Read Khumi Chin AMTAW 28 Bible Online

AMTAW 28 - Khumi Chin bible

AMTAW 28

¹Naibaly kaichi ly chymme naimy lawi nai bo y tlawn amyn ly Meliti ne, nanai pany bo.

²Naibaly cheng takhrachi my pahen ala nai pahen y alam na, kani nai nai y hawi padeng nai deaungkho y mai sa i, kaichi bawibawi ai ang kawn.

³Naibaly Pawla ly theng angeangrei acheaung iy, mai y teih i, bi nai deaungkho y pavui theu nai mymy i kiu y patiu i, atang cheng jo.

⁴Naibaly cheng takhrachi my ly mymy i kiu y pavui atang kalangkang jo nai niu i, “Hini khumi ly kasi nga nai khumi ngaw ngaw khyh, pangli i dengdairei chymme naimy lawi i py, vawitheung tha ai nai Keung my mymy ai heng ai nai pei y nai bo hi ly,” na u leungtang.

⁵Na i py ni my ly pavui ai mai y katheng pawp i, ati sai py no y.

⁶Naibaly nichi my ly bau na mo, nanai athang khai; naibaly kra parai pa-rei ajeng jo i, pipi no y leang, nanai pany baly, nichi i paleung ly mymy mang y dawn ali teang i, “Mani tameuh mo na a hi ly,” na u lawh.

⁷Naibaly huni meingtym ahawi y huni tlawn i areng keh, amyn Publia i meingtym awm; huni khumi ly kaichi ai ang kawn i ni kani thomrei kawn parai naimy anga hai.

⁸Naibaly Publia i ampo ly keaung no nai hawi jeuchi man nai jawn jo; naibaly Pawla ly mymy teng y kun i chiu sa, naibaly mymy i tlang tleaung y kiu tamam i ni ai hawi sa pi bo.

⁹Huna nai sa pajau iy huni tlawn i khumi takhra no awm nai ngiereichi ly jeu u i, nichi ai py hawi sa pi bawibawi bo;

¹⁰hunichi my ly kaichi ai khrikhri pa-rei tahm khai i palo na; naibaly kaichi chei ai bo nabaly kaichi i aly ngai nai ngierei paleaung y khai pi chup chup.

¹¹Naibaly lo thomrei nai khala y Amjo Amnau Kangphi ka-ma-ra awm nai Aleksandria avang i paleaung ly kaseih y tlawn y awm nai bo, kaichi huni paleaung mang chei bo.

¹²Naibaly kaichi Surakusa avang y tym i hu y kani thomrei awm.

¹³Hu i dengdairei chei akawi vui i, Rikion avang y tym; naibaly kanirei nai kha y tokalawi ali aho i, khawn pa-nyh y ly Puteoli avang y tym bi;

¹⁴hu y ly amjo amnauchi hawi avum i mymychi teng y kani saryhrei awm ai nai ang parawi; hunai kamta kaichi Rom avang mang y tym bo.

¹⁵Naibaly amjo amnauchi ly kaichi i satang thai bo nabaly hu i dengdairei Apia Seng hawi, Charai Thomreira lamchung ai nai ang jeu; naibaly Pawla hunichi ai niu baly Tameuh teng y kawn nai leu thui i, paleung ham naira nga bo.

¹⁶Naibaly kaichi ly Rom avang y kun baly tavaimi chungvairei lu ly theaung tla naichi ai samrang ai typ nai tavaimichi i lu teng y au; na i py Pawla ai ly mymy ai typ nai keung tavaimi leaungrei hawi mymy tlairei awm ai nai pei bo.

¹⁷Naibaly kani thomrei nai khala y Pawla ly Juda miteaung keh ngiereichi ai palau achu; naibaly achu i mymy ly nichi teng y, “Amjo amnauchi awi, khumi bawibawi hawi achi i amsi sangumchi i reitara y kai ati sai py so y i py,

¹⁸Jerusalem dengdairei Romchi i kiu y kai ai patiu hai; naibaly nichi my ly kai ai deng pajau iy, dei ai ataing nai kai i tlang tleaung y ati sai py by y nai deaungkho y ang palawi ai nai tau.

¹⁹Na i py huni ly Judachi my ei nai deaungkho y kai ly Kaisara teng y tym y ai nai awm pajau y; na i py kai i chengchi ai sai py seu ai nai ny y leang.

²⁰Hunira y mo aniu ai nai hawi arum ai nai kang palau nai teu; Israelachi i athang khai naira y kai hini sengkry kapachu nai teu,” napi.

²¹Naibaly nichi my ly ni teng y, “Nang i satang Judai pri i dengdairei cha py ngo y, amjo amnauchi ami py hi y ang jeu iy, nang i tlang tleaung y leu hawi y nai ati sai py tapheaung vai y, thui py thui vai y.

²²Na i py hini kamkawm ai ly meingtym tleirei my cheh lawh veng, nanai kaichi pany i, nang ly mana dawn mo, nanai kaichi pany ai nai ngai he,” napi.

²³Naibaly nichi ly mymy ai kani adeu i, mymy i anga nai yhm y mymy teng y khumi neangneang jeu u, naibaly mymy ly khawn mang i dengdairei dym mang y khrairei huni leu ly thui pi pachai i, Tameuh i peang nai satang pany hai; Mosi i Reita cha-iu leu hawi amochi i cha-iu leu y py Isu mang y mymychi ai parawi ryry.

²⁴Naibaly phyreichi ly mymy i leu thui nai ly ym i, phyreichi ly ym y leang.

²⁵Naibaly mymychi tengtawi adyh y i, Pawla my leu sairei thui nai bo y theu u pawn bo; “Phailo Kachai ly amo Isaia i labeaung y nangchi i amsi sangumchi teng y thui nai ly teng parai:

²⁶‘Hini chengchi teng y chei iy thui pi; Kano y ly thai ai i, dawn naira y ly pipi pany thai ai ny y; Niu mang ly niu ai i, pany naira y ly pipi pany thai ai ny y;

²⁷hini chengchi i paleung ly kyh chawn veng bo i, Nichi i kano py pang panang veng i, Mychi i mei py pasym teang; Ti y baly nichi i mei my niu lawh iy, Nichi i kano my thai lawh ai i, Nichi i paleung my pany thai lawh ai. Naibaly nichi ly ali teang lawh iy Kai ly nichi ai hawi so pi vui lawh na,’ nanai napi nai ly.

²⁸Hunaibaly Tameuh i paheng nai leu ly Cheng Takhrachi teng y taviu bo, nanai pany u, nichi ly tangai py tangai ai,” napi.

²⁹[Naibaly mymy ly hina nai leu katheu pajau iy, Judachi ly chei i mymychi tengtawi khri pa-rei aei na.]

³⁰Naibaly mymy ly saneng nyhrei mymy i yhm alai naira y awm i,

³¹mymy teng y kun nai ngierei ai kawn iy, Tameuh i peang nai satang thui pi, Areng Isu krista i leu py vam parai pa-rei my patiu i, ami py mymy ai paka y.