Read Khumi Chin AMTAW 10 Bible Online

AMTAW 10 - Khumi Chin bible

AMTAW 10

¹Naibaly Kaisari avang y amyn Kornelia napi nai khumi leaungrei awm, Itali kamkawm napi nai i tavaimi chungvarei lu,

²Tameuh ai py dawn parai nai khumi, mymy hawi mymy i dengtheungchi bawibawi py Tameuh ai tahm khai, amichi teng y py mymy ly atiti neangneang pei reng, Tameuh teng y py chiu sa jojo.

³Huni khumi ly choh amang neng thym khala y amang kamta chai pyn naimy Tameuh i kani pri i amtaw thau nai leaungrei mymy teng y kun i “Kornelia awi,” napi nai niu.

⁴Naibaly Kornelia ly mymy ai khen ryry, naibaly jei i, “Areng, ati mo?” napi. Naibaly ni my ly mymy teng y, “Nang i chiu sa nai hawi nang i atiti pei reng naichi ly pany jo naira lawn ai nai Tameuh i mo y tym kalau bo.

⁵Naibaly vai ly Joppa avang y khumi leaungrei Simon, amyn ka-reu Petera napi nai ai hawi ai nai khumichi ai pato;

⁶mymy ly mawipeih sa nai keung Simon teng y anga mang, ni i yhm ly pangli peang y mang,” napi.

⁷Naibaly mymy hawi arum nai kani pri i amtaw thau nai ly leh bo nabaly, Kornelia ly mymy i miseaung theung i khumi leaung nyhrei hawi, mymy i kalop sa jojo nai tavaimichi theung i nai Tameuh ai dawn parai nai leaungrei ai py palau;

⁸naibaly satang bawibawi ly nichi teng y thui pi pajau iy Joppa avang y pato bo.

⁹Naibaly khawn mang y tako u nai thym khala, avang ahawi y tym ai nai kha y, Petera ly chiu sa ai nai kanithun y amphu y lyn kalau;

¹⁰naibaly kajeu alam i biu cha ai nai ngai; na i py nichi ly cha ai nai sa nai thym khala y mymy ly atiti tahm bo.

¹¹Naibaly kani am-eaung i atiti pawm, kanih len parai nai kamta, taki palyhrei y thang iy khaileaung y abang kathiu nai niu;

¹²huni theung y ly khaileaung pri i mawi kheu palyhrei awm naichi hawi, avah naichi hawi, salo mang i tavochi hawi amjy cheaungkhang awm.

¹³Naibaly atiti raawi ly mymy teng y, “Petera, angthau, tleh ly, cho,” napi.

¹⁴Na i py Petera my ly, “Ny y leang, Areng; chai y nai hawi amso ngai nai ly kai ati sai py cho vai y leang,” napi.

¹⁵Naibaly raawi ly tlen nyhrei nai kha y ly, “Tameuh my pachai chum nai bo y ly nang ly chai y ti moh,” napi.

¹⁶Hunai ka-tawm ryry tlen thomrei awm; naibaly pawm ly kani mang y kateang kalau ali praw veng bo.

¹⁷Naibaly Petera ly amang kamta niu nai ly dawn ai nai ngo y nai paleung bi nai thym khala y, Kornelia i pato nai khumichi ly Simon i yhm deng nai,

¹⁸katheu pa-kho ahawi y angdo i, “Simon, amyn ka-reu Petera napi nai ly hi y anga a ango y a?” nanai deng nai aeu.

¹⁹Naibaly Petera ly amang kamta niu nai ly adawn nai thym khala y, Phailo my ly mymy teng y, “Khen cham, khumi leaung thomrei ly nang ai ang hau na a.

²⁰Hunaibaly angthau iy satlo ly, ati sai py ym y nai by y naimy mymychi teng y abang:nichi ai ly kai i pato nai mang,” napi.

²¹Hunaibaly Petera ly nichi teng y satla kathiu i mymychi teng y, “Khen cham, nangchi i hau nai ly kai he; ati leu jeu u nai mo?” nanai thui.

²²Naibaly nichi my ly, “Kornelia, tavaimi chungvaiei lu, khumi kahawi, Tameuh ai tahm khai nai, Juda cheng bawibawi theung i amyn kahawi awm nai, ni teng y kani pri i amtaw thau nai kachai leaungrei ly nang i leu thui nai pany ai nai hawi, mymy i yhm y nangmy ai palau ai nai py thui pi na a,” napi.

²³Hunaibaly mymy ly nichi ai kun ai nai palau i jei hai bo. Naibaly khawn mang y mymy ly angthau i, mymychi teng y abang, Joppa avang i khumi amjo amnau amichi mo py mymy teng y chei teang.

²⁴Naibaly khawn pa-nyh y ly nichi ly kaisari avang y kun bo. Naibaly kornelia ly mymy i dengtheungchi hawi, mymy i ahawi ngai keh naichi ai palau achu i nichi ai ajeng jojo.

²⁵Naibaly Petera ly kun ai nai thym khala y ly Kornelia ly lamchung i ni i kheu keung y ambeu iy chiu.

²⁶Na i py Petera my ly, mymy ai pathau iy, “Angdo ba, kai py khumi teu chy bo,” napi.

²⁷Naibaly mymy hawi arum nai tarawi y kun i, khumi neangneang awm achu nai niu.

²⁸Naibaly mymy ly nichi teng y, “Judachi ly Cheng Takhra hawi amkawm ai nai hawi, mymychi teng y kun ai nai py so ngau y nai sai ly nangchi pany; na i py ami ai py chai y nai hawi amso ngai, nanai thui ai nai tlo y, nanai Tameuh my kai ai thai hai bo;

²⁹hunai deaungkho y kai ai ang palau baly kai akhi y naimy kang jeu nai bo he. Hunaibaly nangchi ly kai ai ati leu palau u nai mo, nanai kang deng?” napi.

³⁰Naibaly kornelia my ly, “Vaini kani palyhrei awm bo, vai hini neng khala y khrairei kaimy i yhm y choh amang neng kha y chiu sa i, khen cham, khumi leaungrei kanih angvang parai nai akhiu i kai i mo y angdo iy,

³¹“Kornelia, nang i chiu sa nai ly tangai bo, naibaly nang i ami teng y atiti pei reng naichi py Tameuh i mo y pany jo naira lawn ai nai tym na a.

³²Hunai deaungkho y Joppa avang y khumi pato ly, Simon, amyn ka-reu Petera napi nai ai ly nang teng y palau; mymy ly pangli peang y mawipeih sa nai keung Simon i yhm y anga mang,’ ang napi.

³³Hunai deaungkho y nang teng y khumi kang pato praw nai na a; nang jeu nai deaungkho y avo parai. Hunaibaly Areng my nang teng y leu ang pei nai ngierei pany ai nai, vai Tameuh i mei ka-niu y kaichi bawibawi hi y awm nai bo,’ napi.

³⁴Naibaly Petera ly leu thui i, “Tameuh my ly khumi ai patle takhra y leang, nanai kai hawihai palai pany:

³⁵na i py cheng cheaungkhang theung y ami py mymy ai tahm khai iy kahawi sa nai ngierei ai ly ang kawn reng.

³⁶Naibaly mymy ly Israela kangpreangchi teng y leu taviu nai, awmnem nai Satang Kahawi Isu Krista i labeaung y thui pi nai (mymy ly ati cheaungkhang tleaung y Areng)

³⁷huni leu ly nangchi my pany; huni ly Johan my baptisma satang thui pi pajau kha y Kalili pri i dengdairei amthang angchei i Judai pri bawibawi y amthang prei bo;

³⁸Nazaret Isu i molam leu ly, huna nai Tameuh my ni ai ly Phailo Kachai hawi, atiti sa thai naira y khai takhra nai sai ly; mymy ly atiti kahawi sa nai hawi, diabola i ana nai bawibawichi ai hawi sa pi ai nai amki. Tameuh my mymy teng y awm nai deaungkho y.

³⁹Kaichi ly Juda pri y hawi Jerusalem y py mymy i atiti sa nai bawibawi ly pany hai nai keung ne; nichi ly mymy ai dengkeaung y tahen i padei bo.

⁴⁰Tameuh my ni ai ly kani thomrei kani y pathau ali teang i, hawihai palai amteng hai:

⁴¹na i py khumi bawibawichi teng y ny y leang, Tameuh my pany hai nai keung y ang vawi nai, kaimychi kypkyp teng y mymy ly kadeichi theung i dengdairei angthau bi nai bo y mymy teng y cha nai nei naichi ly.

⁴²Naibaly mymy ly kadeichi hawi kanghengchi ai tara chih nai keung y Tameuh my khai rym nai ne, nanai khumichi teng y thui pi ai nai hawi, pany hai ai nai py kaichi ai Tameuh my leu ang pei.

⁴³Ami py mymy ai ym nai ngierei ly mymy i amyn deaungkho y, kamngochi pahen naira ng ai, nanai hini satang ly amo bawibawichi my pany hai ly,” napi.

⁴⁴Naibaly Petera my huni leu thui nai thym khyp khala y, leu thai nai bawibawichi i tlang tleaung y ly Phailo Kachai tym ryp bo.

⁴⁵Naibaly lengkhym takip naichi theung y ym naichi, Petera teng y abang nai ngierei ly, Phailo Kachai pei nai ly Cheng Takhrachi i tlang tleaung y py lei teang nai deaungkho y lyh parai;

⁴⁶ati mana nai mo nabaly leu athai y nai thui nai hawi Tameuh ai palo nai py nichi thai u lawh.

⁴⁷Naibaly Petera ly thui bi i, “Hini, kaimychi kamta Phailo Kachai nga teang naichi ai baptis so y ai nai tui teaung ai nai ami my ang paka thai mo?” napi.

⁴⁸Hunaibaly Isu Krista i amyn y baptisma nga ai nai leu pei bo. Hunai bo y ly kani majirei mo ni awm ai nai mymy ai takeng.