Read Khumi Chin AMTAW 14 Bible Online

AMTAW 14 - Khumi Chin bible

AMTAW 14

¹Naibaly Ikonion avang y ly nini ly Judachi i achura yhm y kun hawi i leu thui nai deaungkho y, Juda hawi Krik khumi neangneangchi py ym bo.

²Na i py ym ngai y nai Judachi my Cheng Takhrachi i paleung y pachei i, amjo amnauchi ai niu ngai hai y.

³Hunai deaungkho y nini ly Areng y ly vam parai naimy leu thui i, hu y ly awm kra kyh, mymy ly ka-ma-ra hawi, rengrangchi py mymychi i kiu y sa hai iy, mymy i pahenra leu pany hai.

⁴Na i py avang i khumi mipuichi ly amji bo, phyreichi ly Judachi mang y asa hai i, phyreichi ly amtaw thau nai nini ai asa hai.

⁵Naibaly Cheng Takhrachi hawi Judachi ly mymychi i miteaung kehchi hawi nini ai khri pa-rei kangji khai nai sa nai hawi, lengseaung y aphi ai tau nai thym khala y ly nini ly pany i,

⁶Lukaonia hawi, Lustra hawi, Derbe avang tengtang y preng hawi bo;

⁷hu y ly Satang Kahawi thui pi prei prei.

⁸Naibaly Lustra avang y ly kheu kamkhyn ami mo ateh i, amhm taku i dengdairei amkhyn nai bo, kheu y tako vai y.

⁹Huni khumi ly Pawla i leu thui nai tangai; naibaly Pawla my ly mymy ai khen jo iy, no hawi ai nai ym naira awm, nanai pany i athorei my, “Nang i kheu y kataw angdo,” napi.

¹⁰Naibaly mymy ly angthau i kheu y tako bo.

¹¹Naibaly khumi mipuichi ly Pawla i atiti sa nai niu khala y ly Lukaonia leu y athorei my, “Tameuhchi ly khumi kamta achi teng y ang kathiu nai bo hi ly,” napi.

¹²Naibaly Barnaba ai ly Jupita napi, Pawla ai ly leu thui nai keung leh keh nai deaungkho y Merkuria, napi.

¹³Naibaly apai keung y awm nai Jupita i achura yhm i pathyp pi nai keung ly si kataichi hawi kaseaung pau leangchi ly avang apai pa-kho y la iy, khumi mipuichi hawi vanrei apathyp ai nai tau.

¹⁴Na i py amtaw thau nai Barnaba hawi Pawla my ly huna nai thai baly myni i kanih sei iy khumi mipuichi teng y tlenrei khyh my satla praw iy aeu i,

¹⁵“Arengchi awi, nangchi ly hina nai ly ati mana nai sa nai mo? Kaini py nangmychi ka-tawm khumi teang teu be; nangchi ly hini atiti rumramchi ai ly khai su iy, kani py, khaileaung py, pangli py, mymychi theung y awm nai bawibawichi ai sa nai keung Tameuh kangheng teng y ly amhi u ai nai kaini ly Satang Kahawi kang tym hai nai teu.

¹⁶Mymy ly jangni y ly cheng cheaungkhangchi ai amymy i lam y tako bawibawi ai nai pei reng.

¹⁷Na i py mymy i pany hai naira by y nai ly awm vai y leang, huna nai atiti kahawi ang sa pi reng, kani mang i dengdairei kani nai nai hawi, saneng pa-tiu kahawichi ang pei iy, cha ai nai hawi kawn naira hawi nangchi i paleung y ang kawi hai nai ly,” napi.

¹⁸Naibaly huni leu y ly nini teng y apathyp y ai nai mipuichi ai paka pajau tanga bo.

¹⁹Na i py Antiokei hawi Ikonion avang i nai Juda amichi mo hu y tym iy, khumi mipuichi ai ly parawi tanga bo; hunaibaly nichi ly Pawla ai lengseaung y aphi i dei ai nai athang khai nai deaungkho y avang i dengdairei ryh bo.

²⁰Na i py abangnaichi ly ni i ahawi y angdo nai thym khala y ni ly angthau i avang y kun teang bi bo; naibaly mymy ly khawn mang y Barnaba hawi Derbe avang y chei hawi bo.

²¹Naibaly huni avangchi teng y ly Satang Kahawi thui pi i, abangnai khumi neangneang nga nai bo y ly Lustra avang y py, Ikonion avang y py, Antiokei avang y py vawi ali i,

²²ngari neangneang patang iy Tameuh i peang naira y kun ai nai teu, nanai abangnaichi ly paleung khaw hai iy, ym naira y ly awm jo ai nai pachei prei prei.

²³Naibaly palau takhra kamkawm tleirei y miteaung keh khai pi i, biu hai nai tarawi y chiu sa nai pajau kha y mymychi i ym nai Areng teng y au hai.

²⁴Naibaly Pisidia pri y chei prei iy, Pamphulia pri y tym bo.

²⁵Naibaly Perka avang y leu thui pajau nai bo y Atalia avang y chei;

²⁶hu i dengdairei paleaung mang theu iy Antiokei avang, nini i kalop sa pajau vui nai ly sa ai nai Tameuh i pahenra y ang au hai nai meingtym y tym bi bo.

²⁷Naibaly nini ly tym nai bo y palau takhra kamkawmchi ai palau achu i, Tameuh my nini ai teaung iy atiti sa naichi bawibawi hawi, Cheng Takhrachi i vui y ym naira katheu paeaung pi nai saichi py thui pi.

²⁸Naibaly nini ly abangnaichi teng y ly awm kra rawm bo.