Read Khumi Chin JOHAN 17 Bible Online

JOHAN 17 - Khumi Chin bible

JOHAN 17

¹Isu my hini satang thui i, kani mang y angdeang iy,

²“Ngaai, neng ly tym bo: nangmy mymy ai khumi bawibawichi ai peang ai nai pei iy, mymy teng y nang i au nai ngierei ai ly mymy deungtasarei hengra pei thai ai nai, Chapo my nang ai palo thai ai nai nangmy i chapo ai palo ba.

³Nang, Tameuh meitang leaungrei awm khyh nai ai hawi, nang i pato nai Isu Krista ai pany nai ly deungtasarei hengra ne.

⁴Nangmy kai ai atiti sa ai nai au nai ly kai sa be nai deaungkho y khaileaung pri y kang palo bo.

⁵Aw Ngaai, khaileaung pri by y rai khala y kai ly nang khi y nang parai naira kanga nai hawi ly vai ly kai ai palo.

⁶Nangmy khaileaung pri i nai kai ai au nai khumichi teng y nang i amyn kai pany hai bo:nichi ly nang i na a, nangmy nichi ai kai teng y au i, nichi ly nang i leu tangai bo.

⁷Nangmy kai ai atiti au nai ngierei ly nang teng i theu nai ne, nanai vai ly nichi pany bo;

⁸nangmy kai ai leu pei naichi ly kaimy nichi teng y thui pi bo; hunichi ly nichi tangai iy, kai ly nang teng i theu, nanai pany tatang bo, nangmy kai ai pato, nanai py ym u bo.

⁹“Kai ly nichi i vui chiu sa pi; kai ly khaileaung prichi i vui chiu sa pi nai ny y leang: kai teng y au naichi ly nang i ne nai deaungkho y nichi i vui chiu kasa pi;

¹⁰kai i atiti bawibawi ly nang i ne, nang i ly kai i ne, nichi deaungkho y palo naira kanga bo.

¹¹Naibaly kai ly khaileaung pri y awm y leang bo, hinichi ly khaileaung pri y awm ai, kai naini nang teng y kang vawi ai bo. Aw Ngaai Kachai, nichi ly ani kamta bomrei awm thai ai nai, nangmy kai teng y au naichi ai ly nangmy i amyn y kry ba.

¹²Kai ly nichi teng y awm nai sala ryrei ly nangmy kai teng y au naichi ai ly nangmy i amyn y kaimy kry bo: nichi ai kaimy typ i, tama nai chapo ny y baly nichi theung y leaungrei py tamo y; huni py Tameuh i cha-iu leu sai tym thai ai nai ne.

¹³Na i py vai ly nang teng y kang vawi ai bo; mymychi y ly kai i kawn naira nga u angym thai ai nai kaimy khaileaung pri y hini leu thui pi bo.

¹⁴“Nang i leu ly kaimy nichi teng y pei bo, naibaly kai ly khaileaung pri i ny y nai kamta nichi py khaileaung pri i ny y nai deaungkho y khaileaung prichi my nichi ai niu ngai y bo.

¹⁵Nangmy nichi ai khaileaung pri i nai la vui ai nai chiu sa pi nai ny y leang, kamngo teng i nai nichi ai lawi hai ai nai chiu sa pi nai teu.

¹⁶Kai ly khaileaung pri i khumi ny y nai kamta, nichi py khaileaung pri i khumi ny y.

¹⁷Nichi ai leu meitang y khai takhra ba, nang i leu ly leu meitang ne.

¹⁸Nangmy kai ai khaileaung pri y pato nai kamta ly kai py nichi ai khaileaung pri y pato teang bo.

¹⁹Nichi ly leu meitang y khai takhra nai awm thai ai nai, kai ly mymychi deaungkho y kaimy ai akhai takhra bo.

²⁰“Ngaai, nang ly kai teng y awm iy, kai ly nang teng y awm nai kamta ly, nichi py ani teng y awm teang iy, nangmy kai ai pato nanai khaileaung prichi my ym thai ai nai,

²¹nichi bawibawi bomrei awm thai ai nai hunichi i vui ly chiu kasa pi nai khyh ny y leang; nichi i leu deaungkho y kai ai ym ai naichi i vui py chiu kasa pi nai ne.

²²Naibaly ani ly bomrei awm nai kamta nichi py bomrei awm thai ai nai, nang ly kai ai nang parai naira pei nai ly nichi teng y kapei bo;

²³kai mymychi teng y awm nai, nang kai teng y awm nai, nichi bomrei awm iy angym thai ai nai, nangmy kai ai pato nanai hawi, nangmy kai ai tamen nai kamta nichi ai py nang tamen teang, nanai py khaileaung prichi my pany ai nai.

²⁴Ngaai, nangmy kai ai nang parai naira pei nai ly nichi niu ai nai, nangmy kai teng y au naichi ai ly kai i awm naira y kai teng y awm hai teang ai nai kangai; khaileaung palum y rai kha y my nangmy kai ai tamen bo.

²⁵Aw Ngaai Kahawi, khaileaung prichi ly nang ai pany y bo, kai naini pany; naibaly nangmy kai ai pato, nanai py hinichi ly pany;

²⁶naibaly nang i kai ai tamen nai ly mychi teng y awm i, kai py mychi teng y awm thai ai nai, kaimy nichi teng y nangmy i amyn pany hai bo, kapany hai bi ai,” napi.