Read Khumi Chin JOHAN 4 Bible Online

JOHAN 4 - Khumi Chin bible

JOHAN 4

¹Naibaly Isu ly Johan tleaung y abangnai nawi keh naichi nga nai hawi, baptis sa nai py Pharisaichi my thai, nanai Areng my pany baly,

²mymy ly Judai pri i nai theu iy Kalili pri y vawi ali teang:

³(ne mang ly Isu kypkyp ly baptis so y leang, abangnaichi my sa lawh.)

⁴Hunaibaly mymy ly Samari pri y tako prei ai nai avo i,

⁵Jakob ly my i chapo Josepha teng y pei nai meingtym ahawi y Samari avang harei, Sukara napi naira y tym: Jakob i tuikan py hu y awm.

⁶Hunaibaly Isu ly tako akawm nai deaungkho y tuikan ahawi y ateh pawh; kanithun biu cha neng ne.

⁷Naibaly Samari neampachy leaungrei tui deu ai nai jeu i, Isu my ni teng y,

⁸“Kai ai nei ai nai pei ba,” napi; abangnaichi khy teicha teinei van ai nai avang y chei u bo.

⁹Hunaibaly Samari neampachy ly ni teng y, “Nang ly Juda khumi ne, kai ly Samari neampachy ne:atimana nai kai teng y nei ai nai hnei mo?” napi; (ati mana nai mo nabaly Judachi ly Samarichi hawi ati ra y py amkawm vai y.)

¹⁰Isu my ni teng y, “Tameuh i atiti pei nai hawi, nang teng y Kai nei ai nai pei ba’ napi nai keung ai nang pany i khyly, nangmy ni teng y hnei lawh ai i, ni my ly tui kangheng ang pei ai bo,” nanai pathang.

¹¹Naibaly neampachy my ni teng y, “Areng, nang ly atheura ati sai py by y pui be, tuikan ly thiu parai; nang ly huni tui kangheng ma mang i nai nga mo?

¹²Nang ly kaichi i amsi Jakob tleaung y len keh a? Ni ly hini tuikan ang pei i, mymy py mymy i chanauchi py tawnbawichi py nei,” napi.

¹³Naibaly Isu my ni teng y, “Ami py hini tui nei nai ngierei ly tui ahai bi ai;

¹⁴ami py kai i pei ai nai tui nei nai ngierei ly tlen py tui ahai y ai; kai i ni teng y pei ai nai tui ly my i taku theung y tuino awm ai i, deungtasarei hengra tym pa-rei achawn ai,” nanai pathang.

¹⁵Neampachy ly ni teng y, “Areng, kai ly tui ahai y ai nai hawi, hi khrai khrairei tui deu ai jeu y ai nai py huni tui kai teng y pei ba,” napi.

¹⁶Naibaly Isu my ni teng y, “Chei ly, nang i juvo ai palau ly, hi y jeu bi ba,” napi.

¹⁷Neampachy my ly ni teng y, “Kai ly juvo by y pui be,” nanai pathang. Isu my ni teng y, “Kai ly juvo by y pui be,’ nanai ly teng parai mang; nang ly juvo pangrei awm bo,

¹⁸vai i nai ly nang i juvo ny y leang khyp; hini nang i leu thui nai ly teng khyp mang,” napi.

¹⁹Neampachy my ni teng y, “Areng, nang ly amo ne, nanai kai pany bo.

²⁰Kaichi i amsi sangumchi ly hini mawi y Tameuh ai chiu reng; na i py nangchi ly, Khumichi i Tameuh ai chiu ai nai meingtym ly Jerusalem avang y awm,’ napi u lawh,” napi.

²¹Naibaly Isu my ni teng y, “Lo awi, kai i leu sai ym: hini mawi y py, Jerusalem avang y py nangchi ly Ampo ai chiu y ai nai neng tym ai bo.

²²Nangchi i chiu nai ly nangchi pany y: kaichi i chiu nai ly kaichi pany; lawi hai ai naira ly Judachi theung i nai theu ai.

²³Na i py neng tym dudu bo, vai py tym ryp bo, huna nai khala y ly Tameuh ai chiu tatang naichi ly phailo hawi meitang khyp naimy Ampo ai chiu ai: Tameuh ly mymy ai chiu ai nai huna naichi ai ly hau mang.

²⁴Tameuh ly Phailo ne; mymy ai chiu nai keungchi ly phailo hawi meitang khyp naimy ni ai chiu ai nai tla,” napi.

²⁵Naibaly neampachy my ni teng y, “Messia, Krista napi nai ang jeu ai, nanai ly kai pany:ni ly ang jeu khala y ly ati cheaungkhang ang thui pi ai,” napi.

²⁶Isu my ni teng y, “Kai nang ai arum hai nai keung ly ne bo,” napi.

²⁷Naibaly hunai thym khala y abangnaichi ly ang jeu i, neampachy hawi arum nai ly lyh parai; na i py ami py ni teng y, “Nang ly ati hau mo? Neampachy hawi ati mana nai arum mo?” nanai tapi y.

²⁸Hunaibaly neampachy ly mymy i tui kacheang khai jo iy, avang y chei i khumichi teng y,

²⁹“Jeu u ly, kai i atiti sa nai ngierei ang thui pi ryp ryp nai keung khumi leaungrei ai khen u cham. Hini ly Krista ny y a?” napi.

³⁰Naibaly nichi ly avang i nai theu iy ni teng y chei u tapai.

³¹Hunai sala y abangnaichi my ly ni teng y, “Sara, cho ba,” napi.

³²Na i py ni my ly nichi teng y, “Kai ly nangchi i pany y nai biu cha ai nai awm,” napi.

³³Hunaibaly abangnaichi ly arum i, “Ni i cha ai nai ami my syn pi cham be?” na u.

³⁴Isu my nichi teng y, “Kai ai pato nai keung i kangai sa ai nai hawi, ni i kalop sa pajau ai nai ly kai i biu ne.

³⁵Nangchi ly, ‘Choh tyn ai nai ly lo palyhrei awm rai,’ na u mo kana? Khen u cham, kang thui pi, angdeang u ly, hlau y khen u cham, vai py tyn ai nai aau jawn bo.

³⁶Hei nai keung hawi tyn nai keung py kawn ahawi thai ai nai, tyn nai keung ly vang nga i, deungtasarei hengra tym pa-rei awm ai nai athai pakym.

³⁷‘Leaungrei ly hei, khumi takhra my tyn,’ nanai leu ly hunira y ly teng parai.

³⁸Nangmychi i so y naira y tyn ai nai kang pato; khumi takhrachi my sa iy nichi i sa angchi ly nangchi my patawm bo,” napi.

³⁹Naibaly huni neampachy ly, “Kai i atiti sa nai ngierei ly ang thui pi ryp ryp,” nanai pany hai nai leu deaungkho y, huni avang i Samari khumi neangneangchi ly Isu ai ym bo.

⁴⁰Hunaibaly Samari khumichi ly mymy teng y jeu u i, mychi teng y awm ai nai takeng; hunaibaly mymy ly hu y kani nyhrei ni awm.

⁴¹Naibaly khumi takhra neangneangchi py mymy i leu deaungkho y ym bi.

⁴²Nichi ly neampachy teng y, “Vai taleang ly kaichi nang i leu thui nai deaungkho y ym nai ny y leang bo: kaimychi kypkyp my ni i leu thai iy, hini ly khaileaung pri ai lawi hai nai keung ne khyp, nanai pany bo,” napi.

⁴³Naibaly huni kani nyhrei bo y mymy ly hu i dengdairei theu i, Kalili pri y chei.

⁴⁴Isu mymy kypkyp ly, amo ly amy i meingtym y ly tahm by y, nanai pany hai.

⁴⁵Hunaibaly mymy ly Kalili pri y tym i, Kalili pri i khumichi my Jerusalem avang y pawi y awm nai khala y ni i atiti sa nai bawibawi ly niu nai deaungkho y ni ai kawn u: nichi py pawi y chei teang bo.

⁴⁶Hunaibaly mymy ly Kalili pri, Kana avang y tui kreip athai hang palawn hai naira y tym bi. Naibaly ami mo khumi kanang leaungrei awm i, ni i chapo ly Kapernaum avang y no.

⁴⁷Mymy ly Isu Judai pri i dengdairei Kalili pri y ang jeu nanai thai baly ni teng y chei i, mymyi chapo dei vi dei vi nai deaungkho y, jeu kathiu iy ni ai hawi sa ai nai takeng.

⁴⁸Isu ly ni teng y, “Nangchi ly ka-ma-rachi hawi lyh ai awm naichi py niu y baly pipi ym ai ny y leang,” napi.

⁴⁹Khumi kanang my ni teng, “Areng, kai i chanau dei y rai kha y my jeu kathiu ba,” napi.

⁵⁰Isu my ni teng y, “Vawi ali teang teu ba, nang i chapo ly hawi bo mang,” napi. Naibaly huni khumi ly Isu my ni teng y leu thui pi nai ly ym i tako bo.

⁵¹Naibaly mymy ly tako kathiu nai thym khala y ni i miseaungchi ly lamchung i, “Nang i chapo ly hawi bo,” napi.

⁵²Ni ly mymychi teng y ni i hawi angchei nai neng deng i, nichi ly ni teng y, “Jangdyh kani amheng khyp khala keaung pra bo,” napi.

⁵³Hunaibaly Isu my ni teng y, “Nang i chapo ly hawi bo mang,” napi nai neng ne khyp, nanai ampo my pany bo; naibaly mymy hawi ni i dengtheungchi bawibawi py ym u.

⁵⁴Huni ly Judai pri i nai Kalili pri y jeu kha y Isu i pa-nyh rengrang sa nai ne.