Read Khumi Chin AMTAW 2 Bible Online

AMTAW 2 - Khumi Chin bible

AMTAW 2

¹Naibaly Pentekost kani tym kha y nichi bawibawi paleung vanrei my meingtym harei y awm achu be.

²Naibaly tlenrei khyh my kani pri mang i dengdairei ali khu theu nai ka-tawm tym miu, naibaly huni ly nichi i ateh nai yhm verei kawi bebe.

³Naibaly palaichi ly mai ka-tawm nichi teng y amji iy ahei nai nichi teng y amteng bo; naibaly nichi i lu tleirei y chym.

⁴Naibaly nichi bawibawi ly Phailo Kachai my kawi bebe i, Phailo my leu katheu hai nai ka-tawm leu takhra takhra katheu u amteaung bo.

⁵Naibaly kani anui i cheng cheaungkhang theung i dengdairei Tameuh ai dawn parai nai Judachi ly Jerusalem y ni awm.

⁶Naibaly huni tyn thai bo nabaly khumi mipuichi jeu achu i, khumi leaung leaungrei nichi i leu ly amy i leu ana pa-rei thui nai thai lawh nai deaungkho y dawn ai nai ngo y.

⁷Naibaly nichi bawibawi ly lyh parai nai rengrang tlai ly napi i, “Khen cham, hini leu thui nai khumichi bawibawi ly Kalili pri i khumi ne y lawh a?

⁸Naibaly achi khumi leaung leaungrei amy i tapen ahawi nai leu ka-tawm mana thai lawh mo?

⁹Parthai cheng hawi, Medai cheng hawi, Elamitai cheng hawi, Mesopotamia pri i hawi, Judai pri i hawi, Kapadokia pri i hawi,

¹⁰Ponto pri i hawi, Asia pri i hawi, Phrukia pri i hawi, Pamphulia pri i hawi, Aikupta pri i hawi, Kurini ahawi Libua pri i awm naichi hawi, Rom angvyn Judachi hawi, mychi i suibang kammeaung hawi,

¹¹Krit tlawn i awm naichi hawi, Arabi pri i awm naichi py Tameuh i atiti sa nai nang parai naichi nichi i thui nai, amy i leu ana pa-rei achi thai na ly,” napi.

¹²Naibaly nichi bawibawi ly lyh parai i dawn pany y nai mychi tengtawi, “Hini ly ati mana nai sai mo?” na u.

¹³Na i py phyreichi my ly panui hai lawh i, “Kreip athai hang kangtha pavui nai na a hi ly,” napi.

¹⁴Na i py Petera my holai hareichi hawi angdo iy ni ly tao pajeng parai naimy nichi teng y, “Nangchi Judai pri i khumichi awi, Jerusalem y awm nai bawibawichi awi, hini ly pany u ly, kai i leu py tangai u.

¹⁵Hinichi ly nangchi i dawn nai kamta pavui y leang, kani achaw deaung khyh rai chy bo.

¹⁶Na i py hini ly amo Joela i thui nai ne;

¹⁷‘Naibaly Tameuh my, Kangkhym i neng y ly hina nai awm ai. Ngan bawibawi tleaung y kai i Phailo kang lei ai: Nangchi i chapo chaniuchi my py kai i leu thui ai: Nangchi i thawndeangchi my py atiti amteng nai niu ai: Nangchi i miteaung neampachochi my py amang mang y amang ai:

¹⁸Ne, huni kani y ly kai i miseaung neampacho neampachychi i tlang tleaung y py kai i Phailo kang lei ai i, nichi ly kai i leu thui ai.

¹⁹Kaimy salo mang i kani y ly atiti rengrangchi, Anui mang i khaileaung y py atiti ka-ma-rachi kapatei ai: Thi hawi, mai hawi, maikhyh amhui nai hawi:

²⁰Areng i kani nang parai nai hawi amyn amthang parai nai ly tym y rai kha y, Kanito ly kaveng lawn ai i, Lo py thi lawn ai:

²¹Naibaly hina nai ne ai, Ami py Areng i amyn y palau nai ngierei ly heng ai,’ napi.

²²“Israela khumichi awi, hini leu ly tangai u cham: Nazaret Isu ai ly Tameuh my mymy ai teaung iy nangchi theung y atiti nang parai naichi hawi, atiti rengrangchi hawi ka-ma-rachi hawi sa nai ly hawihai ang pany hai nai, huni ly nangmychi kypkyp my pany bo.

²³Ni ai ly Tameuh my mymy i kangai sa ai tau thleng nai hawi pany yb nai kamta patiu hai iy, nangchi lykhumi kamngochi i kiu y kraws tleaung y tahen i padei bo.

²⁴Mymy ai ly deira my patawn pajau ai nai ly aveng nai deaungkho y, deira my kawm naichi ly Tameuh my su pi i pathau bo.

²⁵Naibaly Davida my ni i satang thui i, Kai i mo y Areng ai ly kaniu jojo; Kai amchyh y ai nai mymy ly kai i lamtang mang y awm:

²⁶Hunai deaungkho y kai i paleung amo theu i, kai i palai py kawn;

²⁷kai i phailo ai tavau kho y khai jo y ai i, Nang i Khumi Kachai ai veaung vui ai nai pei y nai deaungkho y, Kai i ngan py athang khai parai naimy awm teang ai.

²⁸Nang ly kai ai heng nai lam patei bo, Nang i meimai my kai ai kawn nai kawi hai ai,’ napi.

²⁹“Amjo amnauchi awi, nangchi teng y achi i amsi sangum Davida i satang ly angym be pa-rei kai thui pajau: ni ly dei i up py up bo chy bo, ni i angawm py vai khrairei achi teng y awm jo rai.

³⁰Ni ly amo ne i, Tameuh my ni i phai bawi kamji khumi ami ai mo ni i areng atehra tleaung y ateh hai ai, nanai vaineng abeu naimy thui, nanai ni ly pany.

³¹Naibaly mymy ly huna nai pany rym nai deaungkho y Krista i angthau bi ai nai satang thui iy, ni ai tavau kho y khai su y i, ni i veu py veaung y, napi.

³²Hini Isu ai ly Tameuh my pathau bi bo, nanai kaichi bawibawi ly pany hai nai keung ne.

³³Mymy ai ly Tameuh i lamtang mang y pasang i, Phailo Kachai adeu nai ly Ampo teng i nga iy, hini nangchi i niu nai hawi thai nai ly ni i ang lei nai bo he.

³⁴Davida ly kani pri mang y lyn y leang, na i py mymy kypkyp ly, Areng ly kai i Areng teng y, Nang i paleung ka-echi ai ly nang i kheu khai naira kapalawn y ryrei ly,

³⁵Kai i lamtang mang y ateh, napi’ nanai na a.

³⁶Hunaibaly nangchi i tahen nai Isu ai ly Tameuh my Areng hawi Krista y palawn bo, nanai Israela cheng bawibawi my pany u khypkhyp sy,” napi.

³⁷Naibaly huna nai leu thai i nichi i paleung y thun iy Petera hawi abangnai takhrachi teng y, “Amjo amnauchi awi kaichi mana sa ai mo?” napi.

³⁸Naibaly Petera ly nichi teng y, “Uikhei u ly, nangchi i kamngo pahen ai nai Isu Krista i amyn y baptisma ngo u bawibawi, hunaibaly Phailo kachai pei nai ly nangchi py ngai ai.

³⁹Ati mana nai mo nabaly hini adeu nai ly nangchi i vui py, nangchi i chanauchi i vui py, kamlo parai ra i khumi bawibawichi i vui py, Areng achi i Tameuh my mymy teng y palau nai ngiereichi i vui py ne,” napi.

⁴⁰Naibaly leu takhra takhra neangneang hawihai palai thui pi i, “vai deung kangthau sa ta-li naichi theung i nai apalawi u,” nanai pachei.

⁴¹Naibaly ni i leu tangai nai ngierei ly baptisma nga bo, naibaly huni kani y ly khumi sang thomrei awm panawi bi.

⁴²Naibaly nichi ly abangnaichi i leu patiu naira y hawi amkawm naira y hawi, tako theng baw naira y hawi, chiu sa naira y py hawihai palai awm u jo.

⁴³Naibaly khumi bawibawichi ly jei i, abangnaichi ly atiti rengrang hawi ka-ma-ra neangneang sa.

⁴⁴Naibaly ym nai ngiereichi ly paleung vanrei awm i ati cheaungkhang ahum;

⁴⁵mymychi i vawnsai hawi yhmtheaung katuichi jo iy, nichi i avo nai ka-leu ryrei amji bawibawi.

⁴⁶Naibaly kani tleirei paleung vanrei my achura yhm kalen pui y hawihai palai awm u i, nichi i yhm y py tako theng bawi iy, amo theu parai naimy paleung tinem iy biu cha nai, Tameuh ai palo.

⁴⁷Naibaly khumi bawibawichi ly nichi ai kawn hai. Naibaly paheng dudu nai ngiereichi ai ly Areng my kani tleirei nichi teng y panawi hai ryhryh.