Read Khumi Chin AMTAW 23 Bible Online

AMTAW 23 - Khumi Chin bible

AMTAW 23

¹Naibaly Pawla ly tara chih nai keungchi ai khen ryry i, “Amjo amnaichi awi, vaini khrairei Tameuh i mei ka-niu y kai i pany nai ngierei sa naira y paleung kahawi mang y kaawm jo rai,” napi.

²Naibaly pathyp pi nai keung kalen keh Anania my ly ni i ahawi y angdo naichi teng y ly ni i labeaung y tabeang pi ai nai leu pei.

³Naibaly Pawla my ly mymy teng y, “Nang an kangleung paju nai ampang awi, nangmy ai naini Tameuh my ang tabeang ai mang; nang ly Reita kamta kai ai chih ai nai ateh nai iy, Reita ny y nai kai ai tabeang ai nai leu pei lawh a?” napi.

⁴Naibaly ahawi y angdo naichi my, “Nang ly Tameuh i pathyp pi nai keung kalen keh ai jo lawh a?” napi.

⁵Naibaly Pawla my, “Amjo amnauchi awi, mymy ly pathyp pi nai keung kalen keh ne, nanai kai pany y; ‘nang i chengchi ai krykeung i tlang tleaung y leu hawi y nai thui moh,’ nanai py tajiu nai awm,” napi.

⁶Naibaly phyrei ly Saddukaichi, phyrei ly Pharisaichi ne, nanai Pawla niu iy, tara chih keungchi theung y aeu i, “Amjo amnauchi awi, kai ly Pharisai ne, Pharisai i chapo py ne ryp; kadeichi i vui athang khai naira hawi angthau bi naira py kai ai ang deng nai he,” napi.

⁷Naibaly huni leu thui pajau baly Pharisaichi hawi Saddukaichi ly aei u i, tara chih nai keungchi ly amji u bo.

⁸Ati mana nai mo nabaly Saddukaichi ly kadeichi angthau bi ai nai ha py by y, kani pri i amtaw thau nai py, phailo py by y leang, napi; na i py Pharisaichi ly huni nyhrei ly awm, nanai thui pi.

⁹Hunaibaly khrikhri pa-rei khrukhra bo; Pharisaichi mang i Reita patiu nai keung phyreichi ly angdo iy khri pa-rei aei i, “Hini khumi ly tamang naira kaichi ati sai py pany y leang; phailo mo kani pri i amtaw thau naimo mymy teng y atiti thui pi lawh baly mana sa ai mo?” napi.

¹⁰Naibaly aei nai ty ra ty ra nai deaungkho y tavaimi lu areng keh my ly nichi my Pawla ai lawm meimeaung ai nai jei hai i, tavaimichi teng y, “Chei u ly, nichi theung i dengdairei ni ai athorei my la vui iy, apai theung i yhm y pahawi u kalau,” nanai leu pei.

¹¹Naibaly huni vum y Areng ly Pawla i ahawi y angdo iy, “Ham parai naimy awm ly, Jerusalem y nang ly kai i leu pany hai nai kamta ly, Rom avang y py nang pany hai ai nai tla,” napi.

¹²Naibaly kani si iy Judachi ly vanrei asa krup i, Pawla ai padei y ryrei ly ati sai py cha nei ai ny y, nanai vaineng abeu bo.

¹³Huni leu thui nai keungchi ly vui palyhrei chang y.

¹⁴Naibaly nichi ly pathyp pi nai keung kalenchi hawi miteaung kehchi teng y chei iy, “Kaichi Pawla ai padei y ryrei ly ati sai py pateng y ai nai vaineng abeu khei bo.

¹⁵Hunai deaungkho y nangchi hawi tara chih nai keungchi py leu hawi nai tleaung y hawi ra chih ai tau nai kamta, ni ai nngchi teng y pahawi kathiu ai nai tavaimi lu areng keh teng y thui u; naibaly mymy ly nangchi i ahawi y tym y rai kha y my kaichi ly mymy ai padei ai nai ajeng yb ai mang,” napi.

¹⁶Na i py Pawla i meaungcha ly nichi my o nai satang ly pany i, apai theung i yhm y kun iy Pawla ai thui pi.

¹⁷Naibaly Pawla ly tavaimi chungvairei lu leaungrei ai palau i, “Hini thawndeang ai ly tavaimi lu areng keh teng y pahawi ba; ni teng y ati leu sai mo thui ai nai awm,” napi.

¹⁸Hunaibaly tavaimi lu areng keh teng y ni ai pahawi i, “Pawla, theaung tla nai khumi my kai ai palau i, hini thawndeang ai nang teng y hawi ai nai ang hnei, nang teng y ati leu sai mo thui ai nai awm ngaw khyh,” napi.

¹⁹Naibaly tavaimi lu areng keh my ly ni i kiu y amkhaw nai pahawi takhra iy deng paviu i, “Kai teng y thui ai nai ly ati mo?” napi.

²⁰Naibaly ni my ly, “Pawla ai ly leu hawi nai tleaung y hawi ra chih ai tau nai kamta, khawndam tara chih nai keungchi teng y pahawi kathiu ai nai hnei ai nai Judachi my avo, napi bawibawi.

²¹Na i py mymychi i leu ly tangai moh ba; nichi theung i leaung vui palyhrei chang y naichi ly o yb bo, nichi ly ni ai padei y ryrei ly ati sai py cho nei y ai nai vaineng abeu bo; vai nang i leu ajeng nai awm u ryhryh jo,” napi.

²²Naibaly tavaimi lu areng keh my thawndeang ai ly tako hai i, “Hini leu ly kai ai thui pi bo, nanai ami teng y py thui moh,” napi kheng.

²³Naibaly mymy ly tavaimi chungvairei lu leaung nyhrei ai palau i, “Vum y i syh nai khala y Kaisari avang y tym pa-rei chei ai nai tavaimi chungvai nyhrei hawi, keaungngo tleaung y atang nai khumi vui saryhrei hawi, tivi syn nai khumi chungvai nyhreichi ai angvei hai rym,” napi;

²⁴naibaly aripeang Felika teng y chymme naimy tym hai thai ai nai Pawla atang ai nai vui mawichi py khai u rym ai nai leu pei.

²⁵Naibaly mymy ly hinai kamta cha tajiu i,

²⁶“Klawdia Lusia ly aripeng kahawi keh nai Felika teng y kawn ba.

²⁷Hini khumi ai ly Judachi my patiu i padei ai nai thym khala y, mymychi teng y kai tavaimichi ai hawi iychei i, Rom khumi ne, nanai kai pany i kapalawi bo.

²⁸Naibaly nichi i seu nai leu kapany ai nai ngai i, nichi i tara chih nai keungchi teng y kapahawi kathiu;

²⁹hunaibaly mymychi i Reitara y ati mo seu, nanai kai pany, na i py nichi i seu nai ly dei ai nai hawi kawm ai ataing nai kai ati sai py pany y leang.

³⁰Naibaly Judachi my ni ai amo jojo nanai khumichi my ang thui pi nai kapany baly, mymy ai ly nang teng y kang pato praw nai bo, mymy ai seu nai keungchi py mymy i tlang tleaung y leu awm nai ngierei ly nang i mo y thui ai nai leu kapei. Noso kahawi awm ba,” napi.

³¹Hunaibaly tavaimichi ly mymy i leu pei nai kamta ly Pawla ai hawi iy, vum aneng y Antipatri avang y tym hai bo.

³²Naibaly khawn mang y mymy hawi chei veangveang ai nai keaungngo tleaung y atang naichi ai ly khai su i, nichi ly apai theung i yhm y vawi ali teang.

³³Naibaly nichi ly Kaisari avang y tym iy aripeng teng y cha pei i, Pawla ai py mymy i mo y angdo hai.

³⁴Naibaly aripeng my phain pajau iy, ni i awm nai pri deng.

³⁵Naibaly Kiliki pri i khumi ne, nanai pany baly, “Nang ai ang seu nai keungchi tym iy nang i satang kang dawn pi ai,” napi. Naibaly Heroda i yhm y typ ai nai leu pei.