Read Khumi Chin AMTAW 22 Bible Online

AMTAW 22 - Khumi Chin bible

AMTAW 22

¹“Amjo amnauchi hawi ngaaichi awi, vai nangchi teng y kai i eaung nai leu kang thui pi ai i tangai u ba,” napi.

²Naibaly mymy ly Hebrai leu y mymychi teng y leu thui, nanai pany baly nichi leu anawn tleaung y anawn ra:

³naibaly mymy ly, “Kai ly Juda khumi ne, Kilki pri i Tarsa avang y tapen nai, na i py hini avang achi i amsi sangumchi i Reita kamta kypkyp Kamaliela i kheu keung y amtiu naira y tleaungri ka-veang nai ne, vaini ly nangmychi bawibawi ka-tawm khyp naimy Tameuh i vui y kadawn pathyp nai ne:

⁴naibaly hini Lam i khumichi ai padei ai nai pa-rei kai ana iy, neampacho neampachychi ai kawm nai, theaung y kakhai reng.

⁵Pathyp pi nai keung kalen keh hawi miteaung kehchi bawibawi my py huni leu ly ang pany hai pajau mang: mymychi teng i dengdairei py amjo amnauchi ai pei ai nai vui cha kanga iy, Damaska avang y awm nai ngiereichi ai kapajeng hai ai nai kawm i, Jerusalem y pahawi ai nai kachei nai ly.

⁶Naibaly hina nai awm, kai chei i kanithun kha y Damaska avang ahawi y tym iy, tlenrei khyh my kani mang i dengdairei kangvang ka-teng ny y nai kai i ahawi y angvang phang na;

⁷naibaly kai ly khaileaung y atlym i kai teng y, ‘Sawla, Sawla, nang ly ati mana nai kai ai ana ryry lawh?’ nanai raawi kathai.

⁸Naibaly kaimy, ‘Areng, nang ly ami mo?’ nanai pathang. Naibaly ni my ly kai teng y, ‘Kai ly Nazaret Isu nang i ana nai ne,’ napi.

⁹Naibaly kai i ahawichi ly kangvang mang ly niu i py, kai ai ang thui pi nai raawi ly thai y leang.

¹⁰Naibaly kaimy, ‘Areng, kai mana sa ai mo?’ kanapi. Naibaly Areng my ly kai teng y, ‘Angthau ly, Damaska avang y kun:atiti bawibawi nang i sa ai nai khai rym nai ngierei ang thui pi ai mang,’ napi.

¹¹Naibaly huni kangvang nang parai nai sai deaungkho y kai ly kani kangvang niu thai y bo, kai i ahawichi my kiu y ang pahawi i Damaska avang y kakun bo.

¹²“Naibaly khumi leaungrei, Anania, Reita y Tameuh ai tahm khai nai hawi, hu y awm nai Judachi bawibawi teng y amyn kahawi amthang nai ly kai teng y ang jeu iy, kai i ahawi y angdo i, kai teng y,

¹³‘Be Sawla, mei angvang jau ba,’ ang napi. Naibaly hunai thym khyp khala y ly mymy ai kaniu bo.

¹⁴Naibaly ni ly, ‘Achi i amsi sangumchi i Tameuh my mymy i kangai pany ai nai hawi, Khumi Kahawi ai niu ai nai hawi, mymy i labeaung i raawi thai ai nai py nang ai ang khai rym nai bo.

¹⁵Nang i niu nai hawi thai naira y py mymy i vui khumi bawibawichi teng y nang ly pany hai nai keung lawn ai.

¹⁶Naibaly ati mana nai nang ly vai ajeng jo rai mo? Angthau ly, mymy i amyn palau nai tarawi y baptisma nga iy nang i kamngochi chai hai bei,’ ang napi.

¹⁷“Naibaly hina nai awm, kai ly Jerusalem y vawi teang nai bo y achura yhm kalen pui y chiu sa nai thym khala y atiti tahm bo;

¹⁸naibaly, ‘Awn ly, Jerusalem i dengdairei theu jau, kai i satang nang thui ai nai ly nichi tangai ai ny y leang he, ang napi thym nai kaniu.

¹⁹Naibaly kaimy, ‘Areng, achura yhm tleirei y nang ai ym nai ngiereichi ai theaung y kakhai iy kapakhau reng nai ly nichi pany;

²⁰naibaly nang i leu pany hai nai keung Stephana i thi patheu nai khala y py kai py ahawi y kangdo i avo, napi iy, padei nai keungchi i kanihchi py kaimy katyp,’ kanapi.

²¹Naibaly ni my, ‘Chei ly, hi i dengdairei palo parai naira Cheng Takhrachi teng y kang pato ai,’ ang napi,” napi.

²²Naibaly nichi ly huni leu tym pa-rei tangai; naibaly athorei my, “Hina nai khumi ai ly hini khaileaung pri i dengdairei lo veng; heng ai nai py avo y leang,” napi bo.

²³Naibaly aeu nai mychi i kanih aphi pawn i spryh hawi kani mang y pachaw nai thym khala y,

²⁴tavaimi lu areng keh ly Pawla ai apai theung i yhm y pakun ai nai thui pi; mymy i tlang tleaung y huna tanrei aeu nai sai pany ai nai chip nai tarawi y deng ai nai leu pei.

²⁵Naibaly nichi ly mymy ai mawipeih vui y kawm rang pajau iy, Pawla ly mymy ahawi i angdo nai tavaimi chungvairei lu teng y ly, “Rom khumi nanai ai ly pasum nai bo y ny y naimy chip ngau a?” napi.

²⁶Naibaly tavaimi chungvairei lu my ly huna nai thai baly tavaimi lu areng keh teng y chei i, “Nang ly ati sa ai nai tau mo? Hini khumi ly Rom khumi na a,” nanai thui pi.

²⁷Naibaly tavaimi lu areng keh ly chei i mymy teng y, “Kai ai thui pi kyh. Nang ly Rom khumi a?” napi. Naibaly mymy ly, “Ne na a,” napi.

²⁸Naibaly tavaimi lu areng keh my ly “Kai ly huni avang i khumi lawn ai nai tangka neangneang kakhei rai chy bo,” nanai pathang. Naibaly Pawla my ly, “Kai ly Rom khumi ne angchi yb nai tapen lyhlyh nai bo,” napi.

²⁹Hunaibaly deng ai tau naichi ly mymy ai khai su ryp; tavaimi lu areng keh my py ni ly Rom khumi ne, nanai pany i, ni ai kawm nai deaungkho y jei bo.

³⁰Naibaly khawn mang y Judachi my ati mana nai y Pawla ai seu mo, nanai hawihai pany ai ngai nai, mymy ly ni ai su; naibaly pathyp pi nai keung kalenchi hawi tara chih nai keung bawibawichi achu ai nai leu pei i, Pawla ai pahawi kathiu iy mymychi i mo y angdo hai bo.