ai ang padei ai nai ngierei ly Tameuh i vui y atiti kahawi sa, nanai adawn ai: huna nai neng tym ai;

³Ampo kaini ai pany y nai deaungkho y hina nai sa u ai.

⁴Neng tym khala y kaimy kang thui pi, nanai nangchi adawn vau bi ai nai, hini satang ly kang thui pi bo. Kai ly nangchi teng y awm rai nai deaungkho y hini satang ly angchei khala y kang thui pi y.

⁵Vai ly ang pato nai keung teng y kai chei ai bo; naibaly nangchi ly kai ai, ‘Nang ly ma mang y chei ai mo?’ nanai ami py deng y.

⁶Na i py hini leu kang thui pi nai deaungkho y nangchi i paleung mawn nai ly kawi lawh bo.

⁷Na i py kaimy leu meitang kang thui pi; kai chei baly nangchi i vui avo ai; kai chei y baly Awm Hai Nem nai Keung ly nangchi teng y ang jeu ai ny y; kai chei baly ni ai nangchi teng y kang pato ai.

⁸Ni ly ang tym khala y kamngo sa nai hawi, hawi sa nai hawi, tara chih naira py khaileaung prichi ai pasum ai.

⁹Kai ai ym y nai deaungkho y kamngo nai y pasum ai;

¹⁰kai ly Ampo teng y chei ai i, nangchi ly kai ai niu ali bi y ai nai deaungkho y hawi sa nai y pasum ai;

¹¹khaileaung pri i areng ai ly pasum veng nai deaungkho y tara chih naira y pasum ai.

¹²“Kai ly nangchi teng y leu thui ai nai awm mamang ra;, na i py vai ly nangchi eang pajau y leang rai.

¹³Na i py mymy, Leu Meitang Phailo ang tym khala ly leu meitang bawibawi y ang pahawi ai: mymy i paseang amang nai leu thui y ai, mymy i leu thai nai ngierei ly ang thui pi ai; atiti tym ai naichi py ang pany hai ai.

¹⁴Ni ly kai ai palo ai; ati mana nai mo nabaly ni ly kai i nai la ai i, nangchi teng y ang thui pi ai.

¹⁵Ampo i atiti awm nai ngierei ly kai i ne, hunai deaungkho y kai i nai la ai i nangchi teng y ang thui pi ai kang napi.

¹⁶“Kra y nai sala y nangchi ly kai ai niu ai ny y; kra y nai sala y nangchi ly kai ai niu teang ai,” napi.

¹⁷Naibaly abangnai phyreichi ly, “Achi teng y ni i leu thui nai ly ati kha? ‘Kra y nai sala y nangchi ly kai ai niu ai ny y, kra y nai sala y nangchi ly kai ai niu teang ai,’ nanai hawi, Ampo teng y kachei ai nai deaungkho y,’ nanai ly? “na u leungtang.

¹⁸Naibaly nichi my ly, “Hini kra y,’ nanai y ati mo? Ni i leu thui nai ly kaichi dawn ai nai pany y,” napi.

¹⁹Naibaly nichi ly mymy teng y deng ai nai ngai, nanai Isu my pany i nichi teng y, “Kra y nai sala y nangchi ly kai ai niu ai ny y, kra y nai sala y nangchi ly kai ai niu teang ai,’ nanai, hini kai i leu thui nai nangchi ly adeng u lo-oh?

²⁰Meitang khypkhyp kang thui pi, nangchi ly mei katui tla ai i neangneang vo ai; khaileaung prichi naini kawn ai, na i py nangchi i paleung mawn naira ly kawn naira lawn ai.

²¹Mymy i neng tym nai deaungkho y neampachy ly chanau tapen nai no iy paleung mawn; na i py deaungdi tapen bo nabaly khaileaung pri y khumi tapen iy kawn nai deaungkho y ni i phailo seaung nai ly dawn ali y leang bo.

²²Naibaly vai nangchi ly paleung mawn u bo; na i py kai ly nangchi hawi avum bi ai i, nangchi i paleung ly kawn ai, nangchi i kawn nai ly ami py lo pi y leang mang.

²³Huni kani y nangchi ly kai teng y ati sai py deng y ai. Meitang khypkhyp kang thui pi, nangchi ly Ampo teng y ati py hnei baly kaimy i amyn y ang pei ai mang.

²⁴Vai khrairei nangchi ly kaimy i amyn y ati sai py hnei y rai; hnei u. naibaly nangchi ly kawn angym ai nai nga u ai.

²⁵“Hini leu ly nangchi teng y kang thui pi engleng bo: na i py neng tym ai, hunai khala y ly thui pi engleng nai leu ly kang thui pi ali y leang bo, chai pyn naimy Ampo i satang kang thui pi ai.

²⁶Huni kani y ly kaimy i amyn y nangchi atiti hnei ai: naibaly Ampo teng y kaimy kang takeng pi ai, nanai kang tapi y leang.

²⁷Nangchi ly kai ai tamen i, kai ly Ampo teng i nai theu iy khaileaung pri y kang jeu, nanai py ym u nai deaungkho y, Ampo kypkyp my nangchi ai ang tamen.

²⁸Kai ly Ampo teng i nai theu iy khaileaung pri y kang satla bo; kai ly khaileaung pri i nai theu vui iy Ampo teng y kavawi teang ai,” napi.

²⁹Naibaly abangnaichi my, “Khen cham, vai ly nang chai pyn naimy thui bo, thui pi engleng nai den py thui y bo.

³⁰Nangmy ati cheaungkhang pany, ami mi py nang teng y atiti deng ai nai aly by y, nanai vai ly kaichi pany bo; hunai deaungkho y nang ly Tameuh teng i nai theu nai ne, nanai kaichi ym mang,” napi.

³¹Naibaly Isu my nichi teng y, “Vai ly ym u lo-oh?

³²Khen cham, neng tym dudu bo, vai py tym ryp bo, hunai khala y ly nangchi ly amy i yhm y ahei akyhkyh pawn ai i, kaimy tlairei ai patlaw u jo ai; na i py Ampo ly kai teng y awm nai deaungkho y kaimy tlairei awm y leang.

³³Nangchi ly kai teng y awmnem naira nga ai nai kaimy hini satang kang thui pi bo. Nangchi ly khaileaung pri y patang naira avum ai; na i py paleung awmnem naimy awm u, kaimy khaileaung pri ai pajau bo,” nanai pathang.