Read Khumi Chin AMTAW 12 Bible Online

AMTAW 12 - Khumi Chin bible

AMTAW 12

¹Naibaly huna nai thym tham khala y ly samrang Heroda my palau takhra kamkawmchi theung y amichi ai mo ana ai tau nai kiu jaha bo.

²Mymy ly Johan i amjo Jakob ai ly haisau hawi ateng ka bo.

³Huna nai ly Judachi ai kawn hai, nanai pany iy mymy ly Petera ai py patiu teang. Huni ly tako angbo abawi y nai neng ne.

⁴Naibaly ni ai patiu nai bo y ly theaung y paeaung iy, ni ai typ ai nai tavaimi leaung palyh leaung palyhrei, kamkawm palyhreichi teng y au. Katlen Vui nai pawi pajau nai bo y khumi humchi teng y pahawi ai nai tau.

⁵Hunai deaungkho y Petera ai ly theaung y paeung jo rai; na i py palau takhra kamkawmchi my mymy i vui Tameuh teng y chiu sa pi pathyp.

⁶Naibaly Heroda my ni ai hawi ai nai khala y, huni vum y ly Petera ly sangkry nyhrei pachu naimy tavaimi leaung nyhrei sala y i, typ nai keungchi py katheu pa-kho ahawi y awm i theaung y typ.

⁷Naibaly khen cham, Areng i kani pri amtaw thau nai leaungrei ly mymy i ahawi y angdo, mymy ai paeung naira y py ati mo kangvang angvang. Naibaly mymy ly Petera i pana y tabeang i, ni ai palawi iy, “Angthau kaliki jau,’ napi. Naibaly sengkry ly mymy i kiu i nai tla vui bo.

⁸Naibaly kani pri i amtaw thau nai my ly mymy teng y, “Neina akyn ly, nang i phainai py pachu,” napi. Naibaly mymy ly huna nai sa. Naibaly kani pri i amtaw thau nai my ly mymy teng y, “Kanih adan ly, kai teng y abang,” napi.

⁹Naibaly mymy ly theu i abang bo, kani pri i amtaw thau nai i sa nai sai ly ameimang ne, nanai pany y i, amang mang y niu nai mo, nanai palawn lawh.

¹⁰Naibaly angchei i typ nai meingtym hawi, pa-nyh i typ nai meingtym py katlen hawi nai bo y ly avang mang y theu ai nai tamo katheu y tym iy, huni ly myni i vui am-eaung bo: naibaly nini theu hawi i, lam harei katlen bo; naibaly kani pri i amtaw thau nai my ly ni ai leh pi veng ryp bo.

¹¹Naibaly Petera amcheng bo nabaly., “Areng my mymy i kani pri i amtaw thau nai ai pato i, Heroda i kiu i nai hawi, Judachi i tau nai bawibawi ra i dengdairei ly kai ai palawi bo, nanai vai ly kai pany khyp bo,” napi.

¹²Naibaly adawn pajau bo nabaly Johan, amyn ka-reu Marka napi nai i amhm Mari i yhm y tym; hu y ly khumi neangneang awm achu iy chiu sa.

¹³Naibaly mymy ly dangkhum i katheu y takhei i, amyn Rodi napi nai anglo leaungrei paeaung ai nai chei.

¹⁴Naibaly mymy ly Petera i raawi ma i, kawn nai deaungkho y katheu ly paeaung y naimy kun ali teang vui iy, “Petera ly katheu pa-kho ahawi y angdo ho,” nanai thui pi.

¹⁵Na i py nichi my ly mymy teng y, “Nang ly pathu nai bo to,” napi. Ni my ly “ne khyp e,” nanai aei akhikan. Naibaly nichi my ly, “Mymy i kani pri i amtaw thau nai na a tu ly,” napi.

¹⁶Na i py Petera ly takhei jojo rai; naibaly nichi ly paeaung iy mymy ai niu i khrikhri pa-rei rengrang tlai ly, napi.

¹⁷Hunaibaly mymy ly katheu u y ai nai kiu y paka iy, Tameuh my theaung i nai mymy ai patheu nai saichi thui pi bo. Naibaly mymy ly. “Hini satang ly Jakob hawi amjo amnauchi ai thui pi ba,” napi. Naibaly mymy ly theu iy takhra mang y chei bo.

¹⁸Naibaly kani si bo nabaly tavaimichi ly Petera ma mang y awm veng mo, nanai khru ala nai khru y alam na.

¹⁹Naibaly Heroda ly ni ai hau i niu pajau y, naibaly typ nai keungchi ai deng i nichi ai padei ai nai leu pei. Naibaly mymy ly Judai pri i dengdairei Kaisari avang y chei i hu y awm bo.

²⁰Naibaly mymy ly Tura hawi Sidon avang i khumichi i tlang tleung y khrikhri pa-rei paleung hawi y bo. Hunaibaly nichi ly leu vanrei adyh naimy mymy teng y chei, naibaly Blasta, samrang ai ira y typ nai keung ai ly ahawi ka-dawi asa i, nichi i pri ly samrang i pri mang y cho nga reng nai deaungkho y aly ai nai hnei.

²¹Naibaly adeu nai kani y Heroda ly areng kanih adan iy areng atehra y ateh i, mymychi teng y leu thui.

²²Naibaly khumi bawibawichi my ly, “Tameuh i raawi na a hi ly, khumi i raawi py ny y leang bo y!” nanai aeu u.

²³Naibaly mymy ly Tameuh teng y palo naira pei y nai deaungkho y, Areng i kani pri i amtaw thau nai my ly tlenrei khyh my ni ai no hai iy kaleung my cha i dei bo.

²⁴Na i py Tameuh i leu ly ahei i, peung ryh peung ryh bo.

²⁵Naibaly Barnaba nini Sawla ly huna nai sabawm pajau iy, Jerusalem i dengdairei ali teang i Johan, amyn ka-reu Marka napi nai ai ly nini teng y hawi bo.