Read Khumi Chin AMTAW 24 Bible Online

AMTAW 24 - Khumi Chin bible

AMTAW 24

¹Naibaly kani pangrei nai khala y pathyp pi nai keung kalen keh Anania ly, miteaung keh amichi mo hawi, amyn Tertula leu thui kakawp leaungrei hawi tym kathiu ; naibaly Pawla i tlang tleaung y leu hawi y nai ly aripeng teng y thui u.

²Naibaly Pawla ai palau nai bo y Tertula ly ni ai seu nai amteaung i, “Felika kahawi keh awi, nangmy i saho y kaichi khrikhri pa-rei paleung awmnem naimy awm nai deaungkho y hawi,

³nangmy kry nai hini chengchi i vui y kamngora y hawihai kam reng nai deaungkho y, ati cheaungkhangra y, ma mang y py paleung hawi parai i kaichi kawn parai ba.

⁴Na i py nang paleih ai awm ala ai nai kangai y leang, nang i neaung hawi naira y my kaichi i sairei tangai pi ai nai kang takeng.

⁵Hini khumi ly khri pa-rei hawi y, khaileaung pri verei y Juda bawibawichi ai thui thli piupiu nai keung hawi, Nazaret khumichi i kamkawm pahawi keung len keh nai ne, nanai kaichi pany;

⁶mymy ly achura yhm kalen pui py panyng ai nai tau bi; kaichi my ni ai patiu iy, kaichi i reita kamta chih ai nai tau bo;

⁷na i py tavaimi lu areng keh Lusia napi nai ly kaichi teng y tym i, ni ai kaichi i kiu i dengdairei athorei my la veng iy, ni ai seu nai keungchi ly nang teng y jeu ai nai leu pei;

⁸nangmy kypkyp my ni ai deng iy, kaichi i atiti seu nai bawibawi ly nang pany thai ai,” napi.

⁹Naibaly Judachi py, “Huni leu ly hunai kamta ne,” nanai asa hai teang.

¹⁰Naibaly aripeng my ly Pawla ai leu thui ai nai kiu y kalawi baly Pawla my, “Nang ly saneng kra parai nai hini chengchi ai tara chih pi nai keung ne, nanai kai pany nai deaungkho y kawn parai naimy kai i eaung nai leu kathui ai he;

¹¹Jerusalem y Tameuh ai chiu ai nai kachei nai ryrei kani holai nyhrei bo y kra y leang rai, nanai nang pany pajau ai.

¹²Achura yhm kalen pui y py, achura yhm y py, avang y py, ami ai py kai ei nai hawi, khumi mipuichi ai kai thui thli nai py nichi my kai ai niu y leang.

¹³Vai py nichi ly kai ai ang seu nai leu ly nang i ka-thai y py leu kateang amkhaw thai ai nai ny y leang.

¹⁴Na i py hini leu ly nang teng y kai atapheaung ai, kamkawm takhra ang napi nai ly huni Lam reita kamta achi i amsi sangumchi i Tameuh ai kachiu. Reita hawi amochi i cha-iu y tajiu nai bawibawi py kai ym;

¹⁵naibaly khumi kahawichi py, hawi y naichi py angthau bi ai, nanai Tameuh teng y athang khai nai, hinichi py huni ly ym teang makho;

¹⁶hunai deaungkho y kai Tameuh teng y hawi, khumi teng y py kai i pany nai ngierei sa naira y paleung tamang y naimy atyp jojo ai nai katau.

¹⁷“Naibaly saneng kra parai nai bo y ly kai i chengchi teng y atiti pei ai naichi hawi, talam ai naichi syn iy kang tym:

¹⁸naibaly kai huni atiti kapei nai thym khala y khumi mipui abawi y nai hawi, tukulu y naimy achura yhm kalen pui y chai naimy kai ai ang niu.

¹⁹Na i py Asia pri i Juda amichi mo hu y awm bo--nichi ly kai i tlang tleaung y leu awm baly hi y nang i mo y ang seu ai nai avo chy bo.

²⁰Ti y baly hinichi kypkyp ly tara chih nai keungchi i mo y kai angdo nai thym khala y kai i tamang naira ati awm mo thui u sy;

²¹hini leu sairei ny y baly mymychi theung y kai angdo iy, ‘Kadeichi angthau bi nai leu y vaini ly nangchi i mo y kai ai deng nai bo he,’ kanapi nai ly,” nanai pathang.

²²Na i py Felika ly Lam satang hawihai pany kyh nai deaungkho y, “Tavai mi lu areng keh Lusia ang tym kathiu kha y nang i satang kang padyh ai mang,” nanai nichi ai khai jo rai.

²³Naibaly mymy ai ko kyh nai, ahawichi my py mymy ai kry ai nai kam y i, typ ai nai tavaimi chungvairei lu teng y leu pei.

²⁴Naibaly kani majirei mo khala y Felika ly mymy i aju Drusila, Juda neampachy hawi jeu iy, Pawla ai palau hai i, Krista Isu ai ym nai leu tangai.

²⁵Naibaly Pawla my ly hawi sa nai leu hawi, amkym ai nai leu py, tara chih nai tym ai nai leu py ka-thui thui pi nai thym khala y ly Felika ly khri pa-rei jei i, “Vai ly leh teu rai, kaimy neng avo nai khala y kang palau ai mang,” napi.

²⁶Mymy ly Pawla my tangka pei ai nai athang khai, hunai deaungkho y ni ai avawrei palau i arum.

²⁷Na i py saneng nyhrei chi bo nabaly Porkia Festa ly Felika hawi ali bo; naibaly Felika my ly Judachi theung y amyn kahawi nga ai nai ngai i, Pawla ai ly kawmrang naimy khai jo.