Read Khumi Chin ROM 13 Bible Online

ROM 13 - Khumi Chin bible

ROM 13

¹Khumi leaung leaungrei mymychi ai peang nai keung i ngaingai awm sy; Tameuh my ka-vo sa nai ny y baly ami py peang nai keung y awm vai y leang; peang nai keung y awm naichi ly Tameuh i khai rym nai ne.

²Hunai deaungkho y ami py peang nai keung ai ei nai ly Tameuh i sa rym naira y paka nai ne; paka nai keungchi ly mymychi i tlang tleaung y tara chih naira avum ai.

³Atiti kahawi i vui ly peang nai keungchi ai jei ai nai by y; atiti hawi y nai i vui naini ka-jei awm nai teu. Nang ly peang nai keung ai jei y nai awm ai nai ngai a? Tumbaly atiti kahawi so, naibaly mymy ly ang palo ai:

⁴ni ly nang i hawi ai nai vui ly Tameuh i kalop sa nai keung ne. Na i py nang ly atiti hawi y nai sa baly jei phai jei; mymy i haisau syn nai ly jawm my syn atyhtyh nai ny y leang; mymy ly Tameuh i kalop sa nai keung ne i, atiti hawi y sa naichi i tlang tleaung y vawitheung tha ai nai keung ne.

⁵Hunai deaungkho y kado theu naira y jei nai khyh ny y naimy, nang i paleung y hawi nai hawi y nai pany naira deaungkho y mymy i ngaingai awm ai tla nai ne.

⁶Hunai deaungkho y nangchi ly akeu py pei u chy bo; huni atiti sa jojo ai nai nichi ly Tameuh i kalop sa nai keungchi ne.

⁷Khumi bawibawi teng y pei ai nai avo nai ngierei ly pei u; kahm pei ai nai avo naira y ly kahm pei u ly; akeu pei ai nai avo naira y ly akeu pei u ly: tahm khai ai nai avo naira y ly tahm khai u; palo ai nai avo naira y ly palo u.

⁸Mangmang atamen u leungtang nai harei ny y baly ami py ati sai py kalai awm moh sy; amy i saleaungchi ai tamen nai keung ly Reita patawm angym nai bo.

⁹Hini leu sai ly, “Pajang so moh, Khumi ai padei moh, Paviu moh, Paleung no moh,” na naichi hawi, leu pei nai takhra py awm sy, “Nangmy ai atamen nai kamta nang i saleaungchi ai tamen ai nai tla,” napi nai ly akup be veng bo.

¹⁰Tamen naira ly saleaungchi ai taphra vai y; hunai deaungkho y tamen naira ly Reita patawm angym nai ne.

¹¹Vai dymkhawn i atiti awm nai sai pany u iy, i ngym nai ly anglaw ai nai neng tatang ne, nanai deaungkho y huna nai kamta so u; vai dymkhawn ly achi ym angchei nai khala i tleaung y ly achi i heng naira ly kasa kyh veng bo.

¹²Vum ly tama vi tama vi veng bo i, khutawi ai bo; hunai deaungkho y kaveng i atiti sa naichi ly aphi vui iy, kangvang i tavai ateaung amthyp u sina.

¹³Kanithun y awm nai kamta hawihai palai awm u sina; mhm nei khrukhra nai hawi, mhm pavui y naimy, paleaung nai hawi angai nai py awm y naimy, ajo nai hawi paleung ano nai py awm u moh sina.

¹⁴Areng Isu Krista ai phai amthyp u ly, nangchi i tlang i ngai phi teng y naira amcheang ai nai ati sai py so u moh.