Read Khumi Chin ROM 6 Bible Online

ROM 6 - Khumi Chin bible

ROM 6

¹Hunaibaly achi ly ati thui ai mo? Pahenra ly peung ra peung ra thai ai nai achi ly kamngo sa veangveang ai a?

²Ny y leang. Achi, kamngo mang y ly dei chum veng naichi ly kamngo naimy mana heng jo thai ai mo?

³Achi theung y Krista Isu y baptisma nga nai ngiereichi ly mymy i dei naira y baptisma nga nai ne, nanai nangchi pany y nai sai a?

⁴Hunaibaly Ampo i nang parai naira my Krista ai kadeichi theung i nai pathau nai kamta, achi py heng naira kangtha y tako thai ai nai, achi ly baptisma nga naira y mymy teng y up teang nai bo.

⁵Achi ly mymy i dei naira atawm hai iy, mymy hawi amtawm chum bo nabaly, achi ly mymy i angthau bi nai atawm hai naira y py amtawm teang ai.

⁶Hini ly achi pany, kamngo awm nai tlang ai ly tama hai thai iy, achi ly vai i dengdairei kamngo miseaung y awm y ai nai, achi i awm nai sai kangngym ly mymy teng y tahen nai awm teang bo.

⁷Ati mana nai mo nabaly ami py dei chum nai ly kamngora i nai lawi veng bo.

⁸Naibaly achi ly Krista teng y dei teang chum bo nabaly, achi ly mymy teng y heng teang ai, nanai achi ym;

⁹Krista ai ly kadeichi theung i nai pathau i, dei ali bi y leang bo, nanai achi pany; deira my ly mymy i tlang tleaung y aly peang bi y leang bo.

¹⁰Mymy i dei nai ly kamngo mang y ly tlenrei chy dei nai ne; mymy i heng nai naini Tameuh mang y heng nai ne.

¹¹Hunai kamta teang nangchi py kamngo mang y ly dei chum nai kamta apalawn u ly, Tameuh mang y naini Krista Isu y heng nai ne, nanai apalawn u.

¹²Hunai deaungkho nangchi i tlang i ngai phi teng y nairachi patawm ai nai, nangchi i dei thai nai tlang ai ly kamngo my peang ai nai pei u moh:

¹³nangchi i tlang kangpreichi py hawi y naira i hai lawn ai nai kamngo teng y pei u moh; na i py kadeichi theung i dengdairei heng teang nai kamta Tameuh teng y apei u ly, nangchi i tlang kangpreichi py hawi naira i hai lawn ai nai Tameuh teng y phai pei u.

¹⁴Kamngo naira my ly nangchi i tlang tleaung y aly peang ai nai ny y leang bo; ati mana nai mo nabaly nangchi ai ly Reita my peang nai ny y leang, pahenra my ang peang nai teu.

¹⁵Tumbaly mana ai mo? Reita my achi ai peang nai ny y i, pahenra my peang nai deaungkho y achi ly kamngo sa ai nai tla a?

¹⁶Ny y leang. Ami teng y py ni i leu tangai u ai nai nangchi my miseaung y achei u baly (dei ai nai ataing pa-rei kamngo i miseaung y mo, hawi ai naira ataing pa-rei leu tangai ai nai miseaung y mo), nangchi ly mymy i leu tangai u nai miseaung ne, nanai pany u y nai sai a?

¹⁷Na i py nangchi ly kamngo miseaung ne teu iy py, ang au nai patiu nai reita teng y ly paleung y tangai u bo;

¹⁸naibaly nangchi ly kamngo miseaung i nai law u i, hawi naira i miseaungchi lawn u bo; hunai deaungkho y Tameuh teng y kawn nai leu tym sy;

¹⁹nangchi i tlang ham y nai sai deaungkho y khumichi i thui reng nai kamta kathui nai ne: nangchi ly nangchi i tlang kangpreichi ai ly chai y naira hawi taphra ra taphra ra ai naira teng y py au u nai kamta ly, vai nangchi i tlang kangpreichi ai ly chai thai ai nai hawi naira teng y miseaung y achei u.

²⁰Nangchi ly kamngo i miseaungchi ne u nai thym khala y, nangchi ly hawi naira molam y law nai ne.

²¹Vai nangchi i atiti kaji hai parai nairachi y ly, hunai thym khala y ly athai ati nga u mo? Huni atitichi i tem naira ly dei naira ne chy bo.

²²Na i py vai ly kamngora i nai ang law hai i, Tameuh i miseaungchi lawn u iy, nangchi ly chai naira nga nai ka-lawn pa-rei athai nga u nai chy bo, huni i tem naira ly deungtasarei hengra ne.

²³Ati mana nai mo nabaly kamngo vang ly dei naira ne; na i py Tameuh i jawm pei nai ly achi i Areng Isu Krista i saho y deungtasarei heng naira ne.