Read Khumi Chin JOHAN 19 Bible Online

JOHAN 19 - Khumi Chin bible

JOHAN 19

¹Naibaly hunai thym khala y Pilata ly Isu ai hawi iy chip i, tavaimichi ly aleng tarai khui iy amyn hai,

²kanih kamsen jeaung py akhiu hai;

³naibaly nichi ly ahawi y chei iy, “Kawn ba Judachi i samrang awi!” napi i tabeang u.

⁴Naibaly Pilata ly theu bi i nichi teng y, “Khen cham, ati sai py kamngo kaniu y leang, nanai nangchi pany ai nai kang pahawi bi bo he,” napi.

⁵Naibaly Isu ly aleng tarai hawi kanih kamsen jeaung akhiu naimy theu i Pilata my nichi teng y, “Khen cham, hini khumi ai he,” napi.

⁶Naibaly pathyp pi nai keung kalenchi hawi miseaung luchi my ly ni ai niu baly, “Kraws tleaung y tahen, kraws tleaung y tahen,” nanai aeu u. Pilata my nichi teng y, “Nangchi my tako hai ly, kraws tleaung y tahen u; kai ly ati sai py kamngo kaniu y leang,” napi.

⁷Judachi ly ni teng y, “kaichi i reita harei awm, mymy ly Tameuuh i Chapo amlawn nai deaungkho y huni reita i leu y dei ai nai tla,” nanai pathang u.

⁸Naibaly Pilata ly huna nai leu thai iy jei ra i, yhm y kun bi iy Isu teng,

⁹“Nang ly ma mang i khumi mo?” napi.

¹⁰Na i py Isu my pathang y. Naibaly Pilata my ni teng y, “Nang ly kai ai pathang y lawh a? Patheu py kang patheu thai, kraws tleaung y py kang tahen thai, nanai pany y nai sai a?” napi.

¹¹Isu my pathang i, “Salo mang i dengdairei ang pei nai ny y baly kai i tlang tleaung y nang sa pajau ai naira ha py nga ai ny y leang; hunai deaungkho y kai ai nang teng y au nai keung ly kamngo len ra bo,” napi.

¹²Hunai ryrei baly Pilata ly ni ai patheu ai nai tau; na i py Judachi ly, “Nang ly hini khumi ai patheu baly nang Kaisara i ahawi ny y leang. Ami py samrang amlawn nai ngierei ly Kaisara ai pasum nai teu,” nanai aeu.

¹³Naibaly Pilata ly huna nai leu thai baly Isu ai pahawi i lengseaung Padyhra meingtym y tara chih naira y ateh. (Huni ly Herbrai leu y Kabatha napi.)

¹⁴Huni kani ly Katlen Vui nai pawi Sa Rym Nai Kani ne: khawn biu cha neng ne bo. Naibaly ni my ly Judachi teng y, “Khen cham, nangchi i samrang ly!” napi.

¹⁵Naibaly nichi my ly, “Lo la, lo la, kraws tleaung y tahen!” nanai aeu u. Pilata my nichi teng y, “Nangchi i samrang ai ly kraws tleaung y katahen ai a?” napi. Pathyp pi nai keung kalenchi my ly, “Kaisara ny y baly kaichi i samrang takhra by y leang,” nanai pathang.

¹⁶Hunaibaly Pilata ly kraws tleaung y tahen ai nai mymy ai nichi teng y au bo. Hunaibaly nichi ly Isu ai pahawi u;

¹⁷naibaly ni ly amy i vui kraws apu naimy Lu Hiu meungtym napi naira y tym pa-rei tako.

¹⁸(Huni ly Hebrai leu y Kolkotha napi.) Hu y ly mymy hawi vanrei khumi takhra leaung nyhrei ai py kraws tleaung y tahen teang, lamtang mang y leaungrei, langvawi mang y leaungrei, sala y ly Isu.

¹⁹Naibaly Pilata ly cha tajiu i kraws tleaung y bi.

²⁰“Nazaret Isu, Judachi i samrang,” nanai tajiu. Naibaly Isu ai kraws tleaung y tahen nai meingtym ly avang pui ahawi ne nai deaungkho y, Judachi neangneang huni cha phain u; huni ly Hebrai leu y py, Rom leu y py, Krik leu y py tajiu nai ne.

²¹Hunaibaly Judachi i pathyp pi nai keung kalenchi ly Pilata teng y, “Judachi i samrang’ nanai tajiu moh; mymy ly ‘Judachi i samrang kai ne, nanai thui,’ nanai tajiu,” napi.

²²Pilata my, “Kai i tajiu nai ly katajiu chum veng bo,” nanai pathang.

²³Naibaly tavaimichi ly Isu ai kraws tleaung y tahen pajau baly ni i ateaung la i phy palyhrei palawn, tavaimi leaungrei y phy phyrei teung u; baichu py la teang: baichu ly hui y nai baichu amjy, kaneaung i dengdairei bom verei aneng ve nai;

²⁴hunai deaungkho y nichi ly, “Sei y han bo, ami ngo na mo tambe va sina,” na u leungtang. (Tameuh i cha-iu leu sai, “kai i ateaung amji u iy, Kai i baichu i vui py tambe va u,” nanai tym thai ai nai,) Huni atitichi ly tavaimichi my sa khyp.

²⁵Naibaly Isu i kraws ahawi y ni i amhm hawi, amhmto Klopa i aju Mari hawi, Mari Makdilini hawi angdo nai ne.

²⁶Hunaibaly Isu ly mymy i amhm hawi abangnai leaungrei mymy tamen nai ly ahawi y angdo nai niu i amhm teng y, “Neampachy awi khen cham, nang i chapo ly!” napi.

²⁷Naibaly abangnai teng y, “khen cham ngamhm ly!” napi. Naibaly hunai ryrei baly huni abangnai ly ni ai mymy i yhm y hawi veng bo.

²⁸Hunai bo y Isu my vai ly ati cheaungkhang angym bo, nanai pany i, Tameuh i cha-iu leu sai tym thai ai nai “Kai tui ahai,” napi.

²⁹Hu y ly laawm harei kreip athai hang katho kakawi khai nai panui bo: nichi ly span angsorei kreip athai hang katho y padeung iy, hussop beang tleaung y takei i ni i labeaung y tui.

³⁰Naibaly Isu ly kreip athai hang nei pajau baly, “Angym bo,” napi i, lu meung iy mymy i phailo patlaw bo.

³¹Hunaibaly huni ly Sa Rym Nai Kani ne nai deaungkho y, veuchi ly Anawn Kani y kraws tleaung y awm jo y ai nai (huni Anawn kani ly aly len nai kani ne) Judachi ly Pilata teng y nichi i kheu tleu hai iy veu la vui ai nai hnei u.

³²Naibaly tavaimichi ly jeu i ni teng y kraws tleaung y vanrei tahen nai leaungrei ai hawi, takhra leaungrei ai py nini i kheu tleu hai:

³³na i py Isu i ahawi y chei iy ni ly dei veng bo, nanai pany i ni i kheu tleu hai y.

³⁴Ne mang ly tavaimichi theung y leaungrei ly ni i pana y tivi hawi thun i, thi hawi tui theu praw ryp.

³⁵Nangchi ly ym thai ai nai, niu nai keung my pany hai bo; ni i pany hai nai leu ly teng parai mang; ni i thui nai ly teng, nanai apany.

³⁶Ati mana nai mo nabaly Tameuh i cha-iu leu sai, “Ni i hiu ha py tleu hai ai ny y,” nanai tym thai ai nai huni atitichi tym bo.

³⁷Naibaly Tameuh i cha-iu leu sai takhra ly, “Nichi i thun nai ai ly nichi ly khen ai,” nanai tajiu bi.

³⁸Naibaly huna naichi sa nai bo y ly Josepha Arimathai avang i khumi, Isu teng y abang teang (ne mang ly Judachi ai jei nai deaungkho y kangviu y abang) ni ly Isu i veu la vui ai nai Pilata teng y hnei. Naibaly Pilata my pei i ni ly jeu iy veu la veng bo.

³⁹Naibaly angchei kha y vum y Isu teng y chei nai Nikodema ly mura hawi, alo katlen nai angchi sie vui pangrei mo syn iy chei teang.

⁴⁰Naibaly nini ly Isu i veu la iy Judachi i up nai reita kamta atiti rimui hawi, kanih mai ka-syn hawi bam.

⁴¹Naibaly ni ai kraws tleaung y tahen nai meingtym y akho harei awm i, akho y ly ami ai py up vai y nai angawm kangtha harei awm.

⁴²Naibaly Judachi i Sa Rym Nai Kani ne nai deaungkho y huni angawm ly ahawi y ryp i Isu ai hu y up hawi bo.