Read Khumi Chin ROM 4 Bible Online

ROM 4 - Khumi Chin bible

ROM 4

¹Tumbaly achi ly tlang mang y achi i amsi sangum Abraham i nga nai ly mana napi ai mo?

²Abraham ly atiti sa nai deaungkho y eaung naira nga nai baly, mymy ly amlyh ai naira awm: ne mang ly Tameuh mang y ly by y leang.

³Naibaly Tameuh i cha-iu leu sai mana awm mo? “Abraham ly Tameuh ai ym, naibaly huni ly mymy i vui hawi naira y palawn nai ne,” nanai tajiu nai ne.

⁴Naibaly kalop sa nai keung i vang ly pahenra y palawn nai ny y i, kalai y palawn nai teu.

⁵Na i py atiti so y iy, Tameuh ai tahm khai y naichi ai eaung hai nai keung ai ym lawh nai khumi i vui ly, mymy i ym naira ai ly hawi naira y palawn nai ne.

⁶Hunai kamta Davida my teang, “Atiti sa nai ny y naimy Tameuh my hawi naira y palawn nai khumi ly taham hawi,” napi.

⁷Naibaly mymy ly, “Mymychi i taphra nairachi pahen chum nai hawi, Mymychi i kamngochi khiu hai nai awm naichi ly taham hawi.

⁸Areng my kamngo palawn y nai khumi ly taham hawi,” napi.

⁹Hunaibaly hini taham hawi naira ly lengkhym takip naichi i tlang tleaung y harei tym khyh a? Lengkhym takip y naichi i tlang tleaung y py tym teang a? Ati mana nai mo nabaly achi ly, Abraham i vui y ym naira ly hawi naira palawn nai ne, napi.

¹⁰Huni ly mana palawn nai mo? Lengkhym takip nai bo y a? Lengkhym takip y rai kha y a? Lengkhym takip nai bo y ny y leang, lengkhym takip y rai kha y teu.

¹¹Hunaibaly mymy ly lengkhym takip y nai awm nai thym khala y ym naira deaungkho y hawi naira awm, nanai pajawp typ nai ka-ma-ra lawn ai nai, mymy ly lengkhym takip nai ka-ma-ra nga; huni sa nai ly ati mana nai mo nabaly, lengkhym takip y nai, ym nai deaungkho y mymychi i vui y hawi naira palawn naichi i ampo lawn thai ai nai sa nai ne.

¹²Naibaly lengkhym takip nai harei khyh ny y naimy, achi i amsi pajo Abraham ly lengkhym takip y rai kha i ym nai kamta tako teang nai lengkhym takip naichi i ampo lawn thai ai nai py sa nai ne.

¹³Reita deaungkho y Abraham hawi mymy i kangpreangchi teng y ly khaileaung pri amtym ai nai keung ne ai, nanai leu ly adeu nai ny y leang, ym naira deaungkho y nga nai hawi naira i saho y teu.

¹⁴Reita i khumichi ly amtym nai keung ne baly, ym naira ly ati sai py ny y leang, leu adeu nai py ati sai py ny y leang bo;

¹⁵Reita ly kado theu naira sa lawh, Reita by y naira y naini taphra naira py by y.

¹⁶Hunaibaly kangpreangchi bawibawi ly leu adeu nai ly nga u tanga ai nai, huni adeu nai ly pahenra y ne thai ai nai ym naira deaungkho y ne chy bo; Reita y awm nai kangpreang my tlairei khyh ny y, Abraham i ym naira kamta ym naira nga nai kangpreang py nga teang ai.

¹⁷Abraham ly kadeichi ai paheng nai keung hawi, atiti awm y naichi ai ly awm nai kamta palawn nai keung, mymy i ym nai Tameuh i mei ka-niu y ly achi bawibawi i ampo ne. (Cheng neangneangchi i ampo y kang palawn bo, nanai tajiu nai kamta.)

¹⁸Mymy ly cheng neangneangchi i vui ampo ne thai ai nai, athang khai naira awm, nanai athang by y i py mymy ly athang khai parai nai pa-rei ym veng; “Hu jirei nang i kangpreangchi ly awm ai,” nanai thui pi rym nai kamta.

¹⁹Naibaly mymy ly ym naira khaw y lawh nai ny y naimy, mymy i tlang ly dei chum nai kamta awm nai ly adawn (mymy ly saneng chungvairei khumi mo ne,)

²⁰Sarai i teng nai py dawn teang: na i py ym naira avaw iy Tameuh i leu adeu nai ly ym thai y nai by y i,

²¹Tameuh ai palo, mymy ly mymy i leu adeu nai ly sa hai pajau, nanai khri pa-rei ym iy, ym naira deaungkho y khaw ra khaw ra lawh.

²²Hunai deaungkho y huni ly mymy i vui y hawi naira y palawn bo.

²³Hunaibaly mymy i vui y palawn nai ne, nanai ly mymy deaungkho y harei tajiu nai khyh ny y leang, achi deaungkho y py ne;

²⁴achi, Isu achi i Areng ai kadeichi theung i dengdairei pathau nai keung ai ym naichi i vui y palawn ai;

²⁵huni Isu ai ly achi i kamngo nai deaungkho y patiu hai i, achi ai eaung naira nga hai ai nai pathau bo.