Read Khumi Chin JOHAN 20 Bible Online

JOHAN 20 - Khumi Chin bible

JOHAN 20

¹Naibaly kani saryhrei nai angchei i kani khutawi y kyh rai khala y Mari Makdilini ly angawm y chei i, lengseaung ly angawm i nai kasyh vui nai niu.

²Hunaibaly mymy ly angpreng iy Simon Petera hawi abangnai takhra leaungrei Isu my tamen nai teng y chei i nini teng y, “Areng ai ly, angawm i nai la vui bo, kaichi ly nichi i khai naira pany y,” napi.

³Hunaibaly Petera ly abangnai takhra hawi theu iy, angawm mang y chei hawi tapai.

⁴Naibaly nini ly angpreng hawi i, abangnai takhra my ly Petera ai katlen vui iy angawm y tym man;

⁵naibaly meung iy bih i, kanih mai ka-synchi awm jo nai niu i py theung y kun y.

⁶Hunaibaly Simon Petera ly nithun mang y hui nai tym teang i, angawm theung y kun iy kanih mai ka-synchi awm jo nai niu;

⁷ni i lu y bam nai kanih ly kanih ma ka-synchi theung y awm y i, meingtym takhra y taeang angchi niu.

⁸Hunaibaly angawm y tym man nai abangnai takhra py kun teang i niu iy ym bo.

⁹Mymy ly kadeichi theung i nai angthau bi ai nai tla, nanai Tameuh i cha-iu leu sai nichi pany y rai.

¹⁰Hunaibaly abangnai leaung nyhrei ly myni i yhm y vawi ali teang bo.

¹¹Na i py Mari ly angam mang y angawm ahawi y vo naimy angdo nai ne:naibaly vo nai tarawi y meung iy angawm theung y bih;

¹²naibaly kani pri i amtaw thau nai leaung nyhrei kanih kangleung akhiu naimy, Isu i veu paseaung nai meingtym y lu mang y leaungrei, kheu mang y leaungrei ateh nai niu.

¹³Naibaly nini my ly ni teng y, “Lo awi, ati mana nai vo mo?” napi. Mymy ly nini teng y, “Kai i Areng ai nichi my la vui i khai naira kapany y nai deaungkho y teu,” napi.

¹⁴Naibaly mymy ly huna nai thui pajau iy nithun mang y hi i Isu angdo nai niu, na i py Isu ne, nanai pany y.

¹⁵Isu my ni teng y, “Lo awi, ati mana nai vo mo? Ami ai hau mo?” napi. Ni ly mymy ai akho kry nai keung palawn i ni teng y, “Areng, nang ly mymy ai hi i nai la vui bo nabaly nang i khai naira kai ai thui pi kyh, hunaibaly kaimy ni ai la vui ai,” napi.

¹⁶Isu my ni teng y, “Mari,” napi. Ni my ly hi iy ni teng y Hebrai leu y, “Rabboni” napi; (huni ly Sara nanai sai ne).

¹⁷Naibaly Isu my ni teng y, “Kai ai amkhaw moh; kai ly vai khrairei Ampo teng y kalau y leang rai; na i py kai i amjo amnauchi teng y chei iy nichi teng y, ‘Ngaai hawi nangchi i Ampo kai i Tameuh hawi nangchi i Tameuh teng y kai kalau ai,’ napi tapi ba,” napi.

¹⁸Mari Makdilini ly chei i abangnaichi teng y, “Areng ai kaniu bo,” napi; mymy teng y ni i leu thui nai py ang thui pi teang.

¹⁹Naibaly huni kani saryhrei nai angchei i kani dym mang y ly, Judachi ai jei nai deaungkho y abangnaichi ly mymychi i awm naira yhm katheu kho veng nai bo y Isu ly nichi theung y angdo i nichi teng y, “Nangchi teng y paleung awmnem naira awm sy,” napi.

²⁰Naibaly huna nai thui pajau baly mymy i kiu hawi pana py nichi teng y patei. Hunaibaly abangnaichi ly Areng ai niu baly kawn parai.

²¹Naibaly Isu my nichi teng y, “Nangchi teng y paleung awmnem naira awm sy. Ampo my kai ai pato nai kamta, nangchi ai py kaimy kang pato teang he,” napi bi.

²²Naibaly huna nai leu thui pajau baly nichi i tlang tleaung y taho i nichi teng y, “Phailo Kachai ngo u;

²³ami i kamngochi py nangchi my pahen nai ngierei ly pahen nai bo; ami i kamngochi py nangchi my pahen y nai ngierei ly pahen y nai bo,” napi.

²⁴Na i py Isu jeu nai khala y Thoma, holai nyhrei theung i leaungrei, Diduma napi nai ly nichi teng y by y.

²⁵Hunaibaly abangnai takhrachi my ly ni teng y, “Areng ai kaichi niu bo,” napi. Na i py mymy ly nichi teng y, “Ni i kiu y sengmo tahen nai satlang kai niu y baly, sengmo tahen nai satlang y kai i kiu pajeung katapo y baly, kai i kiu py ni i pana y katapo khyp y baly kai ym ai nai aveng,” napi.

²⁶Naibaly kani tajarei bo y abangnaichi ly yhm angtheung y awm bi i, Thoma py nichi teng y awm teang. Naibaly Isu my jeu i katheu kho veng i py nichi theung y angdo iy nichi teng y, “Nangchi teng y paleung awmnem naira awm sy,” napi.

²⁷Naibaly mymy ly Thoma teng y, “Nang i kiu pajeung thawi ly kai i kiu khen cham; nang i kiu thawi ly kai i pana y tapo; ym y naimy awm moh, ym ba,” napi.

²⁸Thoma my ni teng y, “Kai i Areng hawi kai i Tameuh,” nanai pathang.

²⁹Isu my ni teng y, “Nang ly kai ai niu nai deaungkho y ym nai teu; niu y nai ym nai ngierei ly taham hawi,” napi.

³⁰Naibaly Isu my abangnaichi i mei ka-niu y ka-ma-ra takhra neangneang sa, hunichi ly hini cha-iu y tajiu nai ny y leang;

³¹na i py Isu ly Krista, Tameuh i Chapo ne, nanai nangchi ym ai nai hawi, nangchi ym iy mymy i amyn y hengra nga ai nai py hinichi tajiu nai ne.