Read Khumi Chin AMTAW 17 Bible Online

AMTAW 17 - Khumi Chin bible

AMTAW 17

¹Naibaly nichi ly Amphipoli avang hawi Apolonia avang y tako prei i, Thesalonika avang y tym bo, hu y ly Judachi i achura yhm awm;

²naibaly Pawla ly mymy i reita kamta mymychi teng y kun iy Anawn Kani tlen thomrei Tameuh i cha-iu leu dengdairei hawihai palai ka-thui thui pi iy,

³Krista ly ngari patang ai nai hawi, kadeichi theung i dengdairei angthau bi ai nai angchi yb nai saichi py chai pyn pa-rei thui pi pachai i, “Hini Isu, mymy i leu kang thui pi nai ly, mymy ly Krista ne,” napi.

⁴Hunaibaly mymychi theung y phyreichi ai ly parawi pajau i, Pawla nini Sila hawi amkawm u bo; Tameuh ai tahm khai nai Krik khumi mipui neangneangchi hawi, neampachy miteaung keh nawi rawm naichi py amkawm teang.

⁵Na i py Judachi my paleung no i, seng meingtym y khumi kamngo atho kasi amichi ai mo mymychi teng y pahawi iy, khumi mipuichi ai palau achu i avang bawibawichi ai ly khrukhra hai; naibaly Jason i yhm y amiu iy nichi ai khumi mipuichi teng y pahawi ai nai tau.

⁶Naibaly nichi ai niu y i, Jason hawi amjo amnau takhra amichi ai mo avang miteaung kehchi teng y ryh iy, “Khaileaung pri y kulu piupa nai keungchi ly hi y py ang tym i,

⁷Jason my ly anga hai lawh; hinichi bawibawi ly Isu napi nai samrang takhra leaungrei awm, nanai Kaisara i leu pei nai tangai y,” nanai aeu u.

⁸Naibaly huna nai satang thai baly nichi ly khumi mipuichi hawi avang miteaung kehchi ai py khrukhra hai bo.

⁹Naibaly Jason hawi takhrachi ai kham pi i patheu bo.

¹⁰Naibaly amjo amnauchi my ly vum aneng y my Pawla nini Sila ai ly Beroia avang y pato praw; nini ly hu y tym baly Judachi i achura yhm y kun hawi bo.

¹¹Hu i khumichi ly Thesalonika avang i khumichi tleaung y ly hawi kyh, ati mana nai mo nabaly nichi ly paleung kawn parai naimy huni leu tangai iy, huni satang thui pi nai ly teng mo teng y mo, nanai Tameuh i cha-iu y kani tleirei hau u.

¹²Hunai deaungkho y nichi theung y khumi neangneang ym; Krik neampachy tahm asang naichi hawi, neampacho nawi rawm naichi py.

¹³Na i py Thesalonika avang i Judachi ly Pawla ly Beroia avang y py Tameuh i leu thui pi, nanai thai baly, hu y py chei u i khumi mipuichi ai thui thli iy khrukhra hai bi bo.

¹⁴Hunaibaly amjo amnauchi my ly pangli y tym pa-rei chei ai nai Pawla ai ly pato praw veng bo: Sila nini Timothei naini hu y awm hawi jo rai.

¹⁵Naibaly Pawla ai tha nai keungchi my ly Atheni avang y tym pa-rei ni ai pahawi; naibaly Sila nini Timothei ly kamjau ryrei mymy teng y tym praw ai nai leu taviu nai syn i vawi veng bo.

¹⁶Naibaly Pawla ly Atheni avang y nini ai ajeng nai thym khala y ly, huni avang ly tameuh myn kawi nanai niu i, mymy ly paleung am-yh pajau y bo.

¹⁷Hunaibaly achura yhm y Judachi hawi, Tameuh ai tahm khai naichi hawi, seng meingtym y mymy hawi kani tleirei achu nai ngiereichi ai py ka-thui thui pi.

¹⁸Naibaly Epikuria khumi hawi Stoik khumichi theung y khumi kacheng amichi mo mymy hawi avum. Phyreichi ly, “Hini khumi leu kapeung ly ati thui ai nai tau mo?” napi. Phyreichi my ly, “Tameuh takhrachi i satang thui nai ngaw khyh,” napi. mymy ly Isu i satang hawi angthau bi nai leu py thui pi nai deaungkho y.

¹⁹Naibaly mymy ai ly patawn iy Areopaki y pahawi i mymy teng y, “Hini nang i leu patiu nai kangtha ly kaichi ai thui pi thai na a?

²⁰Hini atiti rengrangchi ly kaichi i kano keung y nang tym hai nai bo; hunaibaly hini atiti awm nai saichi pany ai nai ngai he,’. napi.

²¹(Atheni avang i khumi bawibawichi ly mymychi i avang y angvyn awm naichi py, ra nai tleirei ly leu kangtha nanai baly thui ai nai mo, tangai ai nai mo awm khrum khrum reng nai ne.)

²²Naibaly Pawla ly Areopaki sala y my angdo iy, “Nangchi Atheni avang i khumichi awi, ati cheaungkhangra y nangchi khrikhri pa-rei reita y tahm khai parai nai khumi ne, nanai kapany bo.

²³Kai pavai nai tarawi y nangchi i chiu reng nai myn khen nai khala y maicham harei, salo y, PANY Y NAI TAMEUH I VUI, nanai tajiu nai kaniu bo. Hunaibaly nangchi i pany y nai chiu reng nai ai ly kang thui pi nai he.

²⁴Khaileaung pri hawi, huni theung y ati cheaungkhang bawibawi sa nai Tameuh ly kani khaileaung Areng ne nai deaungkho y khumichi i kiu y sa pi nai yhm y ly awm y leang;

²⁵atiti avaw nai kamta ly khumichi i kiu y kalop sa pi nai py awm vai y leang, ati mana nai mo nabaly mymy naini ati cheaungkhangchi teng y hengra hawi, taho naira hawi, atiti bawibawi py pei nai keung ne;

²⁶khaileaung salo verei y awm ai nai thi vanrei y my khumi cheaungkhang ai sa iy, mymychi i vui neng hawi awm naira jyh py khai pi;

²⁷nichi ly patham patham naimy Tameuh ai hau i niu u tanga ai nai; ne mang ly mymy ly achi leaung leaungrei ai palo hai y leang;

²⁸mymy deaungkho y achi heng py heng, angto py angto, awm py awm nai teu; nangmychi i khulym paseang kakawp amichi mo py, ‘Kaichi py mymy i kangpreang ne teang, nanai thui nai kamta ly.

²⁹Hunaibaly achi ly Tameuh i kangpreang ne baly, Tameuh i awm nai sai ly muku mo, tangka mo, lengseaung mo, khumi i kupe kakawp hawi ka-vo thip nai kamta, nanai dawn ai nai avo y leang.

³⁰Hunaibaly Tameuh my achi i pany y khala i neng ly dawn pi y leang; na i py vai ly meingtym tleirei i khumi bawibawichi ai uikhei ai nai leu ang pei bo;

³¹mymy ly mymy i khumi khai rym nai ai ly khaileaung pri y hawihai palai tarahih hai ai nai kani thui yb nai deaungkho y; huna nai Tameuh my mymy ai ly kadeichi theung i dengdairei pathau iy, khumi bawibawichi teng y thai hai khyp bo,” napi.

³²Naibaly nichi ly kadeichi theung i nai angthau bi nai satang thai bo nabaly, phyreichi my ly panui hai, na i py phyreichi my ly, “Hini leu ly kaichi kang tangai bi ai mang,” napi.

³³Hunaibaly Pawla ly mymychi theung i dengdairei theu vui bo.

³⁴Na i py khumi amichi mo ly mymy teng y amkawm akhikan i ym bo; hunichi theung y Areopaki i khumi Dionusia hawi, neampachy leaungrei amyn Damari napi nai hawi, nini hawi khumi takhrachi py ne.