Read Khumi Chin JOHAN 3 Bible Online

JOHAN 3 - Khumi Chin bible

JOHAN 3

¹Naibaly Pharisachi theung i khumi leaungrei amyn ly Nikodema, Juda i sara leaungrei awm.

²Huni khumi ly vum y Isu teng y chei i ni teng y, “Sara! Tameuh teng i nai leu patiu nai keung y nang jeu, nanai kaichi pany; ati mana nai mo pany baly Tameuh my awm hai y baly hini nang i rengrang sa naichi ka-tawm ami py so thai y,” napi.

³Isu my pathang i ni teng y, “Meitang khypkhyp kang thui pi, khumi ami py kangtha tapen y baly Tameuh i peang naira niu thai y leang,” napi.

⁴Nikodema my ni teng y, “Khumi ly miteaung acheang nai bo y mana nai tapen bi thai ai mo? Ni i amhm taku y tlen pa-nyh kun bi iy tapen bi thai ai a?” napi.

⁵Isu my pathang i, “Meitang khypkhyp kang thui pi, khumi ami py tui y hawi Phailo y tapen y baly Tameuh i peang naira y kun thai y leang.

⁶Tlang y tapen nai ly tlang ne: Phailo y tapen nai ly phailo ne.

⁷Nang ai kangtha tapen ai nai tla kang napi nai ly rengrang ti moh.

⁸Ali ly ma mang y py ngaingai ra y theu, tyn ly nang thai, na i py ma mang i dengdairei theu nai mo, ma mang y aho nai mo, nanai nang pany y; Phailo i tapen nai ngierei ly hunai kamta ne teang, “napi.

⁹Nikodema ly ni teng y, “Huna nai ly mana awm thai ai mo?” nanai pathang.

¹⁰Isu my pathang i ni teng y, “Nang ly Israelachi i sara be, huna nai pany thai y nai sai a?

¹¹Meitang khypkhyp kang thui pi, kaichi i pany nai ly kaichi thui, kaichi i niu nai py kaichi pany hai, na i py kaichi i pany hai nai leu ly nangchi ym y lawh.

¹²Khaileaung pri i satang atiti kang thui pi nai malawn py ym u y baly, kani pri mang i satang atiti kang thui pi nai ipsaly mana ym u ai mo?

¹³Kani pri i dengdairei satla kathiu nai keung ny y baly ami py kani pri y lyn vai y; huni ly Khumi i Chapo ne:mymy ly kani pri y awm nai he.

¹⁴Naibaly ami py ni ai ym nai ngierei ly mymy deaungkho y deungtasarei hengra nga thai ai nai,

¹⁵Mosi my daichi ka-vym y pavui dang nai kamta ly, Khumi i Chapo ai dang naimy awm teang ai nai tla.

¹⁶“Tameuh my khaileaung pri y khrikhri pa-rei tamen, hunaibaly my i Chapo leaungrei awm khyh nai pei keih, ami py mymy ai ym nai ngierei ly tamo y ai, deungtasarei hengra nga lawh ai.

¹⁷Tameuh my khaileaung pri ai pasum ai nai Chapo ai pato nai ny y, khaileaung pri ly mymy deaungkho y heng thai ai nai pato nai teu.

¹⁸Ami py mymy ai ym nai ngierei ai ly pasum y leang bo; ym y nai ngierei ai ly Tameuh i chapo leaungrei awm khyh nai i amyn y ym y nai deaungkho y pasum yb bo.

¹⁹Pasum naira ly hini ne he: kangvang ly khaileaung pri y ang tym bo, na i py khumichi i atiti sa naichi ly hawi y nai deaungkho y, nichi ly kangvang tleaung y kaveng ngai keh bo.

²⁰Ami py hawi y sa nai ngierei ly kangvang niu ngai y, kangvang y py theu y, ti y baly mymy i hawi y sa nai preng lawh na.

²¹Na i py ami py kateng sa nai ngierei ly mymy i atiti sa naichi Tameuh i saho y sa nai ne, nanai amteng hai ai nai kangvang y theu ai,” napi.

²²Hunai bo y ly Isu hawi abangnaichi ly Judai pri y chei iy, mymy ly nichi hawi vanrei awm jo i baptis sa.

²³Johan my py Salim avang ahawi y Ainon meingtym y tui nawi nai deaungkho y hu y baptis sa teang; naibaly khumichi ly chei i baptisma nga u bo.

²⁴Hunai khala y ly Johan ai theaung y khai y rai.

²⁵Naibaly Johan teng y abangnaichi hawi Juda leaungrei ly paju pachai nai leu y aei u.

²⁶Naibaly nichi ly Johan teng y chei i ni teng y, “Rabbi, Jordan vai y nang teng y awm nai keung my ly, ni i satang nangmy khumichi ai pany hai nai ly khen cham, mymy ly baptis sa, khumi bawibawi py ni teng y chei,” napi.

²⁷Johan my nichi teng y, “Kani pri mang i nai pei nai ny y baly khumi ly ati sai py ngo thai y leang.

²⁸Kai Krista ny y leang, kai ai ni i mo y pato nai ne kana nai ly nangmychi my pany hai nai keung ne.

²⁹Aju la nai keung ly neampachy ai nga nai keung ne: na i py angdo iy ni i leu thai nai aju la nai keung i ahawi ly, aju la nai keung i raawi deaungkho y khrikhri pa-rei kawn; hunai deaungkho y hini kai i kawn naira ly tym angym nai bo he.

³⁰Ni ly veang ai nai tla, kai ly jum ryry ai nai tla.

³¹“Salo mang i dengdairei jeu nai ly ati cheaungkhang bawibawi tleaung y salo keh nai ne; khaileaung y tapen nai my ly khaileaung i khumi ne, khaileaung i leu py thui; kani pri mang i dengdairei jeu nai ly ati cheaungkhang bawibawi tleaung y salo keh nai ne.

³²Mymy i niu nai hawi thai nai ngierei ly ang pany hai i, ami py ni i pany hai nai leu ym y.

³³Mymy i pany hai nai leu ym nai khumi my Tameuh ly meitang ne, nanai mymy i pajawp typ nai ka-ma-ra sa bo.

³⁴Tameuh i pato nai keung ly Tameuh i leu thui reng; Tameuh ly pata kalei iy Phailo ai pei nai ny y.

³⁵Ampo my Chapo ai tamen i, ati cheaungkhang bawibawi ai ly ni teng y au bo.

³⁶Ami py Chapo ai ym nai ngierei ly deungtasarei hengra nga bo; na i py Chapo ai ym y nai ngierei ly hengra ngo y ai i, Tameuh i kado theu nai ly ni teng y awm jo,” nanai pathang.