Read Khumi Chin JOHAN 21 Bible Online

JOHAN 21 - Khumi Chin bible

JOHAN 21

¹Hunai bo y Isu ly Tiberi ang y abangnaichi teng y amteng bi i, hina nai ka-tawm amteng.

²Simon Petera hawi Thoma, Diduma napi nai hawi, Kalili pri i Kana avang i khumi Nathanaela hawi, Zebedai i chapo nini hawi, abangnai takhra leaung nyhrei py awm achu i,

³Simon Petera my nichi teng y, “Ngo hau ai nai kachei ai he,” napi. Nichi my ly ni teng y, “Kaichi py nang hawi chei teang ai,” napi. Naibaly amsa u i paleaung y atang; na i py huni dym ly sai py ngo y.

⁴Naibaly khutawi hawihai y rai kha y Isu ly palang y angdo; na i py abangnaichi ly Isu ne nanai pany y.

⁵Hunaibaly Isu my nichi teng y, “Bechi awi, atiti cha ai nai awm a?” napi.

⁶Nichi my ly, “By y,” napi. Hunaibaly Isu my nichi teng y, “Lamtang mang i paleaung jyh phai paleupy jang, nga ai mang,” napi. Naibaly jang u i ngo nawi nai deaungkho y atheu pajau y.

⁷Hunaibaly abangnai leaungrei Isu my tamen nai my ly Petera teng y, “Areng na a ho ly,” napi. Hunaibaly Areng ne, nanai Simon Petera pany baly, tlang ka-keu awm nai y baichu apam i ang y tlenrei kyh my satla.

⁸Na i py abangnai takhrachi ly paleaung katheang mang paleupy ngo hawi verei ryh naimy ahai tapai; (kacheng hawi neangneang palo y, miu chungvai nyhrei mo awm kyh).

⁹Naibaly nichi ly kacheng y angkhyh baly hu y ly maisaei hawi mai sa nai angchi y ngo hawi tako pangai nai niu u.

¹⁰Naibaly Isu my nichi teng y, “Vai nangchi i ngo nga nai phyrei ly lo u,” napi.

¹¹Hunaibaly Simon Petera ly atang iy ngo len pui pui tlai paleupy kawi pri naimy kacheng y ryh i, chungvai atlo vui pang tariu thomrei awm na; hu jirei adang i py paleupy ly den py asei y.

¹²Naibaly Isu my nichi teng y, “Jeu u ly, cho u,” napi. Na i py abangnaichi theung y ami py ni teng y, “Nang ly ami mo?” nanai deng vam y, Areng ne nanai ly pany nai bo.

¹³Naibaly Isu ly jeu iy tako la i mychi teng y pei, hunai kamta ngo py pei teang.

¹⁴Huni ly Isu my kadeichi theung i nai angthau bi nai bo y abangnaichi teng y pa-thom amteng nai ne.

¹⁵Naibaly nichi ly cha pajau bo nabaly Isu my Simon Petera teng y, “Simon, Johan i chapo, nang ly hinichi tleaung y kai ai tamen keh a?” napi. Ni my ly ni teng y, “Ne, Areng awi, kai ly nang ai khrei nanai nang pany chy bo,” napi. Ni my ly ni teng y, “Kai i beram chochi ai pacho” napi.

¹⁶Naibaly pa-nyh ni teng y, “Simon, Johan i chapo, nang ly kai ai tamen a?” napi bi. Ni my ly, “Ne, Areng awi, kai ly nang ai khrei nanai nang pany chy bo,” napi bi. Mymy ly ni teng y “Kai i beramchi ai kry,” napi.

¹⁷Naibaly pa-thom ni teng y, “Simon, Johan i chapo, nang ly kai ai khrei a?” napi. Naibaly tlen thomrei ni teng y, “Nang ly kai ai khrei a?” napi veangveang nai deaungkho y Petera ly paleung mawn i ni teng y, “Areng, nang ati cheaungkhang pany, kai ly nang ai khrei nanai py nang pany chy bo,” napi. Isu my ni teng y, “Kai i beramchi ai pacho.

¹⁸Meitang khypkhyp kang thui pi, nang ly thawndeang khala y neina akyn iy, nangmy ngai naira tleirei y aleaung; na i py miteaung bo nabaly nang ly kiu palam ai i ami my kawm hai iy, nang i ngai y naira mang y ang pahawi ai,” napi.

¹⁹(Huni leu ly ati mana nai mo nabaly mymy ly Tameuh ai palo ai nai pany hai nai sai thui nai ne) Naibaly mymy ly huna nai thui pajau iy ni teng y, “kai teng y abang,” napi.

²⁰Naibaly Petera ly amhi i abangnai leaungrei Isu my tamen nai, dym biu cha nai khala y Isu i paleung y anghawi nai keung, “Patiu hai ai nai khumi ly ami mo?” nanai keung ai ly abang nai niu.

²¹Naibaly Petera ly ni ai niu i Isu teng y, “Hini khumi ly ati sa ai mo?” napi.

²²Isu my ni teng y, “Kai kang jeu bi nai khala khrairei mymy awm jo ai nai kai ngai baly nang ly mana sa nai? Nang ly abang phai abang,” napi.

²³Hunaibaly huni abangnai ly dei y ai nai leu ly amjo amnauchi theung y amthang hai; na i py Isu ly, “Dei y ai,” nanai ni teng y thui y: “Kai kang jeu bi nai khala khrairei mymy awm jo ai nai kai ngai baly, nang ly mana sa nai?” napi nai khyh.

²⁴Huni abang nai my ly hini satang pany hai nai keung hawi tajiu nai keung ne; ni i satang pany hai nai ly teng parai, nanai achi pany.

²⁵Naibaly hinichi ny y naimy Isu i atiti sa nai takhra neangneang awm asai rai. Hunichi ly tajiu bebe i khyly, tajiu ai nai cha-iu bawibawi ly khaileaung pri y py akeaung ai nai athang by y.