Read Khumi Chin AMTAW 13 Bible Online

AMTAW 13 - Khumi Chin bible

AMTAW 13

¹Naibaly Antiokei avang y awm nai palau takhra kamkawmchi theung y ly Tameuh i leu thui nai keung hawi patiu nai keungchi py awm; hunichi ly Barnaba hawi Sumeon, Nikera napi nai hawi, Kurini avang i khumi Lukia py, Areng Heroda i amjo amnau lawn nai Manain hawi, Sawla py.

²Naibaly Areng i kalop sa nai hawi biu hai nai thym khala y Phailo Kachai my ly, “Barnaba hawi Sawla nini ai ly kai i khai rym nai atiti sa ai nai ly kai ai khai pi u takhra,” napi.

³Hunaibaly nichi ly biu hai nai hawi chiu sa nai hawi nini i tlang tleaung y kiu tamam nai bo y ly nini ai tako hai bo.

⁴Hunaibaly nini ly Phailo Kachai my pato nai chei i, Selukia avang y kathiu iy, hu i dengdairei Kupra tlawn y paleaung mang chei bo.

⁵Naibaly Salamisa avang y awm nai thym khala y Judachi i achura yhm y Tameuh i leu thui pi: Johan py myni ai sabawm ai nai abang teang.

⁶Naibaly nichi ly Paphos avang y tym pa-rei tlawn verei amki prei iy, atam kakawp, tapawp nai amo, Juda khumi, amyn bar Isua napi nai ai niu.

⁷Huni khumi ly samrang i jeng y awm nai keung, amyn Serjia Pawla, khumi cheng parai nai teng y awm. Mymy ly Barnaba nini Sawla ai palau i Tameuh i leu tangai ai nai tau.

⁸Na i py Eluma (ni i amyn takhra awm nai sai ly atam kakawp nanai sai ne.) huni khumi ly samrang i jeng y awm nai khumi ai ly ym hai y ai tau i nini ai paka.

⁹Hunaibaly Sawla,. Pawla napi bi nai ly Phailo Kachai my kawi i mymy ai khen veangveang iy,”

¹⁰“Nang tapawp nai khumi hawi mei amcheu rawi nai cheaungkhang kawi nai keung, nang diabola i chapo nang hawi naira cheaungkhang ai paka nai keung awi, Areng i lam teng parai nai taphra nai ly nang anawn y ai a?

¹¹Naibaly vai ly khen cham, nang i tlang tleaung y Areng i kiu ang tym nai bo he, nang ly mei paju ai i, kani kangvang niu y ai rai,” napi. Hunaibaly tamai hawi kaveng my mymy ai ly tabawm praw i, kiu y pahawi ai nai keung hau nai aleaung ryry.

¹²Naibaly samrang i jeng y awm nai keung ly huna nai niu iy, Areng i patiu nai leu ly khri pa-rei lyh i ym bo.

¹³Naibaly Pawla ly mymy i kamkawmchi hawi Paphos dengdairei paleaung mang chei i Pamphulia pri i Perka avang y tym u bo; naibaly Johan my nichi ai khai su i Jerusalem y vawi ali teang bo.

¹⁴Na i py nichi ly Perka i dengdairei tako u veangveang i, Pisidia pri i Antiokei avang y tym; naibaly Anawn Kani y ly achura yhm y kun i ateh.

¹⁵Naibaly Reita cha-iu hawi amochi i cha-iu phain pajau nai bo y, achura yhm i miteaung kehchi ly mymychi teng y khumi ai pato i, “Amjo amnauchi awi, khumichi ai pachei ai naira leu ati mo awm baly thui u ba,” napi.

¹⁶Naibaly Pawla ly angdo i kiu y kali iy, “Israela khumichi hawi Tameuh ai tahm khai nai keungchi awi, tangai u.

¹⁷Hini Israela chengchi i Tameuh ly achi i amsi sangumchi ai vawi i, khumichi Aikupta pri y awm nai khala y ly nichi ai tahm pasang iy, salo keh i kiu my hu i dengdairei nichi ai pahawi bo.

¹⁸Naibaly mymy ly saneng vui palyhrei mo daichi ka-vym y ly nichi ai kateaung.

¹⁹Naibaly Kanan pri y cheng saryhreichi ai pasum pajau nai bo y ly saneng chungvai palyh pangngo vui pangrei mo sala y ly mymychi i pri y athum teang ai nai pei bo.

²⁰Hunai bo y ly amo Samuela tym pa-rei mymy ly nichi teng y tara chih nai keungchi khai pi.

²¹Naibaly hunai bo y nichi ly samrang hnei u i, Tameuh my saneng vui palyhrei sala y Sawla, Kisa i chapo. Benjamin cheng i khumi ai ly mymychi teng y khai pi.

²²Naibaly ni ai tasyh vui nai bo y ly mymychi i vui samrang awm ai nai Davida ai palum; Tameuh my huni leu ly pany hai iy, ‘Davida, Jesai i chapo, kai i paleung kamta apu nai khumi kanga bo, ni ly kai i ngai ngierei sa ai,’ napi.

²³Huni khumi i kangpreangchi theung i nai Tameuh my leu adeu nai kamta Israelachi teng y Paheng Keung, Isu napi nai ai ang tym hai bo;

²⁴mymy theu y rai kha y Johan my uikhei nai baptisma leu Israela khumichi bawibawi teng y thui pi man bo.

²⁵Naibaly Johan ly mymy i kalop sa nai thym khala y, ‘Nangchi ly kai ai ami palawn mo? Kai ly ni ny y leang. Na i py khen cham, kai i nithun y ami mo ang jeu ai i, kai ly mymy i phainai vui su ai nai py ataing nai ny y leang,’ napi.

²⁶“Amjo amnauchi awi, Abraham i kangpreang chanauchi awi, nangchi theung y Tameuh ai tahm khai nai bawibawichi awi, achi teng y hini heng nai leu ang pa nai bo he.

²⁷Jerusalem i awm naichi hawi mymychi ai kry nai keungchi py ni ai ly pany y nai hawi, amochi i leu ly Anawn kani tleirei phain reng nai py pany y nai deaungkho y mymy ai pasum iy huni leu ly sa angym bo.

²⁸Mymy i tlang tleaung y dei ai ataing nai pa-rei ati sai py niu u y i py, Pilata teng y ni ai padei ai nai takeng u.

²⁹Naibaly nichi ly mymy i satang tajiu chum nai bawibawi ly sa angym pajau iy, dengkeaung i dengdairei la kathiu i angawm y paseaung bo.

³⁰Na i py Tameuh my ni ai ly kadeichi theung i dangdairei pathau;

³¹naibaly kalili pri i dengdairei Jerusalem y mymy hawi vanrei kalau teang naichi ly kani kra parai nai sala y mymy ai niu reng; hunichi ly vai khumichi teng y mymy i satang pany hai nai keungchi ne.

³²Naibaly kaichi ly amsi sangumchi teng y leu adeu nai ly satang kawn ai awm parai nai kang thui pi nai he,

³³huna nai Tameuh my Isu ai pathau nai ly nichi i chanauchi teng y huni ly sa angym bo; Sam pa-nyh y ly, ‘Nang ly kai i chapo ne, Vaini ly nang ai kang lawn hai bo,’ nanai tajiu nai kamta teang.

³⁴“Naibaly veaung ai naira meingtym y chei bi y ai nai Tameuh my ni ai ly kadeichi theung i dengdairei pathau, nanai leu hina nai thui bo: ‘Davida teng y pahen naira kai adeu kheng nai ly nangmy ai kang pei ai mang,’ nanai ly.

³⁵Hunai deaungkho y Sam takhra ra y, ‘Nang i Khumi Kachai ai ly veaung vui ai nai pei y ai,’ napi teang.

³⁶Davida ly Tameuh my thui pi nai kamta mymy heng ahawi naichi ai kry pajau nai bo y i ngym iy, mymy i kangpreangchi teng y up i, veaung veng bo he;

³⁷na i py Tameuh i pathau nai ly veaung y ly.

³⁸Hunaibaly amjo amnauchi awi, hini khumi i saho y kamngo pahen naira leu nangchi teng y thui pi nai he;

³⁹ami py ym nai ngierei ly ati cheaungkhangra y Mosi i Reita y eaung hai naira awm thai y nai ly mymy ly eaung hai bo.

⁴⁰Hunai deaungkho y amkym u, ti y baly amochi i cha-iu y thui nai ly nangchi i tlang tleaung y tym lawh na;

⁴¹‘Tahm khai y nai keungchi awi, khen u cham, Rengrang py ti u ly, tamo my tamo u; Nangchi heng nai ryrei ly hini kai i atiti sairei sa nai ly Huni ly ami my nangchi teng y ang thui pi i py Nangchi pipi ym ai ny y,’ nanai ly,” napi.

⁴²Naibaly nichi theu nai khala y Anawn Kani pa-nyh y ly huni leu thui bi ai nai takeng u.

⁴³Naibaly achu naichi ly amprei nai bo y Judachi hawi, mymychi i suibang kammeaung Tameuh ai tahm khai parai nai khumi neangneangchi ly Pawla hawi Bernaba teng y abang; nini ly nichi hawi arum i, Tameuh i pahengra y awm jo ai nai pachei.

⁴⁴Naibaly anawn kani pa-nyh y ly nichi avang theaungrei tanvi Tameuh i leu tangai ai nai achu;

⁴⁵na i py Judachi ly khumi mipuichi ai niu baly khrikhri pa-rei paleung no iy, Pawla i leu thui nai ly ei akhikan nai khri pa-rei chawn i thui py thui tamawn.

⁴⁶Naibaly Pawla hawi Bernaba ly khri pa-rei vam parai naimy thui hawi i, “Tameuh i leu ly nangmychi teng y thui man ai nai tla. Na i py nangmychi my paka ali veng i, deungtasarei heng ai ataing y nai apalawn u veng nai deaungkho y, khen cham, kaini ly Cheng Takhrachi mang y hi vui ai.

⁴⁷Hunai kamta Areng my leu ang pei i, ‘Khuteng taki y tym pa-rei nang paheng keung y awm thai ai nai, Cheng Takhrachi ai angvang hai ai nai keung y kang khai mang,’ nanai tajiu nai kamta ly,” napi.

⁴⁸Naibaly Cheng Takhrachi ly huna nai thai iy kawn i Tameuh i leu ai palo, naibaly deungtasarei hengra nga ai nai khai takhra nai ngiereichi my ly ym bo.

⁴⁹Naibaly Areng i leu ly huni meingtym tengtang y ahei bo.

⁵⁰Na i py Judachi ly tahm asang nai hawi Tameuh ai tahm khai nai neampachychi ai hawi, avang miteaung kehchi ai py pachei i, Pawla hawi Barnaba nini ai ly ana hai piupa iy, mymychi i meingtym dengdairei nini ai patheu bo.

⁵¹Na i py nini ly mymychi i tlang tleaung y myni i kheu padawi i spryh katheng hai iy, Ikonion avang y tym bo.

⁵²Naibaly abangnaichi ly kawn nai hawi Phailo Kachai my kawi bo.