Read Khumi Chin JOHAN 8 Bible Online

JOHAN 8 - Khumi Chin bible

JOHAN 8

²Naibaly mymy ly khawn angthodyh y achura yhm kalen pui y kun bi iy, khumi bawibawichi ly ni teng y chei u i, ni ly ateh iy mymychi ai leu patiu.

³Naibaly Reita patiu nai keungchi hawi Pharisaichi ly neampachy leaungrei, pajang sa nai thym khala y patiu nai ai pahawi iy, sala y angdo hai i Isu teng y,

⁴“Sara, hini neampachy ai ly pajang sa nai thym khyp khala y patiu nai ne.

⁵Reita y ly Mosi my hina nai khumi ai ly lengseaung y aphi ka ai nai leu ang pei; nang ly ni i satang mana dawn mo?” napi.

⁶Huni ly mymy ai cham iy seu ai naira nga thai ai nai thui nai ne. Hunaibaly Isu ly meung i, mymy i kiu pajeung hawi khaileaung y tajiu.

⁷Naibaly nichi my deng veangveang nai deaungkho y ni ly kataw angdo i mychi teng y, “Nangchi theung y kamngo by y nai ngierei ly ni ai lengseaung y aphi man sy,” napi.

⁸Naibaly mymy ly meung bi i, ni i kiu pajeung hawi khaileaung y tajiu bi.

⁹Hunaibaly nichi ly ni i leu thui nai thai iy miteaung keh naimy amteaung iy, tem pa-rei leaung leaungrei theu dudu; huunaibaly Isu my leaungrei awm khyh bo, neampachy ly sala y mymy i angdo naira y awm jo rai.

¹⁰Naibaly Isu ly kataw angdo i ni teng y, “Lo awi, nichi ly ma mang y awm u pawn mo? Ami py nang ai pasum y leang lo-oh?” napi.

¹¹Ni my ly, “Areng, ami py pasum y,” napi. Naibaly Isu ly, “Kaimy py kang pasum y leang mang; tako ly, vai i dengdairei kamngo so bi moh,” napi.

¹²Naibaly Isu my nichi teng y leu thui bi i, “Kai ly khaileaung pri i kangvang ne; ami py kai teng y abang nai ly kavengra y tako ai ny y i, heng naira kangvang nga lawh ai,” napi.

¹³Hunaibaly Pharisaichi my ni teng y, “Nang ly nangmy i satang apany hai nai teu; nang i pany hai nai leu ly teng y leang,” napi.

¹⁴Isu my nichi teng y, “Amy i satang apany hai nai ne i py, kai i pany hai nai leu ly teng; kai ly kaimy i theu naira hawi chei ai naira py kapany; nangchi ly kai i theu naira hawi chei ai naira py pany y.

¹⁵Nangchi ly khumichi i dawn nai kamta chih jojo, kai ly ami ai py chih y leang.

¹⁶Ne, kai ly chih i py kai i chih nai ly teng, ati mana nai mo nabaly kaimy tlairei awm nai ny y leang, kai hawi kai ai pato nai Ngaai py awm.

¹⁷Ne, naibaly nangmychi i reita y py, khumi leung nyhrei i pany hai nai leu ly teng, nanai tajiu teang chy bo.

¹⁸Kai ly amy i satang apany hai nai keung ne, kai ai ang pato nai Ngaai my py kai ai pany hai teang,” napi.

¹⁹Naibaly nichi my ly ni teng y, ‘Ngampo ly ma mang y mo?” napi. Isu my, “Nangchi ly kai ai py pany y, Ngaai ai py pany y; nangchi ly kai ai pany i khyly Ngaai ai py pany ai bo,” nanai pathang.

²⁰Huni leu ly achura yhm kalen pui y leu patiu nai tarawi y, khai achu naira meithym y thui nai ne; naibaly mymy i neng tym y rai nai deaungkho y ami py mymy ai patiu y.

²¹Naibaly mymy ly nichi teng y, “Kai ly chei veng ai bo he, nangchi ly kai ai hau ai i, nangchi i kamngo awm jo naimy dei u ai: kai i chei ai naira y nangchi jeu thai y leang,” napi bi.

²²Hunaibaly Judachi ly, “Kai i chei ai naira y nangchi jeu thai y leang,’ nanai ly mymy apadei ai nai sai kha?” napi.

²³Naibaly ni my ly mymychi teng y, “Nangchi ly anui mang i nai theu nai ne: kai ly salo mang i nai theu nei ne; nangchi ly hini khaileaung pri i theu nai ne:kai ly hini khaileaung pri i theu nai ny y leang.

²⁴Hunai deaungkho y chy bo, ‘Nangchi i kamngo awm jo naimy dei u ai,’ kang napi nai ly; huni ly kai ne, nanai nangchi ym y baly, nangchi i kamngo awm jo naimy dei u thle thle ai,” napi.

²⁵Naibaly nichi ly ni teng y, “Nang ly ami kha?” napi. Isu my nichi teng y, “Angchei i dengdairei nangchi teng y kang thui pi nai ly.

²⁶Nangchi i molam y kai ly atiti neangneang thui ai nai hawi chih ai nai py awm; ati py ne sy, kai ai pato nai keung ly meitang khypkhyp ne:ni teng i leu kathai nai ngierei ly khaileaung pri y kathui,” napi.

²⁷Mymy ly nichi teng y Ampo i satang thui nai ne, nanai pany u y.

²⁸Hunaibaly Isu my, “Hini ly kai ne, nanai hawi, kaimy i adawn nai kamta sai py kaso y naimy Ngaai my kai ai patiu nai kamta hini atitichi kathui, nanai py nangchi ly Khumi i Chapo ai dang nai bo y pany u ai.

²⁹Kai ai pato nai keung ly kai teng y awm:ni i kawn naira ngierei kaimy sa pi jo nai deaungkho y mymy ly kai ai patlaw y leang,” napi.

³⁰Mymy ly huni leu thui nai thym khala y khumi neangneangchi ly mymy ai ym u.

³¹Hunaibaly Isu ly mymy ai ym nai Judachi teng y ly, “Nangchi ly kai i leu y awm jo baly kai teng y abang nai khumichi ne khyp bo;

³²nangchi ly leu meitang pany ai i, leu meitang my ly nangchi ai miseaung alaw hai ai,” napi.

³³Naibaly nichi my ly ni teng y, “Kaichi ly Abraham i kangpreang na a, kaichi vai khrairei ami i miseaung y py awm vai y leang; ‘nangchi ai miseaung alaw hai ai,’ nanai ly ati mana nai thui nai mo?” nanai pathang.

³⁴Naibaly Isu my nichi teng y, “Meitang khypkhyp kang thui pi, ami py kamngo sa nai ngierei ly kamngo i miseaung ne.

³⁵Miseaung ly yhm y awm jo y leang; chapo naini awm jojo ai.

³⁶Hunaibaly Chapo my nangchi ai miseaung alaw hai baly, nangchi alaw tatang ai.

³⁷Nangchi ly Abraham i kangpreang ne, nanai kai pany : na i py kai i leu ly nangchi i paleung y awm ai naira by y nai deaungkho y nangchi ly kai ai padei ai nai hau.

³⁸Ngaai teng y kai i atiti niu nai ly kathui, nangchi py ngampo teng y nangchi i atiti thai nai ly nangchi my sa,” napi.

³⁹Naibaly nichi my ni teng y, “Kaichi i ampo ly Abraham na a,” nanai pathang. Isu my nichi teng y, “Nangchi ly Abraham i chanauchi ne i khyly, Abraham i sa nai kamta nangchi py sa ai bo.

⁴⁰Na i py nangchi ly kai, Tameuh teng i leu meitang thai iy thui pi nai keung ai ly padei ai nai hau u lawh; Abraham ly hinai kamta so y leang. Nangchi ly ngampo i sa naichi sa ryry,” napi.

⁴¹Naibaly nichi my ly ni teng y, “Kaichi ly pajang cho ny y leang, kaichi ly ampo leaungrei awm, huni ly Tameuh ne,” napi.

⁴²Isu my nichi teng y, “Tameuh ly nangchi i Ampo ne i khyly nangchi ly kai ai tamen ai bo: kai ly Tameuh teng i theu nai hawi, ni teng i dengdairei kang jeu nai ne:kaimy ngaingai kang jeu nai ny y leang, ni my ang pato nai teu.

⁴³Nangchi my kai i leu thui nai ly ati mana nai pany thai y lawh? Kai i leu tangai u pajau y nai deaungkho y na a.

⁴⁴Nangchi ly ngampo Setan teng i theu nai i, ngampo i ngai phi teng y nai sa ai nai ngai chy bo. Ni ly angchei kha i dengdairei khumi ai padei nai keung ne, naibaly ni teng y leu meitang ha py by y nai deaungkho y mymy ly leu meitang y awm y leang. Mymy ly ka-chawi thui nai khala y amy i satang thui khyp nai ne: ati mana nai mo nabaly mymy ly ka-chawi thui nai keung ne, ka-chawi ampo py ne.

⁴⁵Kai ly leu meitang thui nai deaungkho y nangchi ly kai ai ym y.

⁴⁶Kai ai kamngo lam y pasum thai ai nai nangchi theung y ami awm mo? Kai ly leu meitang thui nai ne baly ati mana nai kai ai ym u y?

⁴⁷Tameuh teng i theu nai ly Tameuh i leu tangai; nangchi ly Tameuh teng i theu nai ny y nai deaungkho y chy bo tangai y nai ly,” napi.

⁴⁸Judachi my ly, “Nang ly Samari khumi ne; nang ai vawinam my nam bo, nanai kaichi i thui nai ly teng khyp lo-oh?” nanai pathang.

⁴⁹Isu my, “Vawinam my kai ai nam nai ny y leang; Ngaai ai kapalo nai ne i nangchi ly kai i amyn taphra lawh ly.

⁵⁰Na i py kai ly amy ai apalo ai naira hau nai ny y leang; hau nai keung hawi, tara chih nai keung ly leaungrei awm.

⁵¹Meitang khypkhyp kang thui pi, ami py kai i leu tangai baly deungtasa khrairei deira niu ai ny y,” napi.

⁵²Naibaly Judachi my ni teng y, “Nang ai vawinam my nam bo, nanai vai ly kaichi pany bo. Abraham hawi amochi py dei veng bo. Nang ly, ‘Ami py kai i leu tangai baly deungtasa khairei deira pany ai ny y,’ na lawh ly.

⁵³Kaichi i amsi sangum Abraham tleaung y nang len keh a? Ni py dei veng bo, amochi py dei pawn bo; nang ly ami amlawm mo?” napi.

⁵⁴Isu my, “Amy ai apalo baly kai i apalo nai ly ati sai py ny y leang: Ngaai ly kai ai palo nai keung na a; mymy ai ly nangchi my, ‘Ni ly kaichi i Tameuh ne,’ napi.

⁵⁵Nangchi ly mymy ai pany y; kai naini mymy ai pany; kai ly mymy ai pany y na i khyly, nangchi kamta kai py ka-chawi tla teang ai; na i py kai ly mymy ai pany, ni i leu py tangai.

⁵⁶Ngampo Abraham my ly kai tym nai neng niu nai deaungkho y amo theu parai; mymy ly niu i kawn parai,” napi.

⁵⁷Naibaly Judachi ly ni teng y, “Nang ly saneng vui pangrei py by y pui rai be, Abraham ai niu nai sai a?” napi.

⁵⁸Isu my nichi teng y, “Meitang khypkhyp kang thui pi, Abraham by y rai khala y py kai ly awm nai bo,” napi.

⁵⁹Hunaibaly nichi ly aphi ai nai lengseaung akhui u, na i py Isu ly aheu i achura yhm kalen pui i nai theu veng.