Read Khumi Chin AMTAW 7 Bible Online

AMTAW 7 - Khumi Chin bible

AMTAW 7

¹Naibaly pathyp pi nai keung kalen keh my ly, “Hini leu ly teng a?” napi.

²Naibaly Stephana my ly, “Amjo amnauchi hawi ngaaichi awi, tangai cham.

³Achi i ampo Abraham ly Haran avang y awm y rai khala y Mesopotamia pri y awm nai kha y, nang parai nai Tameuh ly ni teng y amteng i, ‘Nangmy i pri hawi cheng theung i dengdairei theu ly, kaimy pri kang patei ai nai mang y chei,’ napi.

⁴Hunaibaly mymy ly Kaldai khumichi pri i dengdairei theu i, Haran avang y awm bo; naibaly mymy i ampo dei nai bo y hu i dengdairei vai hini nangchi i awm nai pri y Tameuh my ni ai angpyn hai bo.

⁵Naibaly mymy ly hi y ly ni ai ati sai py meingtym athun ai nai kheu chiu naira ka-lawn py pei y leang; na i py mymy ly chanau so y rai khala y my mymy hawi, mymy bo i kangpreangchi i vui khrairei amtym ai nai pei ai nai adeu.

⁶“Naibaly Tameuh my hina nai kamta thui i, ‘Nangmy i kangpreangchi ly ami i pri y saneng chungvai palyhrei awm ai i, nichi ai miseaung palawn iy ana py ana ai.

⁷Naibaly nichi ai miseaung palawn ai nai chengchi ai ly kaimy chih ai, naibaly hunai bo y nichi ly theu ai i, hini meingtym y kai i kalop sa ai, nanai thui.

⁸Naibaly mymy ly ni teng y lengkhym takip ai nai leu maikawm khai. Hunaibaly Abraham ly Isaka ai sa i, kani tajarei kha y lengkhym takip: naibaly Isaka ly Jakob ai sa; naibaly Jakob ly cheng holai nyhreichi i amsi sangumchi ai sa bo.

⁹“Naibaly cheng holai nyhreichi i amsi sangumchi my Josepha ai ly keng i, Aikupta pri y jo vui; na i py Tameuh my mymy teng y awm hai i,

¹⁰mymy i patang naira bawibawi y lawi hai jojo: Aikupta pri i samrang Pharaoa ai py tamen hai i, khumi cheng parai nanai py pany hai; hunaibaly mymy ai ly Aikupta pri hawi mymy i yhm y awm nai khumi bawibawichi i tlang tleaung y krykeung y palawn bo.

¹¹“Naibaly Aikupta pri hawi Kanan pri bawibawi y ly takang theu i, khrikhri pa-rei patang naira tym bo; achi i amsi sangumchi py cha ai nai pipi ngo pajau y bo.

¹²Na i py Jakob ly Aikupta pri y choh awm, nanai pany baly achi i amsi sangumchi ai pato; huni ly pato angchei nai ne.

¹³Naibaly py-nyh pato nai khala y Josepha ly mymy i amjo amnauchi teng y mymy i satang thui pi; naibaly Pharaoa ly Josepha i cheng pany bo.

¹⁴Naibaly Josepha my ly taviu i my i ampo Jakob hawi, mymy i amjo amnau bawibawichi ai palau, nichi bawibawi ly vui saryh taja leaung pangrei awm.

¹⁵Hunaibaly Jakob ly Aikupta pri y chei bo; naibaly mymy hawi achi i amsi sangumchi ly dei i,

¹⁶Sukem avang y ajeaung khrai, naibaly Abraham ly Sukem avang i Hamora i chapo teng y tangka y van nai angawm y nichi ai up bo.

¹⁷“Naibaly Tameuh my Abraham teng y leu adeu nai tym ai nai neng kasa kha ly, Josepha ai pany y nai samrang takhra

¹⁸awm nai khala y khrairei nichi ly Aikupta pri y peung ryh peung ryh i, nawi ryh nawi ryh bo.

¹⁹Huni khumi ly achi i cheng ai ana paryp iy, achi i amsi sangumchi ai patang hai i, mymychi i chanau chymplei naichi ai heng y ai nai aphi hai veng.

²⁰Huna nai thym khala y ly Mosi ai tapen i, mymy ly khrikhri pa-rei mo hawi na, mymy ai ampo i yhm y lo thomrei pacho;

²¹naibaly ni ai aphi veng bo nabaly Pharaoa i chaniu my la iy, mymy i chapo palawn ai nai pacho bo.

²²“Naibaly Mosi ai ly Aikupta pri khumichi i cheng naira bawibawi patiu i, mymy i leu y hawi atiti sa naira y py khrikhri pa-rei ham na.

²³Naibaly mymy ly saneng vui palyhrei awm nai khala y mymy i amjo amnau, Israela kangpreangchi ai de ai nai tau.

²⁴Naibaly hunichi theung y khumi leaungrei ai patang hai nai niu i, mymy ai ama hai iy ana nai keung ai vawitheung tha nai Aikupta khumi ai pakhau bo.

²⁵Tameuh my ni i kiu y mymychi ai lawi hai nai ne, nanai amjo amnauchi my pany, nanai mymy ly dawn: na i py nichi ly pany y leang.

²⁶Naibaly khawn mang y mymychi theung i khumi leaung nyhrei ani nai thym khala y mymy ly nini teng y tym i, ‘Arengni awi, nangni ly amjo amnau chy bo; ati mana nai nangmyni tengtawi teng y parai nai sa hawi lawh mo?’ nanai aly hai ai nai tau.

²⁷Na i py ahawi i tlang tleaung y hawi y sa nai keung my ly Mosi ai nui vui iy, ‘Kaichi i tlang tleaung y nang ai krykeung hawi tara chih ai nai keung y ami my ang khai mo?

²⁸Jangdyh Aikupta khumi ai padei nai kamta kai ai py padei ai nai tau lawh a?’ napi.

²⁹Naibaly Mosi ly huni leu deaungkho y preang vui iy Midian pri y awm jo i, hu y ly chapo nyhrei sa bo.

³⁰“Naibaly saneng vui palyhrei chi nai bo y Sinai mawi i daichi ka-vym y mai angveaung nai lymlo kangpho theung y kani pri i amtaw thau nai leaungrei mymy teng y amteng bo.

³¹Naibaly Mosi my niu baly mymy i atiti niu nai ly khri pa-rei rengrang tlai ly, napi; naibaly khen ai nai ahawi y chei nai thym khala y Areng i raawi my,

³²‘Kai ly nang i amsi sangumchi i Tameuh ne, Abraham hawi, Isaka hawi, Jakob hawi nichi i Tameuh ly’ napi. Hunaibaly Mosi ly kaso theu i khen vam y bo.

³³Naibaly Areng my ly mymy teng y, ‘Nang i kheu i phainai ly aleng; nang i angdo naira ly meingtym kachai ne.

³⁴Aikupta pri y awm nai kai i khumichi i ngari patang nai sai ly kaniu bo mang, mymychi i tangam nai py kai ly thai jojo, kai ly mymychi ai palawi ai nai kang satla nai bo. Khen cham, nang ai Aikupta pri y kang pato ai,’ napi.

³⁵“Huni Mosi ai ly, Nang ai krykeung hawi tara chih ai nai keung y ami my ang khai mo? Na nai paka nai ly, lymlo kangpho y kani pri i amtaw thau nai ni teng y amteng nai my ly sabawm i, Tameuh my mymy kypkyp ai ly krykeung hawi lawi hai nai keung ne rau ai nai pato nai ne.

³⁶Mymy ly Aikupta pri y hawi, Pangli Tui Kamsen y hawi daichi ka-vym y saneng vui palyhrei sala y py atiti rengrang hawi ka-ma-rachi patei veng iy, mymychi ai theu hai iy pahawi bo.

³⁷“Huni Mosi kypkyp ly Israela kangpreangchi teng y, ‘Tameuh my nangchi i amjo amnauchi theung i nai kai kamta amo leaungrei ai ang theu hai ai,’ napi nai keung ne.

³⁸Huni Mosi ly Sinai mawi y arum hai nai kani pri i amtaw thau nai hawi, achi i amsi sangumchi hawi daichi ka-vym y achu naichi theung y awm nai ne; mymy ly ang pei pateang ai nai Tameuh i leu kangheng nga nai keung ne;

³⁹achi i amsi sangumchi ly mymy i leu tangai ai nai ngai y i, paka veng iy Aron teng y,

⁴⁰‘Kaichi ai pahawi ai nai tameuhchi so pi kyh ba; hini Mosi, kaichi ai Aikupta pri i dengdairei pahawi nai keung i satang nai khy kaichi ly pany y veng bo,’ nanai mymychi i paleung ly Aikupta pri mang y dawn ali teang bi bo.

⁴¹Naibaly hunai thym khala y ly si cho myn sa nai, huni myn y ly apathyp iy mymychi i kiu i sa naira y amo theu bo.

⁴²Hunaibaly Tameuh my hi pi vui i kani mang i ka-sichi ai chiu thai ai nai mymychi ai khen pi joja veng bo; amochi i cha-iu y, ‘Israela chengchi awi, daichi ka-vym y saneng vui palyhrei sala y tleh nai mawi hawi, apathyp naira hawi kai ai talam a?

⁴³Nangchi ly Moloka i kanih yhm hawi, tameuh Rephana i ka-si py chiu ai nai Nangchi i sa nai mynchi ai syn u lawh: Hunai deaungkho y Babulon avang palem mang y kang la veng ai,’ nanai tajiu nai kamta ly,

⁴⁴“Mymy i myn niu nai ka-tawm sa ai nai Mosi ai thui pi nai keung i khai pi rym nai kamta ly, achi i amsisangumchi my daichi ka-vym y pany hai nai kanih yhm ly nga u bo;

⁴⁵huni teang achi i amsi sangum kangpreang bi naichi ly Cheng Takhrachi i pri nga ai nai athun nai thym khala y ly, Josua hawi vanrei kun hai; nichi ai ly Tameuh my achi i amsi sangumchi i mo y Davida awm khala y khrairei patheu jojo.

⁴⁶Daivida my ly Tameuh i mei ka-niu y kawn naira nga i, Jakob i Tameuh i vui y awm naira sa pi ai nai hnei

⁴⁷Na i py Solomon ly mymy i vui yhm sa pi lawh;

⁴⁸ati py ne sy Salo Kangteng my ly kiu y sa nai yhm y awm vai y; amo my ly hinai kamta thui i,

⁴⁹‘Areng my ly, Kani ly kai i atehra ne, Khaileaung ly kai i kheu amchymra ne, Kai i vui yhm mani ka-tawm sa pi ai mo? Kai i anawn naira meingtym py ati mo?

⁵⁰Hini ati cheaungkhang ly kai i kiu y sa nai ny y a? napi,’ nanai ne.

⁵¹“Nangchi paleung katang hawi, paleung hawi kano takip y naichi awi, nangchi ly mana khala py Phailo Kachai ai paka jojo; nangchi i amsi sangumchi i sa nai kamta nangchi py sa u jojo.

⁵²Nangchi i amsi sangumchi my amochi theung y ano y nai ly ami awm mo? Khumi Kahawi jeu ai nai satang thui pi rym nai keungchi ai py nichi padei; ni ai ly patiu hai nai keungchi hawi, padei nai keungchi py vai nangmychi lawn u bo;

⁵³kani pri i amtaw thau naichi my pei pateang nai Reita nga veng iy patawm y pasi lawh naichi awi,” napi.

⁵⁴Naibaly nichi ly huni leu thai iy paleung yh-i na i, mymy i tlang tleaung y ho akachai.

⁵⁵Na i py mymy ly Phailo Kachai my kawi i kani mang y khen jo iy, Tameuh i nang parai nai sai hawi, Tameuh i lamtang mang y Isu angdo nai py niu;

⁵⁶naibaly “Khen cham, kai ly kani am-eaung nai niu i, Tameuh i lamtang mang y Khumi i Chapo angdo nai py kaniu,” napi.

⁵⁷Na i py nichi ly athorei my aeu i mychi i kano atamym iy vanrei my ni teng y angpreng achu mang i, avang i dengdairei patheu iy lengseaung y aphi priu:

⁵⁸pany hai nai keungchi ly thawndeang leaungrei, amyn Sawla i kheu keung y mychi i kanih khai chupchup.

⁵⁹Hunaibaly Stephana ly, “Areng Isu awi, kai i phailo lo ba,” nanai palau nai thym khala y ly nichi ly lengseaung y aphi tliu siu na.

⁶⁰Naibaly mymy ly kheukhu di iy athorei my aeu i, “Areng hini nichi i kamngo sa nai ly nichi i tlang tleaung y aniu hai moh kyh ba,” napi. Naibaly huni leu thui pajau baly i veng bo. Sawla my py dei ai nai avo, napi.