Read Khumi Chin JOHAN 7 Bible Online

JOHAN 7 - Khumi Chin bible

JOHAN 7

¹Hunai pajau khala y Isu ly Kalili pri y khuleaung chei; Judachi my ni ai padei ai nai hau nai deaungkho y Judai pri y khuleaung chei ai nai ngai y bo.

²Naibaly Judachi i Tai Chy pawi ly kasa bo.

³Hunaibaly ni i amjo amnauchi my ni teng y, “Nang teng y abangnaichi ly nang i atiti sa naichi niu thai ai nai hi i dengdairei theu ly, Judai pri y chei ba.

⁴Ami py amy i satang amthang ai ngai nai khumi ly kangviu y ati sai py so y leang. Hini atitichi ly nang sa tatang baly, khaileaung prichi teng y nangmy ai amteng hai,” napi.

⁵Mymy i amjo amnauchi raurei py ni ai ym y.

⁶Naibaly Isu my nichi teng y, “Kai i neng tym y leang rai; nangchi naini mana khala y py ngaingai sa pajau.

⁷Khaileaung prichi my nangchi ai ly niu ngai y ai nai awm thai y leang mang; kai naini nichi i atiti sa naichi ly hawi y, nanai thui pi pachai reng nai deaungkho y nichi ly kai ai niu ngai y.

⁸Nangchi ly pawira y chei u kalau; kai i neng angym y rai nai deaungkho y hini pawi y kachei kalau y leang rai,” napi.

⁹Naibaly mymy ly huni leu nichi teng y thui iy, Kalili pri y awm jo rai.

¹⁰Na i py mymy i amjo amnauchi ly pawi y chei kalau nai bo y ly, ni py ami pany y naimy kangviu kamta chei kalau teang.

¹¹Naibaly Judachi ly pawira y ni ai hau i, “Mymy ly ma mang y awm mo?” napi.

¹²Naibaly khumi mipuichi ly mymy i satang apreaung u lengleang i phyreichi my ly, “Khumi kahawi na a,” napi; phyreichi my ly, “Ma ne ai mo?

¹³Khumi mipuichi ai tapawp nai teu,” napi. Na i py Judaichi ai jei nai deaungkho y ami py ni i satang ka-thai ra y thui vam y.

¹⁴Naibaly pawi sa nai khala y Isu my achura yhm kalen pui y chei iy leu patiu.

¹⁵Naibaly Judachi ly, “Hini khumi ly cha amtiu vai y naimy mana pany lawh?” napi i lyh parai.

¹⁶Naibaly Isu my nichi teng y, “Kai i leu patiu nai ly kai i ny y leang, kai ai pato nai keung i teu.

¹⁷Ami py mymy i kangai sa ai nai ngai nai khumi ly leu patiu nai ly Tameuh i patheu nai mo, kaimy i paseang iy thui nai mo, nanai pany ai.

¹⁸Ami py amy i leu paseang iy thui nai ly amy ai apalo naira hau nai teu; pato nai keung ai palo naira hau nai ly huni khumi kypkyp ly meitang ne, mymy teng y ly hawi y naira den py by y.

¹⁹Mosi ly nangchi teng y Reita ang pei y a? Na i py nangchi theung y ami py Reita patawm y leang. Nangchi ly ati mana nai y kai ai padei ai nai hau u lawh mo?” nanai pathang.

²⁰Naibaly khumi mipuichi my ly, “Nang ai vawinam my nam nai teu:nang ai ami my padei ai nai hau mo?” nanai pathang.

²¹Isu my nichi teng y, “Kai i sairei sa naira y ly nangchi bawibawi rengrang tlai napi.

²²Hina nai y na a, Mosi my lengkhym takip ai nai leu ang pei, ne mang ly huni ly Mosi i leu pei nai ny y i, amsichi i leu pei nai teu; naibaly Anawn Kani y py nangchi ly neampacho ai lengkhym takip u reng.

²³Mosi i Reita taphra y ai nai Anawn Kani y py neampacho ai lengkhym takip u makho baly, Anawn Kani y kai ly neampacho ai angym pa-rei no hawihai veng nai deaungkho y kado theu u a?

²⁴Salo y khen phriu naimy chih moh, na i py hawihai palai dawn iy chih u,” nanai pathang.

²⁵Naibaly Jerusalem avang i khumi phyreichi ly, “Hini khumi ai ly padei ai hau u nai ny y a?

²⁶Khen cham, mymy ly mo y thui be i nichi ly sai py tlau y. Mymy ly Krista ne, nanai miteaung kehchi my pany tatang nai sai a?

²⁷Na i py hini khumi ly ma mang i theu nai mo, nanai achi my pany be; na i py Krista ly ang tym khala y ma mang i theu nai mo, nanai ami py pany ai ny y,” napi.

²⁸Hunai deaungkho y Isu ly achura yhm kalen pui y leu patiu nai tarawi y aeu i, “Nangchi ly kai ai pany, kai ly ma mang i theu nai mo, nanai py nangchi pany mang. Kai ly amy ngaingai kang jeu nai ny y leang, kai ai pato nai keung ly meitang khypkhyp ne, ni ai ly nangchi my pany y.

²⁹Kai naini ni teng i dengdairei kang theu nai deaungkho y ni ai kapany: ni my kai ai pato bo,” napi.

³⁰Hunaibaly nichi ly mymy ai patiu ai nai hau u, na i py mymy i neng tym y rai nai deaungkho y ami py ni ai nam y.

³¹Na i py khumi mipuichi theung i nai khumi neangneangchi ly mymy ai ym i, “Krista ly ang tym nai khala y hini khumi i sa nai tleaung y rengrang nawi keh so na a?” napi.

³²Naibaly Pharisaichi ly ni i molam y khumi mipuichi i preaung nai leu thai u i, pathyp pi nai keung kalenchi hawi Pharisaichi ly ni ai patiu ai nai miseaung luchi ai pato.

³³Naibaly Isu my, “Tanarei chy sala y nangchi teng y kang awm ai i, kai ai pato nai keung teng y kachei vui ai.

³⁴Nangchi ly kai ai hau ai i niu ai ny y; kai i awmra y py nangchi jeu thai ai ny y,” napi.

³⁵Hunaibaly Judachi ly adeng u i, “Achi ly mymy ai niu y ai nai hini khumi ly ma mang y chei ai mo? Krikchi theung i Ahei Naichi teng y chei iy Krikchi ai py leu patiu ai nai sai a?

³⁶‘Nangchi ly kai ai hau ai i niu ai ny y:kai i awm naira y py nangchi jeu thai ai ny y,’ nanai ly ati mana nai sai mo?” napi.

³⁷Naibaly pawi lui nai kani aly len keh nai khala y Isu ly angdo i, “Ami py tui ahai baly kai teng y jeu iy nei sy.

³⁸Ami py kai ai ym baly Tameuh i cha-iu y tajiu nai kamta tui kangheng tavochi ly ni i taku theung i leaung ai,” nanai aeu.

³⁹Huni leu ly mymy ai ym naichi i nga ai nai Phailo i satang thui nai ne: Isu ai palo y rai nai deaungkho y Phailo pei y rai.

⁴⁰Hunaibaly khumi mipui theung i nai phyreichi ly huni leu thai iy, “Hini ly amo ne khyp nai bo he,” napi.

⁴¹Phyreichi my ly, “Hini ly Krista ne na a,” napi. Phyreichi my ly, “Ma! Krista nai Kalili pri y theu rengrang ai mo?

⁴²Krista ly Davida i kangpreangchi theung i nai, Davida i awm naira avang Bethlehem i nai theu ai nai tla, nanai Tameuh i cha-iu y tajiu nai ny y a?” napi.

⁴³Hunaibaly mymy deaungkho y khumi mipuichi ly amprei iy atakai u bo.

⁴⁴Phyreichi my ly ni ai patiu ai nai ngai, na i py ami py ni ai nam y.

⁴⁵Naibaly miseaung luchi ly pathyp pi nai keung kalenchi hawi Pharisaichi teng y jeu bi i, nichi ly mymychi teng y, “Ati mana nai pahawi u y lawh?” napi.

⁴⁶Miseaung luchi my ly, “Hunai kamta khumi ami py tlen py leu thui vai y leang,” nanai pathang.

⁴⁷Naibaly Pharisaichi ly mymychi teng y, “Nangchi ai py ang tapawp u teang lawh kha?

⁴⁸Miteaung kehchi hawi Pharisaichi theung i nai ami py mymy ai ym bo a?

⁴⁹Na i py hini Reita pany y nai khumi mipuichi ly amsawi lawi nai na a,” nanai pathang.

⁵⁰Naibaly jangvaini y vum y Isu teng y chei nai Nikodema ly nichi theung y abawi teang i mymychi teng y,

⁵¹“Ami i labeaung kypkyp y leu thai iy, ni i atiti sa naichi pany y rai kha y, achi i Reita ly khumi ai chih vai a?” napi.

⁵²Nichi my ly ni teng y, “Nang py Kalili pri i khumi teang lawh kha? Hau cham. Kalili pri i nai amo ami py theu y leang, nanai pany be,” nanai pathang.

⁵³Naibaly nichi leaung leaungrei ly amy i yhm y vawi akyh kyh bebe.