Read Khumi Chin JOHAN 6 Bible Online

JOHAN 6 - Khumi Chin bible

JOHAN 6

¹Huna nai bo y Isu ly Kalili ang, Tiberi ang napi nai vai mang y chei vui.

²Naibaly no naichi i tlang tleaung y mymy i atiti lyh ai sa naichi ly nichi niu nai deaungkho y, khumi mipui ka-teng ny y nai mymy ai hui u.

³Naibaly Isu ly mawi y lyn kalau i hu y ly abangnaichi hawi ateh.

⁴Naibaly Judaichi i Katlen Vui nai pawi ly kasa bo.

⁵Hunaibaly Isu ly angdeang i khumi mipui ka-teng ny y nai mymy mang y tapai nai niu i Philipa teng y, “Hinichi cha ai nai achi ly tako ma mang i nai van ai mo?” napi.

⁶Huni ly mymy ai cham ai nai thui nai teu, amy i sa ai nai sai ly mymy pany yb nai bo.

⁷Philipa my ly ni teng y, “Khumi leaung leaungrei maidenrei anga bawibawi ai nai ly tako pia vui pangrei nai tangka cho chungvai nyhrei vang abym y leang,” nanai pathang.

⁸Naibaly abangnaichi theung i leaungrei Simon Petera i amnau Andria my ly ni teng y,

⁹“Changleung tako phi pangrei hawi ngo nyhrei awm nai neampacho deaungdi leaungrei hi y awm hi, na i py khumi hi jirei theung y huni ly ati tahm awm ai mo?” napi.

¹⁰Naibaly Isu my, “Khumichi ai ateh hai u,” napi. Huni meingtym y ly acha kangheng neangneang awm i, neampacho ka-cheangchi ly ateh, nichi i nawi nai sai ly sang pangrei tahm awm ngaw khyh.

¹¹Hunaibaly Isu ly tako phi la iy, kawn nai leu thui pajau baly ateh naichi teng y paji; huna nai kamta ngo py mymychi i kangai ryrei paji teang.

¹²Naibaly nichi ly kajeu kawi iy mymy ly abangnaichi teng y, “Ati sai py tamo y ai nai kamlai ly akhiu u,” napi.

¹³Hunaibaly akhiu u i changleung tako phi pangrei cha nai keungchi i cha kamthom ly teaung holai nyhrei kawi teang.

¹⁴Naibaly khumichi ly mymy i rengrang sa nai niu baly, “Hini ly khaileaung pri y jeu ai nai amo ly ne khyp na a hi ly,” napi.

¹⁵Hunaibaly nichi ly mymy ai samrang palawn ai nai patiu ta-li ai nai jeu ai, nanai Isu my pany i, mymy tlairei mawi y chei takhra bi.

¹⁶Naibaly kani dym bo nabaly abangnaichi ly ang y chei kathiu i paleaung y atang iy, ang mang y Kapernaum avang y tapai.

¹⁷Naibaly veng bo, Isu khy nichi teng y tym y rai.

¹⁸Naibaly ali khu khri pa-rei theu nai deaungkho y tui sampyh ly asang ryh asang ryh.

¹⁹Hunaibaly nichi ly hlau apom phai pangrei mo hlau phairei mo pa-taw aeaung nai kha y, Isu ai ang tleaung y tako iy paleaung y kasa nai niu i jei u.

²⁰Na i py mymy ly nichi teng y, “Kai teu na a, jei u moh,” napi.

²¹Hunaibaly mymy ai paleaung y atang hai ai nai ngai u i, tlenrei khyh my paleaung ly mychi i angpeang ai tau nai mang y tym praw bo.

²²Khawn mang y ly ang vai mang y angdo nai khumi mipuichi ly paleaung harei ny y baly paleaung takhra by y nanai hawi, Isu ly abangnaichi teng y paleaung y atang y i, abangnaichi ly mymychi my tlairei chei nanai py niu u.

²³Na i py Areng ly kawn nai leu thui nai bo y nichi i tako cha nai meingtym ahawi y ly Tiberi avang i dengdairei paleaung chy tym reng.

²⁴Hunaibaly khumi mipuichi ly Isu py abangnaichi py by y, nanai pany baly, nichi py paleaung chy mang atang i Isu ai hau ai nai Kapernaum avang y chei u.

²⁵Naibaly nichi ly ang vai y mymy ai niu baly ni teng y, “Rabbi, nang ly hi mang mana khala y tym mo?” napi.

²⁶Naibaly Isu my nichi teng y, “Meitang khyp kang thui pi, nangchi ly kai i rengrang sa naichi niu nai deaungkho y kai ai hau nai ny y leang, nangchi ly tako phi cha nai kajeu kawi nai deaungkho y teu.

²⁷Phra nai biu nga ai nai ny y naimy, deungrasarei hengra tym pa-rei awm jo ai nai biu, Khumi i Chapo my ang pei ai nai phai tau u tanga; Ampo, Tameuh my ni ai pajawp hai typ bo.

²⁸Naibaly nichi my ly ni teng y, “Kaichi ly Tameuh i kalop sa thai ai nai ati sa ai nai tla mo?” napi.

²⁹Isu ly nichi teng y, “Ni i pato nai keung ai ym ai nai ly Tameuh i kalop sa nai he,” napi nai pathang.

³⁰Nichi my ly ni teng y, “Kaichi niu iy kang ym thai ai nai ati ka-ma-ra patei ai mo?

³¹Nang ly ati sa ai mo? Kaichi i amsichi ly daichi ka-vym y manna cha u, ‘Kani mang i dengdairei ly mychi teng y tako cha ai nai ang pei,’ nanai tajiu nai kamta,” napi.

³²Naibaly Isu my nichi teng y, “Meitang khypkhyp kang thui pi, kani pri mang i dengdairei nangchi i tako nga nai ly Mosi my ang pei nai ny y leang; na i py Ngaai my ly kani pri mang i dengdairei tako tatang ang pei.

³³Tameuh i tako ly kani pri mang i dengdairei satla i, khaileaung pri teng y hengra pei nai keung ne,” napi.

³⁴Naibaly nichi ly ni teng y, “Areng, huni tako ly kaichi ai deungtasa khrairei pei ba,” napi.

³⁵Naibaly Isu my nichi teng y, “Kai ly heng nai tako ne:ami py kai teng y jeu nai ly biu alam y ai, ami py kai ai ym nai ly mana khala y py tui ahai y ai.

³⁶Na i py nangchi kai ai niu iy py ym u y, nanai kang thui pi bo.

³⁷Ampo my kai ai pei nai bawibawi ly kai teng y jeu bebe ai; ami py kai teng y jeu nai ai ly den py kapatheu y ai.

³⁸Kai ly kaimy i kangai sa ai nai ny y naimy, kai ai pato nai keung i kangai sa ai nai kani pri mang i dengdairei kang satla kathiu nai teu.

³⁹Hini ly kai ai pato nai keung i kangai ne:ni i ang pei nai bawibawi theung i nai ati sai py tamo y ai i, kani kangkhym y ly kaimy pathau lawh ai.

⁴⁰Ngaai i kangai ly hini ne he: Ami py Chapo ai niu iy ym nai ngierei ly. deungtasarei hengra nga ai i, ni ai kani kangkhym y ly kaimy pathau ai,” napi.

⁴¹Hunaibaly mymy ly, “Kani pri mang i dengdairei satla kathiu nai tako ly kai ne,” napi nai deaungkho y Judachi ly mymy ai preaung i,

⁴²“Hini khumi ly Josepha i chapo Isu ny y lawh a? Ni i amhm ampo ai py achi pany be. ‘Kani pri mang i dengdairei kang satla kathiu nai ne,’ nanai ly mana nai thui nai mo?” napi.

⁴³Naibaly Isu my nichi teng y, “Apreaung u leungtang ryry reng moh.

⁴⁴Kai ai pato nai keung ampo my ni ai pahawi ryp y baly, ami py kai teng y jeu thai y; naibaly kai ly kani kangkhym y ly ni ai pathau ai.

⁴⁵Amochi i cha-iu y ly, ‘Tameuh my nichi bawibawi ai patiu ai,’ nanai tajiu nai ne. Ami py Ampo i leu thai iy amtiu nai ngierei ly kai teng y ang jeu.

⁴⁶Ne mang ly Tameuh teng i theu nai keung leaungrei ny y baly ami py Ampo ai niu vai y leang; mymy ly Ampo ai niu bo.

⁴⁷Meitang khypkhyp kang thui pi, ym nai khumi ly deungtasarei hengra nga bo.

⁴⁸Kai ly heng nai tako ne.

⁴⁹Nangchi i amsichi ly daichi ka-vym y manna cha, na i py dei bo.

⁵⁰Ami py cha iy dei y ai nai hini ly kani pri mang i dengdairei satla kathiu nai tako ne.

⁵¹Kani pri mang i dengdairei satla kathiu nai heng nai tako kai ne, ami py hini tako cha baly deungtasarei heng jojo ai; ne, khaileaung pri heng ai nai kai i kang pei ai nai tako ly kai i ngan ne,” napi.

⁵²Hunaibaly Judachi ly aei u leungtang i, “Hini khumi ly ni i ngan cha ai nai mana ang pei thai ai mo?” napi.

⁵³Isu my nichi teng y, “Meitang khypkhyp kang thui pi, nangchi ly Khumi i Chapo ngan cha iy, ni i thi nei y baly, nangmychi teng y hengra by y leang bo.

⁵⁴Kai i ngan cha nai hawi thi nei nai khumi ly deungtasarei hengra nga bo, naibaly kani kangkhym y ly kaimy ni ai pathau ai.

⁵⁵Kai i ngan ly teicha teinei tatang ne, kai i thi ly nei ai nai tatang ne.

⁵⁶Kai i ngan cha iy kai i thi nei nai khumi ly kaimy teng y awm jo, kai py mymy teng y awm jo.

⁵⁷Heng nai Ampo my ly kai ai pato i, kai ly ampo i saho y heng nai kamta ly, kai ai cha nai khumi kypkyp py kaimy i saho y heng ai.

⁵⁸Hini ly kani pri mang i dengdairei satla kathiu nai tako ne; amsichi ly cha iy dei nai kamta ny y leang: hini tako cha nai khumi ly deungtasarei heng jojo ai,” napi.

⁵⁹Mymy ly Kapernaum avang y leu patiu nai thym khala y huni satang ly achura yhm y ang thui pi.

⁶⁰Hunaibaly abangnaichi neangneang ly huna nai thai i, “Hini leu ly khri pa-rei rai na, ami tangai thai ai mo?” napi.

⁶¹Hunaibaly abangnaichi my huni leu y preaung, nanai Isu ly mymy i paleung y pany i nichi teng y, “Nangchi ly hini leu y paleung hawi u y lawh kha?

⁶²Khumi i chapo ly mymy i jangni i awm naira y lyn kalau nai nangchi niu lawh baly mana sa u ai mo?

⁶³Phailo ly paheng nai keung ne, tlang ly ati sai py kamran by y leang; hini nangchi teng y kai i leu thui nai ly phailo py ne, hengra py ne.

⁶⁴Na i py nangchi theung y phyreichi ly ym y nai khumi ne,” napi. Ati mana nai mo nabaly Isu ly mymy ai ym y naichi hawi, patiu hai ai nai keung ai py angchei kha i dengdairei pany yb bo.

⁶⁵Naibaly mymy naimy, “Huna nai y chy bo, Ampo my pei y baly ami py kai teng y jeu thai y leang, kang napi nai ly,” napi.

⁶⁶Hunaibaly abangnai neangneangchi ly anaw veng i, mymy hawi amkawm ali y leang bo.

⁶⁷Hunaibaly Isu my holai nyhreichi teng y, “Nangchi py leh pawn ai nai ngai u teang a?” napi

⁶⁸Simon Petera ly ni teng y, “Areng, kaichi ly ami teng y chei ai mo? Deungtasarei hengra leu ly nang teng y awm chy bo.

⁶⁹Nang ly Tameuh i Khumi Kachai ne, nanai kaichi ym i, pany py pany bo,” nanai pathang.

⁷⁰Isu my nichi teng y, “Nangchi holai nyhreichi ai ly kaimy kang vawi nai ny y a? Nangchi theung i leaungrei ly vawinam ne ryp,” nanai pathang.

⁷¹Huni ly Simon Iskariota i chapo Juda, holai nyhreichi theung y abawi teang nai ai thui nai ne: ni ly mymy ai patiu hai ai nai keung ne.