Read Khumi Chin AMTAW 9 Bible Online

AMTAW 9 - Khumi Chin bible

AMTAW 9

¹Na i py Sawla my ly Areng teng y abangnaihchi ai ram nai leu hawi mymychi ai padei ai tau nai leu thui nai tarawi y, pathyp pi nai keung kalen keh teng y chei i.

²huni Lam y awm nai niu nai ngierei ai ly, neampacho ai py neampachy ai py kawm iy, Jerusalem y pahawi thai ai nai, Damaska avang i achura yhm bawibawi y pei ai nai cha hnei.

³Naibaly chei nai thym khala y Damaska ahawi y tym ai nai kha y, tlenrei khyh my kangvang ly kani mang i dengdairei mymy i ahawi y angvang hai phang na;

⁴naibaly mymy ly khaileaung y atlym i mymy teng y, “Sawla, Sawla, ati mana nai nang ly kai ai ana ryry lawh?” napi nai raawi thai.

⁵Naibaly ni my ly, “Areng, nang ly ami mo?” napi. Ni my ly, “Kai ly Isu, nang i ana nai ne;

⁶na i py angthau ly avang y kun, hunaibaly nang i sa ai nai sai ang thui pi ai mang,” napi.

⁷Naibaly mymy teng y chei teang naichi ly amcheng pawp naimy angdo jo i, tyn mang ly thai, na i py ami ai py niu y.

⁸Naibaly Sawla ly khaileaung i nai angthau; naibaly mei pali i ati sai py niu thai y bo; hunaibaly nichi ly kiu y pahawi naimy ni ai Damaska avang y tym hai bo.

⁹Naibaly mymy ly sai py niu y naimy kani thomrei awm i, ati sai py cho py cho y, nei py nei y.

¹⁰Naibaly Damaska avang y ly abangnai leaungrei awm, amyn ly Anania napi nai ne. Naibaly Areng my amang kamta mymy teng y amteng i, “Anania,” napi.

¹¹Naibaly mymy ly, “Khen cham Areng, kai hi y awm he,’ napi. Naibaly Areng my ly, mymy teng y, “Angthau ly, Lam Kataw napi naira y tako ly, Juda i yhm y Tarsa i khumi, amyn Sawla napi nai ai deng;

¹²khen cham, mymy ly chiu sa dudu, naibaly amyn Anania napi nai khumi leaungrei kun i, mymy i mei angvang hai ai nai mymy i tlang tleaung y kiu tamam nai amang kamta niu bo,” napi.

¹³Naibaly Anania my ly, “Areng, huni khumi ly Jerusalem i nang i khumi kachaichi i tlang tleaung y ana nai nawi nai sai ly khumi neangneangchi i labeaung y kathai bo;

¹⁴naibaly hi y py nang i amyn palau nai ngiereichi ai ly kawm ai nai, pathyp pi nai keung kalenchi teng i dengdairei cha nga na a,” nanai pathang.

¹⁵Na i py Areng my ly mymy teng y, “Chei, chei; Cheng Takhrachi hawi, samrangchi hawi, Israela kangpreangchi teng y kai i amyn apu ai nai vawi nai na a;

¹⁶kai i amyn deaungkho y mymy ly mana tanrei patang ai mo, nanai kaimy ni ai pany hai ai,” napi.

¹⁷Naibaly Anania ly chei i yhm y kun, naibaly mymy i tlang tleaung y kiu tamam iy, “Be Sawla, nang i mei angvang ai nai hawi, nang ly Phailo Kachai kawi naimy awm thai ai nai py Areng, nang i tako nai lam y nang teng y amteng nai Isu my kai ai ang pato nai he,” napi.

¹⁸Naibaly tlenrei khyh my mymy i mei i dengdairei ali ka-tawm tla praw i, mymy i mei ly angvang teang bo; naibaly mymy ly angthau iy baptisma nga bo.

¹⁹Naibaly biu cha i amcheng ali teang bo.

²⁰Naibaly mymy ly Damaska avang i awm nai abangnaichi teng y ly kani majirei mo awm, naibaly achura yhm y Isu ly Tameuh i Chapo ne, nanai thui pi praw.

²¹Naibaly mymy i leu thai nai ngiereichi my ly rengrang tlai ly napi i, “Hini khumi ly Jerusalem avang i hini amyn y ym naichi ai ana reng nai ny y lawh a? Hini khumi ly nichi ai kawm iy pathyp pi nai keung kalenchi teng y hawi ai nai hi y ang jeu khyp nai na a,” napi.

²²Na i py Sawla my ly ham ra nai, huni ly Krista ne khypkhyp, nanai thui pi pachai ra veng i, Damaska avang y awm nai Judachi ai ly tlau thai y pa-rei my pathang.

²³Naibaly kani kra parai nai bo y ly Judachi my Sawla ai padei ai tau nai arum u; na i py mymy ly nichi my bawm ai tau nai ly pany bo.

²⁴Naibaly nichi ly ni ai padei ai tau nai apai pa-kho tleirei y vum kanithun amo jojo.

²⁵Na i py abangnaichi my ni ai vum y pahawi iy apai thaibeng pa-kho mang y saipa mang pala kathiu bo.

²⁶Naibaly Sawla ly Jerusalem y tym baly abangnaichi hawi amkawm ai nai tau; mymy ai ly nichi bawibawi jei, mymy py abangnai ne teang bo, nanai ym y.

²⁷Na i py Barnaba my ly ni ai hawi i, amtaw thau naichi teng y chei hai iy, ni ly lam y Areng ai niu nai hawi arum nai sai py, Damaska avang y Isu i amyn y vam parai pa-rei leu thui pi nai sai py mymychi teng y thui pi bo.

²⁸Hunaibaly Sawla ly Jerusalem y nichi teng y kun py kun, theu py theu i, Areng i amyn y vam parai pa-rei my leu thui pi.

²⁹Naibaly mymy ly Krik pri i Judachi teng y leu thui i aei; na i py nichi my ly mymy ai padei ai nai tau.

³⁰Naibaly amjo amnauchi my ly huna nai pany i mymy ai Kaisari avang y hawi u kathiu iy, Tarsa avang y pato vui.

³¹Hunaibaly Judai pri y hawi, Kalili pri y hawi, Samari pri tengtang y py palau takhra kamkawm ly khaw ryh khaw ryh i awmnem bo; naibaly Areng ai tahm khai naimy Phailo Kachai i awmnem naira y awm iy peung ryh peung ryh bo.

³²Naibaly hina nai awm, Petera my meingtym tleirei y amki nai tarawi y Ludda avang y awm nai khumi kachaichi teng y py chei.

³³Hu y ly khumi leaungrei amyn Ainia napi nai ai amkhyn nai deaungkho y saneng tajarei ira y aseaung jojo nai niu.

³⁴Naibaly Petera my ly mymy teng y, “Ainia, Isu Krista my ang hawihai nai bo, angthau ly, nang i nihbai taeang,” napi. Hunaibaly mymy ly angthau praw ryp.

³⁵Naibaly Ludda hawi Saron adym y awm naichi bawibawi ly mymy ai niu i, Areng mang y mo hi u bo.

³⁶Naibaly Joppa avang y amyn ly Tabitha napi nai abangnai leaungrei awm; (Tabitha nanai sai ly Dorka ne;) huni neampachy i atiti kahawi sa nai hawi, atiti sabawm nai py neangneang awm.

³⁷Naibaly hunai thym khala y ly ni ly no i dei bo; naibaly nichi ly mymy ai tui pahiu pan iy, salo i sambeu y paseaung bo.

³⁸Naibaly Ludda ly Joppa kasa nai deaungkho y abangnaichi ly Petera hu y awm, nanai pany i, “Kra y naimy kaichi teng y jeu ba,” nanai takeng ai nai mymy teng y khumi leaung nyhrei pato.

³⁹Naibaly Petera ly angthau i myni teng y chei teang bo. Naibaly tym bo nabaly ni ai salo i sambeu y chei hai; naibaly neampachy lumai bawibawichi ly mymy i ahawi y angdo iy Dorka mymychi teng y awm nai khala y baichu sa naichi, kanih sa naichi patei nai tarawi y vo u lengleang.

⁴⁰Na i py Petera my ly nichi ai patheu bebe i, kheukhu di iy chiu sa; naibaly veu mang y mo tha iy, “Tabitha, angthau,” napi. Hunaibaly mymy ly mei pali i Petera ai niu baly angthau i ateh.

⁴¹Naibaly Petera my kiu thawi pi i ni ai pathau bo; hunaibaly khumi kachaichi hawi, neampachy lumaichi ai palau iy heng teang nai patei bo.

⁴²Naibaly Joppa avang bawibawichi ly pany be i, khumi neangneang Areng ai ym bo.

⁴³Naibaly Petera ly kani neangneang Joppa avang y Simon, mawipeih sa nai keung i yhm y awm jo.