Read Khumi Chin ROM 15 Bible Online

ROM 15 - Khumi Chin bible

ROM 15

¹Hunaibaly achi ham naichi ly amy i kawn naira hau y naimy, ham y naichi i ham y naira y ly achi my kham pi ai nai tla.

²Amy i saleaungchi ai khaw hai ai nai nichi i hawi naira hau iy, nichi ai kawn hai ai nai tau u bawibawi sina;

³Krista py amy i kawn ai naira hau y leang: “Nangmy ai jo nai keungchi ai jo nai ly Kaimy i tlang tleaung y tla bo,” nanai tajiu nai kamta ne lawh veng.

⁴Achi ly Tameuh i cha-iu deaungkho y kham pajau naira hawi awmnem naira nga iy, athang khai naira nga thai ai nai, jangni i tajiu nai ngierei ly achi ai ang patiu ai nai tajiu nai ne.

⁵Hunaibaly nangchi ly achi i Areng Isu Krista i Tameuh hawi Ampo ai ly paleung vanrei hawi leu adyh naimy palo thai ai nai,

⁶kham hai pajau nai hawi awm hai nem nai Tameuh ly Krista Isu i thui nai kamta ly paleung vanrei awm u leungtang ai nai nangchi teng y pei sy.

⁷Hunai deaungkho y Krista ly Tameuh ai palo ai nai nangchi ai ang kawn nai kamta ly akawn u leungtang.

⁸Hini ly kang thui pi ai nai ngai, Amsi pajochi teng y adeu nai leu ly khaw hai ai nai hawi, ni i pahen naira deaungkho y Cheng Takhrachi ly Tameuh ai palo u thai ai nai py,

⁹Tameuh i leu ly teng, nanai pany hai ai nai Krista ai ly lengkhym takip naichi ai kry nai keung y palawn bo. “Hunai deaungkho y Cheng Takhrachi theung y ly kang palo ai i, Nang i amyn palo ai nai khulym kathui ai,” nanai tajiu nai kamta.

¹⁰Naibaly, “Nangchi Cheng Takhrachi awi, Mymy i khumichi hawi kawn u,” napi bi.

¹¹Naibaly Nangchi Cheng Takhra bawibawichi awi, Areng ai ly palo u, Khumi bawibawichi py mymy ai palo u sy,” napi bi.

¹²Naibaly Isaia my ly, Jesai i tangjyn theu nai, Cheng Takhrachi ai peang ai nai jeu nai keung ly theu ai: mymy ai ly Cheng Takhrachi my athang khai ai,” napi bi.

¹³Naibaly nangchi ly Phailo Kachai i atiti sa thai naira i saho y athang khai naira nga ra nga ra thai ai nai, athang khai hai nai Tameuh my ly nangchi ym nai deaungkho y nangchi ai kawn naira hawi awmnem naira cheaungkhang kawi hai sy.

¹⁴Naibaly amjo amnauchi awi, nangchi i molam ly nangmychi kypkyp my hawi naira kawi iy, pany naira cheaungkhang awm i, nangmychi my apachei leungtang pajau, nanai kaimy kypkyp py kapany bo.

¹⁵Na i py Cheng Takhrachi theung y Krista i kalop sa nai keung y kaawm thai ai nai,

¹⁶Tameuh my ang pei nai pahenra deaungkho y nangchi ai kang dawn vau hai ai nai, mani sala y mo vam kyh naimy katajiu nai ne. Cheng Takhrachi ai talam nai ly Phailo Kachai my chai hai iy kawn ai ataing nai lawh thai ai nai, kai ly Tameuh i Satang Kahawi y kakry nai ne.

¹⁷Hunaibaly kai ly Tameuh i molam y Krista Isu y ly amlyh ai naira awm.

¹⁸Krista ly Cheng Takhrachi ai leu tangai hai ai nai, leu thui naira y hawi atiti sa naira y py,

¹⁹ka-ma-rachi hawi rengrangchi atiti sa thai naira y py, Phailo Kachai i atiti sa thai naira y py, kai ai angteaung nai atiti sa naichi ny y baly kai ly ati sai py kathui vam y leang. Hunaibaly Jerusalem avang hawi huni tengtang i dengdairei Hurikon pri y khairei Krista i Satang Kahawi ly meingtym tleirei y kathuipi angym bo.

²⁰Ne, kai ly khumi takhra i lengseaung leng nai tleaung y kapadyh nai ny y ai nai, Satang Kahawi ly Krista i amyn palau chum nai meingtym y thui y naimy,

²¹“Mymy i satang pany vai y naichi my ly niu u ai i, Thai vai y naichi ly pany u ai,” nanai tajiu nai kamta kathuipi ai tau nai ne.

²²Hunai deaungkho y py kai i nangchi teng y kang jeu ai nai ang paka jojo nai ne.

²³Vai naini kai ly hini pri tengtang y sa ai nai meingtym pipi by y i, saneng neangneang nangchi teng y kang jeu ai ngai nai awm iy,

²⁴Spain pri y kachei nai kha y kai ly tako nai tarawi y nangchi ai kang niu ai nai athang kakhai; naibaly nangchi hawi amkawm rawm nai y kawn iy, hu mang kai i chei ai naira y ly nangchi my kai ai pavum ai nai py athang kakhai.

²⁵Na i py vai ly khumi kachaichi ai sabawm ai nai Jerusalem avang y kachei ai rai.

²⁶Ati mana nai mo nabaly Makedonia hawi Akaia pri i khumichi ly paleung hawi parai naimy Jerusalem avang i khumi kachaichi theung y kamawnchi i vui y acheaung pi veng bo.

²⁷Ne, nichi ly paleung hawi parai naimy sa u nai bo, nichi ly hunichi ai kalai pe ai nai awm. Cheng Takhrachi ly nichi i phailo mang i atitichi ahum u makho baly, khaileaung pri mang i atitichi my nichi ai sabawm teang ai nai aeang nai ne.

²⁸Hunai deaungkho y kai ly huni kasa iy, huni athai py mymychi i vui kapajaw hai typ iy, nangmychi ai de nai Spain pri y kachei veangveang ai.

²⁹Naibaly nangchi teng y kang jeu nai khala y ly, Krista i amtheaung naira kangym nga nai kang jeu ai, nanai kapany.

³⁰Amjo amnauchi awi, kai ly Judai pri i ym y naichi teng y kachym me thai ai nai hawi, Jerusalem avang i vui sabawm naira kasyn nai ly khumi kachaichi i kawn parai naira ne thai ai nai hawi,

³¹Tameuh my avo hai nai kamta amo theu parai naimy kang jeu iy achi amcheng ahawi thai ai nai py,

³²achi i Areng Isu hawi Phailo i tamen naira deaungkho y nangchi i Tameuh teng y kaimy i vui chiu sa pi naira y ly sabawm tanga ai nai kang takeng.

³³Naibaly aly nai Tameuh ly nangchi bawibawi teng y awm sy. Amen.