Read Khumi Chin ROM 7 Bible Online

ROM 7 - Khumi Chin bible

ROM 7

¹Amjo amnauchi awi, khumi heng nai sala ryrei ly Reita ly mymy i tlang tleaung y peang, nanai nangchi pany u y nai sai a? (Kai ly Reita pany nai khumi teng y kathui nai he.)

²Juvo awm nai neampachy ly juvo heng nai sala ryrei ly reita deaungkho y juvo hawi kawm tabom bo; na i py juvo dei baly mymy ly juvo i molam y reita i dengdairei patlaw bo.

³Hunaibaly mymy i juvo heng nai sala ryrei ly mymy ly neampacho takhra hawi apom baly, Pajang sa nai neampachy, nanai amyn pathi ai; na i py mymy i juvo dei baly mymy ly reita i dengdairei patlaw bo; hunaibaly mymy ly khumi takhra hawi apom iy py, pajang sa nai neampachy ny y leang bo.

⁴Hunai kamta teang amjo amnauchi awi, achi ly Tameuh mang y athai nga thai ai nai, nangchi ly khumi takhra, kadeichi theung i nai pathau chum veng nai keung hawi amtawm thai ai nai, Krista i tlang deaungkho y nangchi ai ly Reita molam y ang dei hai bo.

⁵Achi ly tlang mang y awm nai thym khala y Reita deaungkho y kamngo sa hai nai ngai phi teng y nairachi my achi i tlang kangpreichi theung y dei ai ataing pa-rei athai ai nai sa reng.

⁶Na i py cha tajiu nai kangngym kamta ny y naimy, phailo kangtha y atiti sa thai ai nai, achi ly vai ly ang patawn naira i nai dei chum iy, achi ai Reita i dengdairei ang patlaw bo.

⁷Tumbaly achi ly ati thui ai mo? Reita ly kamngo lawh a? Ny y leang. Na i py Reita ny y nai khyly kai ly kamngo apany y leang bo; Reita my ly, “Paleung no moh,” tapi moh khyly kai ly paleung no ai nai kapany y leang bo:

⁸na i py leu pei nai deaungkho y kamngo my ly avo nai neng nga iy, paleung no naira cheaungkhang kai i paleung theung y ang tym hai bo; Reita ny y baly kamngo ly dei nai ne.

⁹Naibaly kai ly jangni y ly Reita ny y naimy kaheng; na i py leu pei nai awm bo nabaly kamngo ly amcheng teang iy, kai ly kadei bo.

¹⁰Naibaly heng ai nai leu pei nai kypkyp ly kaimy i vui dei naira lawn bo, nanai kapany bo;

¹¹leu pei nai deaungkho y kamngo my ly avo nai neng nga iy ang tapawp i, huni ai ly teaung iy ang padei bo.

¹²Hunaibaly Reita ly kachai ne, leu pei nai py chai py chai, hawi py hawi, meitang py ne.

¹³Hunaibaly atiti meitang ly kai i vui dei naira lawn a? Ny y leang. Na i py kamngo ly leu pei nai deaungkho y khri pa-rei kamngo lawn thai ai nai hawi, kamngo ly kamngo ne, nanai amteng thai ai nai py, huni ly atiti meitang teaung iy kai i tlang tleaung y dei naira tym hai nai teu.

¹⁴Reita ly phailo mang y asa nai ne, nanai achi pany; kai naini tlang mang y asa nai, kamngo i miseaung y ka-jo chum nai khumi ne.

¹⁵Kai i sa nai sai ly dawn kapany y; kai i atiti sa reng nai ly kai i kangai sa nai ny y leang; huni ny y naimy kai i atiti kaniu ngai y nai kasa nai ne.

¹⁶Na i py kai i kangai ny y nai kasa makho baly, Reita ly hawi, nanai kanapi teang.

¹⁷Hunaibaly kai i atiti kasa nai ly kaimy i kasa nai ny y leang bo, kai theung y awm nai kamngo my ly sa nai teu.

¹⁸Kai theung y (huni ly kai i tlang y ly, nanai sai ne), atiti kahawi ha py by y, nanai kapany; ngai naira ly kai theung y awm teu i py, atiti kahawi sa nai ly by y leang.

¹⁹Ati mana nai mo nabaly, atiti kahawi sa ai kangai nai ly kaso y; na i py kamngo sa ai kangai y nai ly kasa reng.

²⁰Hunaibaly kai ai ngai y nai kasa makho baly, sa nai keung ly kai ny y leang, kai theung y awm nai kamngo my ly sa nai teu.

²¹Hunaibaly hini reita ly kapany bo; atiti kahawi sa ai kangai nai thym khala y kamngo ly kai teng y awm lawh nai ne.

²²Kai i paleung tatang y Tameuh i Reita tleaung y kakawn lawh veng;

²³na i py kai i tlang kangpreichi theung y ly reita takhra awm, nanai kapany; huni ly kai i paleung i reita ai tiu i, kai i tlang kangpreichi theung y kamngo awm nai reita teng y miseaung y ang hawi.

²⁴Kai ly khri pa-rei patang nai khumi ne na ly! Hini dei nai tlang i nai ami my ang law hai ai mo?

²⁵Isu Krista achi i Areng i saho y Tameuh teng y kawn nai leu tym sy! Hunaibaly kaimy tatang ly kaimy i paleung y ly Tameuh i Reita i miseaung y kalawn, na i py kai i tlang y ly kamngo reita i miseaung y kalawn bo.