Read Khumi Chin AMTAW 6 Bible Online

AMTAW 6 - Khumi Chin bible

AMTAW 6

¹Naibaly huni neng y abangnaichi peung dudu nai khala ly, kani tleirei atiti amji naira y mymychi i neampachy lumaichi ai dawn hai y lawh nai deaungkho y Krik pri i Judachi ly Hebraichi i tlang tleaung y josei u bo.

²Naibaly holai nyhreichi ly abang nai khumi mipuichi ai palau achu i, “Kaichi ly Tameuh i leu thui nai anawn vui iy sabawi y kalop sa lawh baly avo y leang.

³Hunaibaly amjo amnauchi awi, nangchi theung y Phailo hawi cheng naira my kawi nai khumi, amyn kahawi cheichei leaung saryhreichi ai vawi u, nichi ai ly hini atiti chih ai nai keung y kaichi my khai ai;

⁴naibaly kaichi ly chiu sa nai hawi, leu patiu nai hawi patlaw y ai,” napi.

⁵Huni leu ly khumi mipui bawibawichi ai kawn hai i, nichi ly Stephana, ym naira hawi Phailo Kachai my kawi nai khumi hawi, Philipa hawi, Prokora hawi, Nikanora hawi, Timona hawi, Parmena hawi, Nikola, Judachi i suibang kammeaung Antiokei avang i khumi py, nichi ai vawi; hunichi ai ly amtaw thau naichi i mo y angdo hai iy,

⁶nichi ly chiu sa i mymychi i tlang tleaung y kiu tamam.

⁷Naibaly Tameuh i leu ly ahei ryh ahei ryh i, Jerusalem y py abangnaichi khrikhri pa-rei peung bo; pathyp pi nai keungchi i kamkawm theung y py neangneangchi ly ym naira patawm bo.

⁸Naibaly Stephana ly tamen naira hawi sa thai naira my kawi i khumichi theung y atiti rengrang hawi, atiti ka-ma-ra len parai tlai naichi py sa.

⁹Na i py Miseaung alaw naichi i achura yhm i amichi hawi mo, Kurini avang i khumichi hawi, Aleksandria avang i khumichi hawi, Kilikia pri i khumichi hawi, Asia pri i khumichi py angthau u i Stephana ai ei.

¹⁰Na i py ni i cheng naira hawi thui hai nai keung Pahilo ai ly ei pajau y.

¹¹Naibaly nichi ly khumichi ai um iy mychi my ly, “Ni ly Mosi ai hawi Tameuh ai thui tamawn nai ly kaichi thai bo,” napi.

¹²Naibaly nichi ly khumichi ai hawi, miteaung kehchi ai hawi, Reita patiu nai keungchi ai py thui thli i, Stephana ai ni iy patiu i tara chih nai keungchi teng y pahawi.

¹³Naibaly thui tapawp ai tau naichi ai angdo hai i hunichi my, “Hini khumi ly hini yhm kachai ai hawi, Reita ai anawn y pa-rei thui tamawn jojo:

¹⁴hini Nazaret Isu ly hini yhm aphrei ai i Mosi i Reita ang pei nai ly sa takhra ai, nanai thui nai kaichi thai,” napi.

¹⁵Naibaly tara chih nai keung ateh naichi bawibawi ly Stephana ai khen ryry i, mymy i meimai ly kani pri i amtaw thau nai i meimai ka-tawm niu u.