Read Khumi Chin JOHAN 18 Bible Online

JOHAN 18 - Khumi Chin bible

JOHAN 18

¹Isu ly huni leu thui pajau baly abangnaichi hawi theu iy Kidron tavo kan; hu y ly akho awm:mymy hawi abangnaichi py hunira y kun.

²Naibaly Isu ly abangnaichi hawi hu y pavai reng nai deaungkho y mymy ai patiu hai nai keung Juda py huni meingtym pany.

³Hunaibaly Juda ly tavaimi kamkawm hawi, pathyp pi nai keung kalenchi hawi Pharisaichi teng i nai miseaung luchi hawi avum i, maisi hawi maiteaung hawi haisauchi py syn iy hu y chei bo.

⁴Hunaibaly Isu my mymy i tlang tleaung y atiti tym ai nai ngierei pany yb i theu iy nichi teng y, “Ami ai hau u mo?” napi.

⁵Nichi my ly ni teng y, Nazaret Isu ai,” nanai pathang. Isu my nichi teng y, “Kai ne he” napi. Ni ai patiu hai ai nai Juda py nichi theung y angdo nai ne.

⁶Naibaly mymy ly nichi teng y, “Kai ne he, “napi khala y nichi ly nithun mang y anaw i khaileaung y atlym u hawm.

⁷Naibaly mymy ly nichi teng y, “Ami ai hau u mo?” nanai deng bi.

⁸Nichi my ly, “Nazaret Isu ai,” napi bi. Naibaly Isu my, “kai ne he,’ nanai kang thui pi chy bo; nangchi kai ai hau nai baly hinichi ai ly patleaung u ba,” nanai pathang.

⁹Ni i leu ly, “Nangmy kai teng y au naichi theung y leaungrei ai py katamo y leang,” nanai tym ai nai thui nai ne.

¹⁰Naibaly Simon Petera ly haisau syn nai aphiu iy pathyp pi nai keung kalen keh i miseaung ai ateng i, mymy i lamtang mang i kano sei thlau vui. miseaung i amyn ly Malka ne.

¹¹Naibaly Isu my Petera teng y, “Haisau ly keu y pacheang ba; Ampo my kai ai pei nai khau ly kai nei y ai a?” napi.

¹²Hunaibaly tavaimi kamkawm hawi, nichi i krykeung kalen keh hawi, Judachi i miseaung luchi py Isu ai patiu i kawm iy, Anna teng y aphawi manme:

¹³ati mana nai mo nabaly ni ly huni saneng i pathyp pi nai keung kalen keh Kaiapha i ampu ne.

¹⁴(Kaiapha ly, “Cheng jyn i vui khumi leaungrei dei baly hawi,” nanai Judachi ai dawn hai nai keung ne.)

¹⁵Naibaly Simon Petera hawi abangnai takhra leaungrei py Isu ai hui hawi. Huni abangnai leaungrei ly pathyp pi nai keung kalen keh hawi meimai apany i, pathyp pi nai keung kalen keh i lyum y Isu hawi vanrei kun teang;

¹⁶na i py Petera ly angam mang y katheu pa-kho ahawi y angdo jo. Hunaibaly abangnai takhra, pathyp pi nai keung kalen keh hawi meimai apany nai ly theu iy, katheu pa-kho typ nai anglo hawi arum i Petera ai pakun.

¹⁷Naibaly katheu pa-kho typ nai anglo my ly Petera teng y, “Nang py hini khumi khi y abangnaichi theung y abawi teang lo-oh?” napi. Ni my ly, “Ny y leang,” napi.

¹⁸Naibaly miseaungchi hawi miseaung luchi ly hu y angdo u mang: padeng nai deaungkho y maisaei hawi mai sa iy aawm u: Petera py nichi teng y abawi i, angdo nai tarawi y mai aawm teang.

¹⁹Naibaly pathyp pi nai keung kalen keh my ly Isu ai ni teng y abangnaichi i satang hawi, ni i leu patiu nai sai py deng.

²⁰Isu my ni teng y, “Khaileaung pri i khumichi teng y khumi bawibawichi i ka-thai y kai leu thui be; achura yhm y hawi, achura yhm kalen pui y py, Juda bawibawichi i achu reng nai meingtym y kai patiu jojo be; kai ly kangviu y ati sai py thui y leang.

²¹Ati mana nai kai ai deng mo? Nichi teng y kai i leu thui nai sai ly kai i leu thai nai keungchi teng y deng u bei; khen cham, nichi ly kai i leu thui nai pany chy bo,” nanai pathang.

²²Huna nai thui pajau baly ahawi i angdo nai miseaung lu leaungrei my ly Isu ai tabeang i, “Pathyp pi nai keung kalen keh ai hina nai kamta pathang lawh a?” napi.

²³Isu my ni teng y, “kai ly leu hawi y nai thui bo nabaly kai i hawi y naira thui pi; na i py leu kahawi thui nai nabaly ati mana nai y kai ai tabeang mo?” nanai pathang.

²⁴Naibaly Anna my ly ni ai kawm rang naimy pathyp pi nai keung kalen keh Kaiapha teng y pato.

²⁵Naibaly Simon Petera ly angdo nai tarawi y mai aawm i nichi ly, “Nang py ni khi y abangnaichi theung y abawi teang lo-oh?” napi.

²⁶Ni my ly, “Kai ny y leang,” nanai apha. Naibaly pathyp pi nai keung kalen keh i miseaung leaungrei, Petera my kano sei tlau nai i miso my ly, “Ni teng y akho y kang niu y lawh a?” napi.

²⁷Hunaibaly Petera ly apha bi; naibaly a kheaung praw ryp bo.

²⁸Hunaibaly nichi ly Isu ai Kaiapha i yhm dengdairei samrang i yhm y pahawi; naibaly khutawi tarum taro bo; naibaly nichi ly chai y nai lawn y iy, katlen vui nai pawi biu cha thai ai nai samrang i yhm y kun y leang.

²⁹Hunaibaly Pilata ly nichi teng y theu i, “Nangchi ly hini khumi ai ati leu seu mo?” napi.

³⁰Nichi my ly ni teng y “Hini khumi ly kamngo ny y nai khyly kaichi nang teng y kang au y leang bo,” nanai pathang u.

³¹Naibaly Pilata my ly nichi teng y, “Nangchi my pahawi u ly, nangchi i Reita kamta chih u,” napi.

³²Isu my amy i dei nai sai satang thui nai kamta tym thai ai nai, Judachi my ly Pilata teng y, “kaichi ly ami ai py padei ngau y,” napi.

³³Hunaibaly Pilata ly yhm y kun bi i, Isu ai palau iy ni teng y, “Nang ly judachi i samrang ne a?” napi.

³⁴Isu my ni teng y, “Hini ly nangmy i paleung y dawn nai y thui nai a, khumi takhra my ang thui pi nai a, kai i satang ly?” nanai pathang.

³⁵Pilata my. “kai ly Juda lawh a? Nangmy i cheng hawi pathyp pi nai keung kalenchi my nang ai kai teng y au nai teu; nang atiti sa mo?” nanai pathang.

³⁶Isu my, “Kai i peang nai ly hini khaileaung pri y ny y leang; kai i peang nai ly hini khaileaung pri y ne i khyly, kai ai Judachi teng y au y ai nai kai i miseaungchi ly tiu ai; na i py kai i peang nai ly hi i nai ny y leang,” nanai pathang.

³⁷Naibaly Pilata my ni teng y, “Nang ly samrang cham mo?” napi. Isu my, “Nangmy kai ai samrang napi be. Leu meitang pany hai ai nai kai ai tapen nai hawi, khaileaung pri y kang jeu nai tang. Ami py leu meitang awm nai ngierei ly kai i leu tangai,” napi.

³⁸Pilata my ni teng y, “Leu meitang ly ati mo?” napi. Naibaly hini leu thui pajau baly mymy ly Judachi teng y theu bi i nichi teng y, “kai ly ni i hawi y naira ati sai py kaniu y leang.

³⁹Na i py Katlen Vui nai pawi y khumi leaungrei ai patheu pi ai nai nangchi i reita awm; hunaibaly Judachi i samrang ai ly kang patheu pi ai nai ngai u a?” napi.

⁴⁰Naibaly nichi ly aeu u bi i, “Hini khumi ai ne moh sy, Baraba ai phai sy,” napi. Baraba ly damra khumi ne.