Read Khumi Chin AMTAW 16 Bible Online

AMTAW 16 - Khumi Chin bible

AMTAW 16

¹Naibaly mymy ly Derbe avang y hawi Lustra avang y py tym; naibaly khen cham, hu y amyn Timothei abangnai leaungrei awm, mymy ly ym nai Juda neampachy i chapo ne, na i py ampo ly Krik khumi ne.

²Lustra hawi Ikonion avang y awm nai amjo amnauchi my ly mymy ai palo.

³Pawla my ly ni ai mymy teng y hawi ai nai ngai; hunaibaly huni tengtang i Judachi deaungkho y ni ai lengkhym takip pi, ampo ly Krik khumi ne, nanai nichi ly pany be veng bo.

⁴Naibaly nichi ly avang tleirei chei nai tarawi y Jerusalem i amtaw thau naichi hawi miteaung kehchi i leu pei nai ly patawm ai nai nichi teng y au bo.

⁵Hunaibaly palau takhra kamkawmchi ly ym naira y khaw iy kani tleirei peung ryh peung ryh bo.

⁶Naibaly Phailo Kachai my Asia pri y leu thui ai nai paka nai deaungkho y nichi ly Phrukia hawi Kalatia pri ly hi be bo;

⁷naibaly Musia pri ahawi y tym iy Bithunia pri y kun ai nai tau u; na i py Isu i Phailo my pei y;

⁸hunaibaly Musia pri ly katlen i Troas avang y kathiu bo.

⁹Naibaly vum y Pawla ly amang kamta Makedonia pri i khumi leaungrei angdo iy, “Makedonia pri y angpeang ly, kaichi ai sabawm ba,” nanai takeng ryry nai niu.

¹⁰Naibaly huni amang kamta atiti niu nai pajau baly kaichi Makedonia pri y chei ai nai tau praw i, mymychi teng y Satang Kahawi thui pi ai nai Tameuh my ang palau, nanai kaichi pany bo.

¹¹Naibaly kaichi ly Troas avang i dengdairei paleaung mang theu iy, kataw chei prei nai Samothraki avang y tym, naibaly khawn mang ly Neapoli avang y chei bi;

¹²naibaly hu i dengdairei ly Philipi avang y chei: huni ly Makedonia pri i avang harei nai ne, huni ka-peang y ly avang aly len keh nai ne, Rom avangchi i angpyn nai avang ne; kaichi ly huni avang y ni awm nai kani kra kyh.

¹³Naibaly kaichi ly Anawn Kani y ly apai pa-kho palem mang i tavo peang y chiu sa nai meingthym ne, nanai athang khai naira y chei; naibaly ateh i neampachy jeu achu naichi teng y leu thui pi.

¹⁴Naibaly amyn Ludia, kanih kamsen jeaung jo nai keung, Thuatira avang i khumi, neampachy leaungrei ly kaichi i leu thui nai ly tangai bo, naibaly ni ai ly Pawla i leu thui nai patawm ai nai Areng my mymy i paleung paeaung bo.

¹⁵Naibaly mymy hawi, my i dengtheaungchi hawi baptisma nga pajau nai kha y, “Kai ly Areng ai ym tatang, nanai nangchi athang khai baly, kai i yhm y ango u ba,” napi; naibaly mymy ly kaichi ai khrikhri pa-rei takeng i patawn bo.

¹⁶Naibaly hina nai awm, kaichi ly chiu sa nai meingtym y chei nai thym khala y anglo leaungrei ami mo, vawinam i leung kawp nai hawi avum, ni ly leung kawp nai deaungkho y mymy i yhmkeungchi ai ly kamran neangneang nga hai.

¹⁷Huni anglo ly Pawla kaichi ai hui iy, “Hini khumi paheng nai lam ang thui pi nai keungchi ly Salo Keh i Tameuh i miseaungchi na a hi ly,” nanai aeu.

¹⁸Mymy ly hunai kamta kani kra parai nai sa. Hunaibaly Pawla ly paleung hawi y i, hi vui iy vawinam teng y ly, “Isu Krista i amyn y mymy i taku theung i dengdairei theu ai nai leu kang pei,” napi. Naibaly huna nai thym khyp khala y my theu ryp bo.

¹⁹Naibaly yhmkeungchi ly mychi i kamran nga naira tama vui bo, nanai pany i, Pawla nini Sila ai patiu iy miteaung kehchi i mo y seng meingtym y ryh bo.

²⁰Hunaibaly tara chih nai keungchi teng y pahawi iy, “Hinichi ly Juda ne, achi i avang y khrikhri pa-rei khrukhra iy,

²¹atiti reita thla mo achi kawn ai nai hawi patawm ngaungau y naichi patiu lawh ly, achi ly Rom amjy teu na iy,” napi.

²²Hunaibaly khumi mipuichi ly nini ai ni ai nai angthau, tara chih nai keungchi py nini i kanih theng pi pawn iy cheaungvawi y pakhau ai nai leu pei.

²³Naibaly nini ai neangneang pakhau nai bo y theaung y khai iy, typ nai keung teng y ly hawihai palai typ ai nai leu pei kheng;

²⁴huna tanrei leu pei nai deaungkho y mymy ly nini ai theaung sala katem i naira y paeung iy, nini i kheuy deaungki thiu hai thleng.

²⁵Na i py aneng hyh khala y Pawla nini Sila ly Tameuh teng y chiu py chiu sa, khulym py thui i, theaung tla naichi ly tangai u bo;

²⁶naibaly tlenrei khyh my kaleih khri pa-rei theu, hunaibaly theaung lengseaung leng nai mang y ahyn bo; katheu bawibawi py am-eaung praw iy, khumi leaung leaungrei i pakheng naira ly akheaung bebe veng.

²⁷Naibaly typ nai keung ly i nai anglaw iy, theaung katheu am-eaung nai niu i, theaung tla naichi ly tleaung pawn mi bo na i, mymy i haisau aphiu iy apadei ai nai tau.

²⁸Na i py Pawla my athorei my, “ati sai py aso moh; kaichi hi y awm angym bebe mang,” nanai aeu.

²⁹Naibaly typ nai keung my ly maiteaung palau hai i tlenrei my satla kathiu nai kun iy jei nai kaso theu naimy Pawla nini Sila i mo y ambeu; naibaly nini ai ly theu hai i,

³⁰“Arengni awi, hengra nga ai nai mana kasa ai mo?” napi.

³¹Naibaly nini my ly, “Areng Isu ai ym, hunaibaly nang hengra nga ai, nang hawi nang i dengtheungchi py,” napi.

³²Naibaly nini ly mymy teng y hawi, mymy i yhm y awm nai bawibawichi teng y py Areng i leu thui pi.

³³Naibaly huni vum y huna nai thym khyp khala y my nini ai pahawi iy pakhau nai tamo ly sawp pi pan; naibaly mymy hawi mymy i dengtheungchi bawibawi py baptisma nga praw ryp.

³⁴Naibaly mymy i yhm y nini ai pahawi kalau iy, cha ai nai pawi pi, naibaly Tameuh ai ym nai deaungkho y mymy hawi mymy i dengtheungchi bawibawi py khri pa-rei amo theu parai bo.

³⁵Naibaly kani si iy tara chih nai keungchi my ly, “Huni khumi nini ai patheu,” napi ai nai khumi patiu nai keungchi ai pato.

³⁶Naibaly theaung typ nai keung my ly Pawla teng y, “Tara chih nai keungchi my ly, ‘Theu hawi sy,’ nanai khumi ang pato; hunai deaungkho y theu hawi ly, paleung awmnem naimy tako hawi ba,’ napi.

³⁷Na i py Pawla my nichi teng y, “Kaini ly Rom khumi nai iy, sum y naimy kaini ai khumi humchi i mei ka-niu y ang pakhau nai, theaung y ang khai lawh nai iy, vai ly kangviu y pathau ai nai tau u lawh a? Ny y leang; mymychi kypkyp my jeu u sy ly, kaini ai patheu u sy,” napi.

³⁸Hunaibaly khumi patiu nai keungchi my huni leu ly tara chih nai keungchi teng y thui pi, Naibaly nini ly Rom khumi ne, nanai thai i jei u bo;

³⁹naibaly chei u iy hawihai parawi i patheu bo, avang i dengdairei tako vui ai nai nini ai takeng.

⁴⁰Naibaly nini ly theaung i nai theu hawi iy Ludia i yhm y kun bo; naibaly nini ly amjo amnauchi hawi avum hawi i, nichi ai paleung awm hai nem iy chei hawi bo.