Read Khumi Chin AMTAW 4 Bible Online

AMTAW 4 - Khumi Chin bible

AMTAW 4

¹Naibaly nini my ly khumichi teng y leu thui nai thym khala y pathyp pi nai keungchi hawi, achura yhm kalen pui typ nai lu hawi, Saddukaichi py myni teng y tym miu i, khumichi ai leu patiu nai hawi,

²Isu deaungkho y kadeichi theung i nai angthau bi nai leu thui pi nai y py nichi ly khrikhri pa-rei paleung hawi y parai.

³Naibaly nini ai patiu i dym mang y tla nai deaungkho y khawn mang y khrairei theaung y peaung bo.

⁴Na i py leu tangai naichi theung y neangneangchi my ly ym, nichi i nawi nai sai ly neampacho ka-cheang ryry naimy sang pangrei awm.

⁵Naibaly khawn mang y ly mymychi i kry nai keungchi hawi, miteaung kehchi hawi, Reita patiu nai keungchi hawi, pathyp pi nai keung kalen keh Anna hawi,

⁶Kaiapha hawi, Johan hawi, Aleksandra hawi, pathyp pi nai keung kalen keh i cheng bawibawichi py Jerusalem y awm achu bo.

⁷Naibaly nichi ly nini ai sala y angdo hai iy, “Nangni ly ati sa thai naira hawi mo, ami i amyn y mo hini sa nai ly?” nanai deng.

⁸Hunaibaly Petera ly Phailo Kachai my kawi i mymychi teng y, “Khumichi ai kry nai keungchi hawi, miteaung kehchi awi:

⁹khumi kaphra ai hawi sa naira y, hini khumi ly mana nai hawi vui mo, nanai vaini kaini ai deng baly, nangchi bawibawi pany u, Israela khumi bawibawichi py pany u sy.

¹⁰Nazaret Isu Krista ai nangchi my kraws tleaung y tahen nai ly, Tameuh my ni ai kadeichi theung i dengdairei pathau bi nai ly, mymy i amyn kypkyp y hini khumi ly hi y nangchi i mo y hawi naimy angdo nai bo he.

¹¹Nangchi yhm sa nai keungchi i lengseaung tahm khai y nai, taki i lengseaung avo keh lawn nai ly mymy ne nai bo he.

¹²Takhra ami teng y py pahengra by y leang, kani anui y khumi amyn pathi naichi theung y achi ai paheng ai nai amyn takhra ha py by y,” napi.

¹³Naibaly Petera nini Johan i vam nai sai ly nichi my niu i, cha neangneang kawp y nai khumi hawi, neangneang pany y nai khumi ne, nanai pany kha y ly khri pa-rei lyh parai i, nini ly Isu teng y awm bo, nanai pany bo.

¹⁴Naibaly no hawi nai khumi ly myni teng y angdo nai niu i ati sai py tlau pajau y.

¹⁵Hunaibaly mymychi i tara chih naira i nai nini ai chei hai takhra ai nai leu pei nai bo y ly arum u i,

¹⁶“Hini khumi nini ai ly achi mana sa ai mo?” Nini ly atiti rengrang ka-teng ny y nai sa, nanai ly Jerusalem i awm nai bawibawichi my hawihai palai pany veng bo:achi py sai py apha thai y pui ly.

¹⁷Na i py khumichi teng y ahei hai rara y ai nai, vai dengdairei ami teng y py hini i amyn y leu thui y ai nai achi nini ai ram sina,” napi.

¹⁸Hunaibaly nini ai palau iy, Isu i amyn y den py leu thui y ai nai hawi, patiu y ai nai py leu pei.

¹⁹Na i py Petera nini Johan my ly nichi teng y, “Tameuh i mei ka-niu y Tameuh i leu patawm nai tleaung y ly nangchi i leu patawm nai teng keh lawh a? Dawn u cham.

²⁰Kaini ly kaini i atiti niu nai hawi pany naichi ly thui y naimy awm pajau y leang,” napi.

²¹Naibaly nichi my ly khrikhri pa-rei ram ra iy nini ai palawi bo; khumi mipuichi deaungkho y pajeng ai nai ka-vo ngo y, atiti sa naira y ly khumi bawibawichi my ly Tameuh ai palo veng.

²²Ati mana nai mo nabaly nini i atiti rengrang sa nai no hawihai nai khumi ly saneng vui palyhrei tleaung y nawi nai veng bo.

²³Naibaly nini ly lawi bo nabaly, nini i kamkawmchi teng y chei i, pathyp pi nai keung kelenchi hawi, miteaung kehchi my myni teng y thui nai ngierei ly thui pi bebe.

²⁴Hunaibaly tangai naichi ly vanrei my Tameuh teng y, “Aw Areng, nang ly kani khaileaung hawi, pangli hawi, nichi theung y awm nai bawibawichi ai sa nai keung ne.

²⁵Nang i Phailo Kachai i saho y nangmy kaichi i amsi sangum nang i miseaung Davida i labeaung y ly, ‘Cheng Takhrachi ly ati mana nai y kado theu kha? Cheng cheaungkhangchi my ati mana nai dawn atyhtyh lawh?

²⁶Areng Tameuh hawi mymy i Krista i tlang tleaung y Khaileaung pri i samrangchi ly aeng yb i, Arengchi py amkheng achu bo,’ nanai thui.

²⁷Hini avang y ly nang i Miseaung kachai nang i rimui paju nai Isu i tlang tleaung y ly nang i kiu hawi paleung y tym ai nai khai takhra rym nai ngierei ly sa ai nai,

²⁸Heroda hawi Pontia Pilata hawi, Cheng Takhrachi hawi Israela khumichi py amkheng achu tatang nai bo.

²⁹Hunaibaly Areng, vai nichi i kaichi ai ram nai sai ly khen cham; naibaly nang ly amichi ai no hawi sa nai nang i kiu jaha nai tarawi y, nang i miseaung ly vam parai pa-rei nangmy i leu pany hai ai nai sabawm kyh ba;

³⁰naibaly nang i miseaung kachai Isu i amyn deaungkho y ka-ma-rachi hawi, atiti lyh ai awm parai nai so hai kyh ba,” napi.

³¹Naibaly nichi chiu sa pajau iy, mymychi i awm achu naira ahyn bo; naibaly nichi bawibawi ly Phailo Kachai my kawi i vam parai pa-rei Tameuh i leu thui pi.

³²Naibaly ym nai khumi mipuichi ly paleung py dawn nai py vanrei awm, mymychi theung y leaungrei py yhmtheaung awm nai ly, Kai i teu, nanai angam y; nichi ly atiti bawibawi vanrei ahum bo.

³³Naibaly amtaw thau naichi ly sa thai naira len parai nai hawi Areng Isu Krista i angthau bi nai satang thui pi: naibaly mymychi bawibawi teng y khrikhri pa-rei pahenra awm.

³⁴Naibaly mymychi theung y py ami py avaw nai by y, meingtym py yhm py awm nai ngierei ly jo u iy, mymychi i atiti jo nai vang syn i, amtaw thau naichi i kheu keung y khai iy,

³⁵mymychi i aly ngai nai ka-leu khyp amji bawibawi.

³⁶Naibaly Josepha, amtaw thau naichi my amyn ka-reu Barnaba napi nai ly, (huni amyn ly Awm hai nem nai chanau, nanai sai ne,)

³⁷Levi cheng, Kupra tlawn i khumi ne i, mymy i hlau jo iy vang ly syn i, amtaw thau naichi i kheu keung y khai bo.