Read Khumi Chin ROM 5 Bible Online

ROM 5 - Khumi Chin bible

ROM 5

¹Hunaibaly ym naira deaungkho y eaung naira nga iy achi ly achi i Areng Isu Krista i saho y Tameuh hawi aly naira nga bo;

²mymy i saho y teang, achi i hini pahenra kakhaw angdo naira y ly ym naira deaungkho y kun bo; naibaly Tameuh i nang parai naira ai phy nga ai nai athang khai iy kawn u sina.

³Naibaly huni khyh ny y naimy, achi i patang naira y py kawn u sina, patang naira my ly kham pajau naira sa;

⁴kham pajau naira my ly awm nai sai kakhaw sa, awm nai sai kakhaw my ly athang khai naira sa, nanai achi pany;

⁵naibaly Phailo Kachai achi teng y ang pei nai Tameuh i tamen naira ly achi i paleung y ang lei chum nai deaungkho y athang khai naira my ly amthang hai leaung y leang.

⁶Achi ly ham y nai thym khala y ly neng khyp nai khala y Krista ly khumi kamngochi i vui y dei pi bo.

⁷Ne, ami my khumi kahawi i vui y dei ai ngai ai nai athang neangneang by y; khumi meitang i vui y naini khumi ami mo ly dei ai vam ngau na.

⁸Na i py achi khumi kamngo nai thym khala y Krista ly achi i vui y dei pi nai deaungkho y, Tameuh ly mymy i achi ai ang tamen nai ly palo ai ataing nai amteng hai.

⁹Hunaibaly achi ly mymy i thi y eaung naira nga nai bo y ly, mymy i saho y achi ly Tameuh i kado theu naira i nai hengra nga takengkei ai.

¹⁰Achi ly paleung ka-e ne nai thym khala y malawn py mymy i Chapo dei nai deaungkho y Tameuh hawi aly naimy awm chum nai ne baly, achi ly aly naimy awm nai bo y ly mymy i hengra deaungkho y pahengra nga takengkei ai.

¹¹Huni khyh py ny y leang, vai aly naira ang nga hai nai keung achi i Areng Isu Krista i saho y achi ly Tameuh y kawn teang nai ne.

¹²Hunaibaly khumi leaungrei nai deaungkho y kamngo khaileaung pri y kun i, kamngo nai deaungkho y deira py kun teang; hunai kamta khyp teang khumi bawibawi kamngo sa nai deaungkho y deira my ly khumi bawibawi ai num be bo.

¹³Naibaly Reita by y rai khala y my khaileaung pri y kamngo awm chum veng bo; na i py Reita by y baly kamngo ly kamngo y palawn nai ny y leang;

¹⁴ne mang ly Adam awm nai dengdairei Mosi awm nai khala y khrairei Adam i taphra nai kamta kamngo so y naichi i tlang tleaung y py dei naira my peang bo. (Huni ly Adam ai ly ang jeu ai nai hawi pata nai ne.)

¹⁵Na i py huni atiti jawm pei nai ly kamngo naira hawi atawm y leang teang. Khumi leaungrei ly kamngo nai deaungkho y malawn py khumi neangneang dei baly, Tameuh i pahenra hawi, huni pahenra i pei nai khumi leaungrei Isu Krista py khumi neangneangchi i tlang tleaung y bawn nai awm khyp bo.

¹⁶Naibaly huni atiti jawm pei nai ly khumi leaungrei i kamngo nai deaungkho y atiti tym nai hawi atawm y leang teang; ati mana nai mo nabaly sum hai ai nai tara chih nai ly khumi leaungrei nai deaungkho y tym; na i py eaung hai ai nai atiti jawm pei nai ly kamngo neangneang nai deaungkho y tym lawh nai teu.

¹⁷Khumi leaungrei kamngo nai deaungkho y dei naira my leaungrei deaungkho y peang makho baly, khrikhri pa-rei pahenra hawi, jawm pei nai hawi naira nga nai keungchi ly khumi leaungrei (Isu Krista) deaungkho y heng naira y peang takengkei ai.

¹⁸Hunaibaly kamngo harei nai deaungkho y sum hai ai nai tara chih nai ly khumi bawibawi i tlang tleaungy tym; hunai kamta atiti kahawi harei sa nai deaungkho y hengra nga ai nai eaung hai naira ly khumi bawibawichi i tlang tleaung y py tym teang.

¹⁹Khumi leaunrei i leu tangai y nai sai deaungkho y khumi neangneangchi ly kamngo lawn bo; hunai kamta khyp teang khumi leaungrei i leu tangai nai sai deaungkho y khumi neangneangchi ly khumi kahawi lawn bo.

²⁰Naibaly kamngo ly amny ra thai ai nai, Reita py awm bi bo;

²¹hunaibaly kamngo my ly deira y peang nai kamta, pahenra my ly hawi naira y deungtasarei hengra nga ai nai ka-lawn pa-rei achi i Areng Isu Krista i saho y peang thai ai nai, kamngo peung naira tleirei y ly pahenra py khri pa-rei peung ra veng.