Read Khumi Chin ROM 11 Bible Online

ROM 11 - Khumi Chin bible

ROM 11

¹Tumbaly Tameuh ly mymy i khumichi ai ly aphi vui a? Ny y leang. Kai py Israelacho, Abraham i kangpreang Benjamin cheng ne.

²Tameuh ly mymy i pany yb nai khumichi ai ly aphi y leang. Nangchi ly Tameuh i cha-iu y Elija i molam thui nai ly pany u y nai sai a?

³Mymy ly Israelachi ai Tameuh teng y seu i, “Areng awi, nichi ly nang i amochi ai py padei bo; nang i maichamchi py panawi pawn bo; naibaly kaimy leaungrei awm khyh iy, kai ai py ang padei ai nai tau u bo,” napi.

⁴Na i py Tameuh ly mymy teng y mana pathang mo? Mymy ly, “Baala i mo y meung vai y nai khumi sang saryhreichi ai kaimy i vui kakhai nai awm rai,” nanai pathang.

⁵Hunai kamta khyp teang, vai dymkhawn py pahenra deaungkho y vawi nai phyreichi awm rai.

⁶Hunaibaly pahenra deaungkho y ne baly, atiti sa naira deaungkho y ny y leang; huna nai ny y baly pahenra ly pahenra lawn y leang bo.

⁷Tumbaly mana ai mo? Israelachi ly mymychi i hau nai ly niu y, vawi naichi naini niu, takhra bawibawichi ly kyh chawn u veng bo.

⁸“Tameuh my ly vaini khrairei mymychi teng y i kamhm ngam nai paleung pei iy, Niu pajau y nai mei hawi thai pajau y nai kano py pei,” nanai tajiu nai kamta.

⁹Naibaly Davida my ly, “Mymychi i pawi ly kathang hawi deaung hawi lawn sy, Atlym naira hawi vawitheung tha naira py lawn sy;

¹⁰Niu u pajau y ai nai mymychi i mei ly veng sy, Nang ly nichi i nithun anam meung hai jojo kyh,” napi.

¹¹Tumbaly nichi ly atlym thai ai nai tliu charum charei nai a? Ny y leang:nichi ly tamang nai deaungkho y Cheng Takhrachi teng y paheng naira tym bo; huni ly Israelachi ai takho hai ai nai tym nai ne.

¹²Hunaibaly nichi i tamang nai malawn py khaileaung pri ai nang hai naira ne i, nichi i eaung y naira malawn py Cheng Takhrachi ai nang hai nai ne teang baly, nichi i angym nai ly mana tanrei ne na mo!

¹³Hunaibaly nangchi Cheng Takhrachi teng y kang thui pi nai ne. Kai ly Cheng Takhrachi i amtaw thau nai ne nai deaungkho y,

¹⁴kai i chengchi ai katakho hai pajau tanga ai nai hawi, nichi theung y phyreichi ai kapaheng pajau ai nai py kai i kry nai sai tahm kapasang nai ne.

¹⁵Mymychi ai aphi vui nai malawn py khaileaung pri ai aly hai teang naira ne baly, mymychi ai kawn bi naira ly deira i nai heng bi naira ny y baly ati awm ai mo?

¹⁶Katlen man nai tako kangheang phyrei ly chai nabaly, akawi bom verei ly hunai kamta ne teang; tangjyn py chai nabaly changpichi ly hunai kamta ne teang.

¹⁷Na i py changpi phyreichi ai ly tleu hai iy, nang, olive karam ne i nichi theung y patawm iy, olive keung i tangjyn tuihau ahum teang chum nai ne baly, changpi takhrachi teng y ly amlyh reng moh;

¹⁸nang ly amlyh teu iy py nang ly tangjyn ai kry nai keung ny y i, tangjyn ly nang ai ang kry nai keung ne lawh veng.

¹⁹Naibaly nang ly, “Kai ai patawm thai ai nai changpichi ai ly ang tleu hai bo chy bo,” na lawh ngaw khyh chy.

²⁰Ne khyp; nichi ly ym naira by y nai deaungkho y nichi ai tleu hai veng, nang naini ym naira awm nai deaungkho y angdo nai ne. Am-e moh ly, jei phai jei.

²¹Tameuh ly changpi tatangchi ai khai y baly nang ai py ang khai lawh y leang.

²²Hunaibaly Tameuh i neaung hawi nai sai hawi ryh patyh pa-rei ang parip nai sai ly dawn cham; atlym naichi i vui ly ryh patyh pa-rei ang parip nai ne; naibaly nang ly mymy i neaung hawi naira y awm jojo baly, Tameuh i neaung hawi nai sai naini nang i vui ne; ti y baly nang ai py ang do vui teang ai.

²³Naibaly nichi py ym y naira y awm jo y baly ang patawm teang ai: Tameuh ly nichi ai patawm bi pajau veng.

²⁴Nang ai ly amy i reita kamta awm nai oliv karam dengdairei ang do peu vui nai malawn py, reita kamta ny y naimy oliv keung kahawi y patawm naira awm baly, huni changpi tatangchi ai ly mymychi i oliv keung kypkyp y patwm nai mana tanrei ne ai mo?

²⁵Amjo amnauchi awi, Cheng Takhrachi ai angym hai y rai khala y Israela khumi phyreichi i tlang tleaung y ly kyh chawn veng naira tym bo, nanai hini leu kathiu ly nangchi pany y ai nai kangai y leang, ti y baly nangchi ly tahm apasang u lawh na.

²⁶Hunaibaly Israelachi bawibawi ly hengra nga ai: “Paheng Keung ly Zion i dengdairei theu iy, Jakob teng i dengdairei Tameuh ai dawn y naira ang tama hai ai.

²⁷Nichi i kamngo kala pi veng nai khala y ly Huni ly nichi teng y kai i leu maikawm ne,’ nanai tajiu nai kamta.

²⁸Satang Kahawi mang y dawn baly nichi ly nangmychi deaungkho y paleung ka-e ne; vawi nai molam y dawn nai naini nichi ly pajochi deaungkho y ngai parai naichi ne.

²⁹Tameuh i jawm my pei nai sa thai naira hawi, palau nai molam y py paleung adawn ali ai nai by y leang.

³⁰Nangchi ly jangni y ly Tameuh i leu tangai u y, na i py vai ly nichi i leu tangai y nai deaungkho y nangchi ly pahen naira nga u chy bo;

³¹hunai kamta teang vai ly Tameuh my nangchi ai ang pahen nai deaungkho y nichi py pahen naira nga u thai ai nai nichi py leu tangai u y leang bo he.

³²Tameuh my pahen bebe thai ai nai khumi bawibawichi ai ly leu tangai y naira y ang paeung bebe veng.

³³Aw! Tameuh i cheng naira hawi pany naira ly khri thiu na ly! Mymy i chih nairachi ly pipi pany pajau y, mymy i sa nai sai ly patawm pajau ai nai aveng!

³⁴Areng i paleung ly ami pany mo? Mymy ai ka-vo dawn hai ai nai py ami mo?

³⁵Mymy teng y heung teang ai nai py atiti ami pei man mo?

³⁶Mymy teng i dengdairei hawi, mymy deaungkho y hawi, mymy i vui py atiti bawibawi awm nai ne. Mymy teng y ly deungtasa khrairei palo naira awm jojo sy. Amen.